قازاقستان جاسوسپىرىمدەر اراسىنداعى الەم چەمپيوناتىندا تاريحي ناتيجەگە قول جەتكىزدى

الماتى. KAZINFORM - الماتىداعى «شىمبۇلاق» تاۋ- شاڭعى كۋرورتىندا فريستايلدان (موگۋل، اكروباتيكا) جاسوسپىرىمدەر اراسىنداعى الەم چەمپيوناتى مارەسىنە جەتتى، دەپ حابارلايدى ق ر تۋريزم جانە سپورت مينيترلىگى.

فريستايل-موگۋلدان ۇلتتىق قۇراما بارلىق جارىس كۇنى جۇلدەگە قول جەتكىزدى. اتاپ ايتقاندا، الەم بىرىنشىلىگىنىڭ العاشقى كۇنىندە اناستاسيا گورودكو جەكەلەي سىندا 2-ورىن السا، ەرتەسىنە پاراللەل موگۋلدا التىننان القا تاقتى. ال ارالاس كوماندالىق سايىستا بىلتىر IV قىسقى جاسوسپىرىمدەر وليمپياداسىنا قاتىسقان يۋليا فيكليستوۆا مەن دەنيس راسترۋبا جۇبى كۇمىس جۇلدەگەر اتاندى.

فريستايل-اكروباتيكادان جەكەلەي سىن ەلىمىز ءۇشىن تاريحي ناتيجەمەن ەستە قالدى. ەرلەر اراسىندا دىنمۇحاممەد رايىمقۇل كۇردەلى باعدارلامانى ءساتتى ورىنداپ، چەمپيون اتاندى. ول 104.52 ۇپايمەن ەكى قىتايلىق سپورتشىنى (يۋچ يۋنحەن، يان چجيچەن) باسىپ وزدى. مۇندا ايەلدەر اراسىندا بارلىق جۇلدەنى قىتاي اكروباتتارى يەلەندى.

شەشۋشى جارىس كۇنى كوماندالىق سايىستا قازاقستان-2 كومانداسى (ادەلينا ءومىرزاقوۆا، رومان پوگوسيان، ۇلانباكىر ءومىرزاقوۆ) 6 - ورىن السا، قازاقستان-1 (دىنمۇحاممەد رايىمقۇل، اردانا ماحانوۆا، اسىلحان اسان) 7 - ساتىعا تابان تىرەدى. كوماندالىق سايىستىڭ جۇلدەگەرلەرىن ماراپاتتاۋعا تۋريزم جانە سپورت مينيسترلىگى سپورت جانە دەنە شىنىقتىرۋ ىستەرى كوميتەتىنىڭ ءتوراعاسى رۋسلان ەسەنالين قاتىستى.

جالپى كوماندالىق ەسەپتە موگۋل مەن اكروباتيكادان قازاقستان قۇراماسى 2 التىن، 2 كۇمىس جۇلدە يەلەنىپ، قىتايدان (2 التىن، 3 كۇمىس، 2 قولا) كەيىن 2 - ورىن الدى. ۇزدىك ۇشتىكتى جاپونيا (2 التىن، 1 قولا) سپورتشىلارى تۇيىندەدى.

وسىعان دەيىن قازاقستان قۇراماسى فريستايل-موگۋلدان جاسوسپىرىمدەر اراسىنداعى الەم چەمپيوناتىن ءۇش مەدالمەن اياقتاعانىن جازدىق.