قازاقستان كوكپاردان كوشپەندىلەر ويىنىنىڭ چەمپيونى بولدى
استانا. KAZINFORM - دۇنيەجۇزىلىك كوشپەندىلەر ويىندارى اياسىندا ءتورت كۇن بويى استانانىڭ «قازانات» اتشابارىن دۇبىرگە بولەگەن كوكپار ويىندارى بۇگىن مارەسىنە جەتتى.
اقتىق سىندا قىرعىزستان كوكپار كومانداسىمەن سايىسقا تۇسكەن قازاقستاندىق شاباندوزدار 5:4 ەسەبىمەن جەڭىسكە جەتىپ، دۇنيەجۇزىلىك كوشپەندىلەر ويىندارىنىڭ التىن جۇلدەسىن قانجىعالادى.
قىرعىز كوكپارشىلارى كۇمىس جۇلدەگەر اتاندى.
ايتا كەتەيىك، ءبىرىنشى تايمدا سەركەگە تالاس كەزىندە ەكى ەلدىڭ كوكپارشىلارى قاقتىعىسىپ قالىپ، ويىن ۋاقىتشا توقتاعان بولاتىن.
تورەشىلەردىڭ ارالاسۋىمەن 10 مينۋتقا سوزىلعان داۋ-داماي وڭ شەشىمىن تاۋىپ، ويىن قايتا جالعاستى.
ەكىنشى كەزەڭدە قازاقستاندىق شاباندوزدار جىگەرلەنە شابۋىلعا كوشىپ، ەسەپتى ەسەلەدى. ءسويتىپ 4:3 ەسەبىمەن العا شىقتى.
الايدا، ويىننىڭ سوڭعى سەكۋندتارىندا قىرعىزستاندىق كوكپارشىلار تاعى ءبىر سالىم سالىپ، ويىندى تەڭەستىرىپ، نەگىزگى ۋاقىت 4:4 ەسەبىمەن تەڭ ناتيجەمەن اياقتالدى.
تورەشىلەر قوسىمشا 10 مينۋت ۋاقىت قوستى. وسى شەشۋشى ساتتە العاشقى سالىمدى قازاق كوكپارشىلارى سالىپ دۇنيەجۇزىلىك كوشپەندىلەر ويىندارىنىڭ چەمپيونى اتاندى.
ايتا كەتەيىك، كەشە قازاقستاندىق كوكپارشىلار رەسەيدى 18:2 ەسەبىمەن جەڭىپ، فينالعا وتكەن ەدى.
بۇعان دەيىن Kazinform تىلشىسىنە ق ر كوكپار قۇراما كومانداسىنىڭ اعا جاتتىقتىرۋشىسى وماربەك ەركەباي شاباندوزداردىڭ فينالدىق كەزدەسۋگە تاس-ءتۇيىن دايىن ەكەنىن ايتقان بولاتىن.
كوكپار ويىندارىنا قازاقستان، ا ق ش، رەسەي، وزبەكستان، قىرعىزستان، ماجارستان، قىتاي، موڭعوليا جانە تۇركيا سىندى 9 مەملەكەتتىڭ سپورتشىلارى باق سىنادى.
اۆتور
ريزابەك نۇسىپبەك ۇلى
