قازاقستان ۇلتتىڭ جاڭا ساپاسىن قالىپتاستىرۋعا كىرىستى- ەرلان قارين

  مەملەكەتتىك كەڭەسشى ەرلان قارين بيىل ىسكە اسقان ساياسي رەفورمالارعا توقتالىپ، جىلدى قورىتىندىلادى، دەپ حابارلايدى Kazinform.

ونىڭ ايتۋىنشا، ءوتىپ بارا جاتقان 2023-جىل ەلىمىز ءۇشىن تىڭ باستامالارعا تولى بولدى. بيىل ساياسي جۇيەنىڭ جالپى كەلبەتىن وزگەرتكەن جانە جاڭا ەكونوميكالىق ۇلگىنىڭ نەگىزىن قالاعان رەفورمالار جۇزەگە استى.

سونداي-اق ازاماتتاردىڭ قوعامدىق قۇندىلىقتار مەن نورمالاردى قايتا قاراۋ، وزگەرتۋ قاجەتتىگىن ۇعىنۋىنا ىقپال ەتكەن وقيعالار بولدى.

«2023-جىلدىڭ ءبىرىنشى جارتىجىلدىعىندا بىلتىر باستالعان ساياسي رەفورمالار ىسكە اسىرىلدى. اتاپ ايتقاندا، كونستيتۋتسيالىق سوت جۇمىسىن باستادى (1-قاڭتاردان باستاپ)، پارلامەنتى سەناتىنىڭ سايلاۋى ءوتتى (14-قاڭتار)، ءماجىلىس پەن بارلىق دەڭگەيدەگى ءماسليحات دەپۋتاتتارى جاڭا ەرەجە بويىنشا سايلاندى (19-ناۋرىز)، ادام قۇقىقتارى جونىندەگى ۋاكىلدىڭ مارتەبەسى كۇشەيتىلدى. وسىلايشا، ءبىرىنشى جارتىجىلدىق ساياسي جۇيەنى ينستيتۋتسيونالدى تۇرعىدان قايتا قاراۋ ءۇشىن قولعا الىنعان كۇردەلى ۇدەرىستىڭ اياقتالۋىمەن قورىتىندىلاندى»، - دەپ جازدى ەرلان قارين Telegram پاراقشاسىندا.

2023-جىلدىڭ ەكىنشى جارتىجىلدىعىندا مەملەكەتتىك ساياساتتا جالپى ۇلتتىق قۇندىلىقتار جۇيەسىن قايتا قاراۋعا باسىمدىق بەرىلدى.

بۇل جۇمىس پرەزيدەنت قاسىم-جومارت توقايەۆتىڭ ۇلتتىق قۇرىلتايدىڭ ەكىنشى وتىرىسىندا، ياعني تۇركىستاندا سويلەگەن سوزىنەن باستالدى (17-ماۋسىم).

وسى القالى جيىندا مەملەكەت باسشىسى ۇلتىمىز ءۇشىن ماڭىزدى مىناداي نەگىزگى يدەولوگەمالاردى اتاپ ءوتتى: تاۋەلسىزدىك پەن وتانشىلدىق، بىرلىك پەن تۇراقتىلىق، ادىلدىك پەن تىلەكتەستىك، زاڭ مەن ءتارتىپ، سەنىم مەن جاۋاپكەرشىلىك، ءبىلىمپازدىق پەن كاسىبيلىك، ۇنەمشىلدىك پەن ەڭبەكقورلىق.

«كەيىن ءتۇرلى وقيعالار بۇل ماسەلەنىڭ ماڭىزدى ەكەنىن كورسەتتى. قوعامدا زاڭ مەن ءتارتىپتى ساقتاۋ، ايەلدەر مەن بالالاردىڭ قۇقىقتارىن قورعاۋ، تۇرمىستىق زورلىق- زومبىلىققا توسقاۋىل قويۋ، ۆانداليزم مەن جۇگەنسىزدىككە قارسى كۇرەسۋ جانە باسقا دا ماسەلەلەر توڭىرەگىندە قىزۋ پىكىرتالاس ءوربىدى. مۇنىڭ ءبارى جەكە جانە قوعامدىق مادەنيەتتىڭ جاڭا نورمالارىن قالىپتاستىرۋعا جانە ونى ساقتاۋعا قالىڭ كوپشىلىكتىڭ سۇرانىسى ارتا تۇسكەنىن اڭعارتادى. ءبىر سوزبەن ايتقاندا، قازاقستان ۇلتتىڭ جاڭا ساپاسىن قالىپتاستىرۋعا كىرىستى. بۇل - جاڭا، اسا كۇردەلى جانە وتە ماڭىزدى مىندەت. ساياسي رەفورمالارعا قاراعاندا، بۇل جەردە زاڭنامانى وزگەرتۋ نەمەسە جاڭا ينستيتۋتتار قۇرۋ جەتكىلىكسىز. قوعام ساناسىن ءبىر ساتتە وزگەرتۋ مۇمكىن ەمەس. بۇل-كەزەڭ-كەزەڭىمەن، بىرتىندەپ جۇزەگە اسىرىلاتىن تابيعي ۇدەرىس. جاڭا قوعامدىق ەتيكا جاڭارعان ۇلتتىق مەنتاليتەتتىڭ نەگىزى بولۋى ءۇشىن وعان باعىت- باعدار بەرىپ وتىرۋ كەرەك. مىنە، ءدال وسى ماسەلە الداعى 2024-جىلى قوعام نازارىندا بولۋى مۇمكىن»،-دەپ تۇيىندەدى مەملەكەتتىك كەڭەسشى.