قازاقستان ۇكىمەتى دۇنيەجۇزىلىك بانكپەن سەرىكتەستىكتى ءارى قاراي نىعايتۋعا نيەتتى - ءاليحان سمايىلوۆ

Әлихан Смайылов
فوتو: primeminister.kz/

استانا. KAZINFORM - ق ر پرەمەر-ءمينيسترى ءاليحان سمايىلوۆ دۇنيەجۇزىلىك بانكتىڭ ورتالىق ازيا بويىنشا وڭىرلىك ديرەكتورى تاتيانا پروسكۋرياكوۆامەن كەزدەستى.

ق ر ۇكىمەتى باسپا ءسوز قىزمەتىنىڭ حابارلاۋىنشا، كەزدەسۋدە تاراپتار ەكونوميكانى دامىتۋ، سيفرلاندىرۋدى ەنگىزۋ، قورشاعان ورتانى قورعاۋ جانە ت. ب. سالالار بويىنشا بىرلەسكەن جوبالاردى ىسكە اسىرۋ ماسەلەلەرىن تالقىلادى.

ۇكىمەت باسشىسى 30 جىلدىق سەرىكتەستىك بارىسىندا ەلىمىزدە جالپى سوماسى $8 ميللياردتان استام 48 بىرلەسكەن جوبانىڭ ءساتتى ىسكە اسىرىلعانىن اتاپ ءوتتى. بۇگىندە 6 جوبا بەلسەندى تۇردە جۇزەگە اسىرىلۋدا.

Татьяна Прокурякова
فوتو: primeminister.kz/

ونىڭ سوزىنشە، دۇنيەجۇزىلىك بانكپەن سەرىكتەستىك ينكليۋزيۆتى جانە تۇراقتى دامۋعا قول جەتكىزۋ ءۇشىن قازاقستاندا ىسكە اسىرىلىپ جاتقان رەفورمالاردى قولداۋعا باعىتتالعان. 20 جىلدان استام ءساتتى جۇزەگە اسىرىلىپ جاتقان بىرلەسكەن ەكونوميكالىق زەرتتەۋلەر باعدارلاماسى ونىڭ ايقىن مىسالى بولىپ تابىلادى.

«قازاقستان ۇكىمەتى دۇنيەجۇزىلىك بانكپەن سەرىكتەستىكتى ءارى قاراي نىعايتۋعا نيەتتى»، - دەپ اتاپ ءوتتى ءاليحان سمايىلوۆ.

ءوز كەزەگىندە تاتيانا پروسكۋرياكوۆا ۇيىم قازاقستان بويىنشا جاڭا جوبالاردى دايىنداۋدى جانداندىرعانىن، وعان بىلتىر تامىزدا وتكەن كەلىسسوزدەردىڭ ىقپال ەتكەنىن اتاپ ءوتتى. ونىڭ ىشىندە ۇكىمەتتىڭ شالعاي ەلدى مەكەندەردى ينتەرنەتكە قوسۋ باعدارلاماسى دا بار.

«بۇل ورتالىق ازياداعى بارلىق ەل ءۇشىن جاقسى ۇلگى بولادى دەپ ويلايمىن. مەنىڭ ويىمشا، قازاقستاننىڭ وڭىرلىك كوشباسشى رەتىندەگى ءرولى نىعايا تۇسپەك»، - دەدى ول.

سوڭعى جاڭالىقتار