قازاقستان جايىلىمدارىنىڭ %87 دان استامى وتە ناشار جاعدايدا
استانا. KAZINFORM - الەمدىك رەيتينگتە قازاقستان اۋىل شارۋاشىلىعى القاپتارىنىڭ كولەمى بويىنشا 6-ورىندا تۇر. دەگەنمەن بىرنەشە فاكتور ءبىزدىڭ ەلىمىزگە اۋىل شارۋاشىلىعى ونىمدىلىگى مەن ازىق-تۇلىك قاۋىپسىزدىگى كورسەتكىشتەرى بويىنشا كوشباسشى بولۋعا مۇمكىندىك بەرمەيدى.
ماسەلەن، پايدالانىلاتىن جەرلەردىڭ تومەن ساپاسى، توزۋ دەڭگەيى، شولەيتتەنۋ، شابىندىقتار ونىمدىلىگىنىڭ تومەندىگى بار.
«قازاقستان عارىش ساپارى» ۇلتتىق كومپانياسى» ا ق جۇرگىزەتىن عارىشتىق مونيتورينگكە سايكەس، 2023 -جىلى قازاقستاننىڭ بارلىق جايىلىم جەرلەرىنىڭ %87,2 ى ناشار جانە وتە ناشار جاعدايدا بولعان نەمەسە ەشقانداي وسىمدىك بولماعان. 80,8 ميلليون گەكتاردىڭ ىشىندە مۇنداي جەرلەردىڭ اۋدانى 70,5 ميلليون گەكتارعا جەتكەن. قاناعاتتانارلىق جاعدايداعى جايىلىمدار ۇلەسى نەبارى %10,2، جاقسى جاعدايدا -%2,1، ۇزدىك جاعدايدا - %0,5. بۇل ەسەپتەۋلەر ق ر ستراتەگيالىق جوسپارلاۋ جانە رەفورمالار اگەنتتىگىنىڭ ەكسپەريمەنتتىك ستاتيستيكا دەرەكتەرى نەگىزىندە جاسالعان.
جايىلىمدىق جەرلەردىڭ ساپاسىنا قاتىستى قاناعاتتانارلىقسىز جاعداي ەل اۋماعىنىڭ باسىم بولىگىندە ءجيى كەزدەسەدى. وتكەن جىلى 17 وبلىستىڭ 15 ىندە وسىمدىك جامىلعىسى جوق نەمەسە جاعدايى ناشار جايىلىمدار ۇلەسى %80 دان جوعارى بولعان. ەڭ ناشار جاعداي ماڭعىستاۋ وبلىسىندا، مۇنداعى تاقىر جايىلىمدار وسى ساناتتاعى بارلىق اۋىلشارۋاشىلىق جەرلەرىنىڭ %99,4 ىن قۇرايدى. ەڭ ناشار كورسەتكىشتەرى بار اۋتسايدەرلەر بەستىگىندە اتىراۋ %98,1، ۇلىتاۋ %97,4، جامبىل %95,7 جانە تۇركىستان %93,6 وبلىستارى بار. قوستاناي مەن شىعىس قازاقستان وبلىستارى كەرىسىنشە، جايىلىمعا ەڭ باي وڭىرلەر اتاندى. مۇندا تەرىس كورسەتكىشتەر باسقا اۋماقتارعا قاراعاندا تومەن - %57,4 جانە %72,2.
«اۋىل» پارتياسى ءتوراعاسىنىڭ ءبىرىنشى ورىنباسارى، اۋىل شارۋاشىلىعى ءمينيسترىنىڭ بۇرىنعى كەڭەسشىسى تولەۋتاي راحىمبەكوۆ ب ا ق- قا بەرگەن سۇحباتىندا كوپتەگەن وڭىرلەردە قازاقستاندىقتار جايىلىم بولماۋىنا بايلانىستى مال ۇستاي المايتىنىن اتاپ ءوتتى. جەردىڭ توزۋى مەن شابىندىقتاردىڭ تومەن ونىمدىلىگى كليماتتىڭ وزگەرۋىنە تىكەلەي بايلانىستى. الداعى جىلدارى جاعداي ناشارلاۋى مۇمكىن.
«دۇنيەجۇزىلىك مەتەورولوگيالىق ۇيىمنىڭ مالىمەتىنشە، قازاقستان اۋماعىنداعى كليماتتىڭ وزگەرۋ پروتسەسى الداعى 20-30 جىلدا كۇشەيە تۇسەدى. قازاقستاندا قاتتى قۇرعاقشىلىق ءجيى بولىپ، جەردىڭ توزۋىنا، شولەيتتەنۋىنە ىقپال ەتەدى دەپ بولجانادى. قازىردىڭ وزىندە قازاقستان جەرىنىڭ شامامەن %70 ىنا قۇرعاقشىلىق قاۋپى ءتونىپ وتىر، ەل حالقىنىڭ تورتتەن ءبىر بولىگى توزعان جەرلەردە تۇرادى. بولجام بويىنشا، 2030 -جىلعا قاراي ەلىمىزدە جايىلىمداردىڭ وتكىزۋ قابىلەتى %10 عا تومەندەيدى»، - دەدى تولەۋتاي راحىمبەكوۆ.
