قازاقستان ەكولوگيالىق تيىمدىلىك رەيتينگىندە قاي ەلدەردەن ارتتا قالدى
استانا. KAZINFORM - قازاقستان كەيىنگى جىلدارى 180 ەلدىڭ اراسىندا ەكولوگيالىق تيىمدىلىك رەيتينگىندە 93-ورىندا تۇراقتاپ، نامبيا، گابون جانە زيمبابۆە سياقتى ەلدەردەن ارتتا قالدى.
ءبىزدىڭ ەلىمىز جاسىل جەلەككە بولەنگەن ەلدەر رەيتينگىندە 78 ەلدىڭ ىشىندە 72-ورىندا. سەناتور سوۆەتبەك مەدەبايەۆ ءوزىنىڭ دەپۋتاتتىق ساۋالىندا اۋانىڭ، سۋدىڭ جانە توپىراقتىڭ شامادان تىس لاستانۋ پروبلەمالارىن جاريا ەتتى.
دەپۋتاتتىڭ ايتۋىنشا، قازاقستاندا استانا، الماتى، اقتوبە، قاراعاندى، جەزقازعان جانە تەمىرتاۋداعى اۋا جوعارى دەڭگەيدە لاستانعانى بايقالدى. ونىڭ ءبارى ادامداردىڭ ءومىرى مەن دەنساۋلىعىنا تەرىس اسەر ەتەدى.
«ۇلىتاۋ وبلىسىنىڭ جەزقازعان جانە ساتپايەۆ قالالارىندا ايماقتاعى ءوندىرىس ورىندارىندا زياندى گازداردى سۇزۋگە ارنالعان قوندىرعىلاردى جاڭارتۋ جۇمىستارىن دەر كەزىندە جۇرگىزبەسە، ءوڭىردىڭ ەكولوگيالىق جاعدايى كۇرت ناشارلاۋى مۇمكىن. قازىرگى كەزدە جەزقازعان وڭىرىندە نەگىزگى سۋ كوزى - كەڭگىر سۋ قويماسى. ال سۋدىڭ ساپاسى وندا قاناعاتتانارلىق ەمەس، سۋ كلاسى بويىنشا IV كلاس رەتىندە انىقتالعان. سۋدىڭ ساپاسىن جاقسارتۋ بويىنشا گيدرولوگيالىق جۇمىستاردى جۇرگىزۋمەن قاتار، ءۇيتاس - ايدوس جەراستى سۋ قۇبىرىنىڭ قۇرىلىسىن دا جەدەلدەتۋ قاجەت»، - دەدى س. مەدەبايەۆ پرەمەر-مينيستر ولجاس بەكتەنوۆتىڭ اتىنا جولداعان ساۋالىندا.
سونىمەن قاتار سەناتور ءوندىرىس ورىندارىنىڭ قالدىقتارى اشىق جەرلەردە ساقتالىپ جاتقانىن ايتتى. قاتتى تۇرمىستىق قالدىقتاردىڭ كوپ بولىگى ەش سۇرىپتاۋسىز شىعارىلىپ جاتىر جانە اشىق پوليگوندار مەن قالالىق پوليگونداردا جينالعان.
دەپۋتات وسىعان بايلانىستى جاعدايدىڭ اۋقىمى مەن قازاقستاندىقتاردىڭ دەنساۋلىعىنا ەلەۋلى قاتەر ءتونۋى مۇمكىندىگىن ەسكەرە وتىرىپ، وزەكتى ماسەلەلەردى شەشۋ جونىندە ءبىرقاتار شارالاردى ۇسىندى.
«قاۋىپتى قالدىقتار مەن قوقىستاردىڭ مولشەرىن ازايتۋ ماقساتىندا الەمدىك ەكولوگيالىق ستاندارتتارعا سايكەس ەكوجۇيە ەنگىزۋ جولدارىن قاراستىرۋ قاجەت. قالدىقتاردى، ونىڭ ىشىندە قۇرىلىس قالدىقتارىن جيناۋعا ارنالماعان جەرلەردە زاڭسىز تاسىمالداۋ جانە شىعارۋ فاكتىلەرىن انىقتاۋ ماقساتىندا تەكسەرۋ جانە وزگە دە شارالار اتقارۋ ارقىلى مەملەكەتتىك باقىلاۋدى كۇشەيتۋ قاجەت. جەرگىلىكتى جانە ورتالىق اتقارۋشى ورگاندار بىرلەسىپ اۋداندىق، قالالىق جانە اۋىلدىق ەلدى مەكەندەردە تۇرمىستىق قاتتى قالدىقتاردى باسقارۋ، ونىڭ ىشىندە تۇرمىستىق قاتتى قالدىقتاردى بولەك جيناۋ، تاماق جانە قۇرىلىس قالدىقتارىن قايتا وڭدەۋ جونىندە ينفراقۇرىلىم قۇرۋ ماسەلەسىن قاراستىرۋى ماڭىزدى»، - دەپ اتاپ ءوتتى سوۆەتبەك مەدەبايەۆ.
