قازاقستان جاس وسپىرىمدەر قۇراماسى ەكىنشى جىل قاتارىنان الەم چەمپيوناتىنا جولداما الدى

شىمكەنت. KAZINFORM - شىمكەنت قالاسىنداعى Beeline Arena ۇلتتىق تەننيس ورتالىعىندا 16 جاسقا دەيىنگىلەر اراسىند ءوتىپ جاتقان دەۆيس كۋبوگى ازيا - تىنىق مۇحيت ايماعى بويىنشا ىرىكتەۋ تۋرنيرىندە قازاقستان جاسوسپىرىمدەر قۇراماسى جەڭىسكە جەتتى.

شيرەك فينالدا سەرگەي كۆاكتىڭ شاكىرتتەرى الەمدەگى ۇزدىك قۇرامالاردىڭ ءبىرى، جاسوسپىرىمدەر اراسىندا دەۆيس كۋبوگىنىڭ التى دۇركىن چەمپيونى اۋستراليا قۇراماسىن 2:0 ەسەبىمەن تىزە بۇكتىردى.

كەمەرون بەرتوندى 6:3, 6:0 ەسەبىمەن ۇتقان دامير جالعاسباي قازاقستانعا ءبىرىنشى ۇپايدى اپەردى. سودان كەيىن زاڭعار نۇرلان ۇلى «ۇلكەن دۋلىعا» تۋرنيرىنىڭ ەكى دۇركىن جەڭىمپازى للەيتون حيۋيتتىڭ ۇلى - كرۋز حيۋيتتى تاس- تالقان ەتىپ جەڭدى - 6:1, 6:0.

وتكەن جىلى دا شيرەك فينالدا قازاقستاندىقتار اۋستراليانى 2:0 ەسەبىمەن قاپى قالدىرعان ەدى. وسىلايشا، قازاقستان جاسوسپىرىمدەر قۇراماسى الداعى كۇزدە 16 جاسقا دەيىنگىلەر اراسىندا دەۆيس كۋبوگىنىڭ فينالدىق كەزەڭىندە ەكىنشى جىل قاتارىنان باق سىنايدى.

ەرتەڭ، 24-مامىر كۇنى قازاقستاندىقتار جارتىلاي فينالدا كورەيا نەمەسە گونكونگ قۇراماسىمەن كەزدەسەدى.

ەسكە سالا كەتەيىك، بۇدان بۇرىن قازاقستان جاسوسپىرىمدەر قۇراماسىنىڭ قىتايدى جەڭگەنىن جازعان بولاتىنبىز. سونداي-اق رولان گارروس تۋرنيرىندە ميحايل كۋكۋشكين ىرىكتەۋ جارىسىنىڭ فينالىنا ءوتتى.