قازاقستان حالقىنىڭ قانشا پايىزى پرەزيدەنتكە سەنىم ارتادى
استانا. KAZINFORM - مەملەكەت باسشىسىنا حالىقتىڭ سەنىم دەڭگەيى تۇراقتى تۇردە جوعارى قالپىن ساقتاپ تۇر. بۇل تۋرالى ق ر پرەزيدەنتى جانىنداعى قازاقستاننىڭ ستراتەگيالىق زەرتتەۋلەر ينستيتۋتى جاريالاعان الەۋمەتتانۋلىق ساۋالناما ناتيجەسىندە ايتىلعان.
- مەملەكەت باسشىسىنا دەگەن سەنىم دەڭگەيى - 80,5 پايىز، ياعني تۇراقتى تۇردە جوعارى بولىپ قالا بەرەدى. جاستار اراسىندا بۇل كورسەتكىش 86,4 پايىزعا، ال قازاقتار اراسىندا 82,2 پايىزعا جەتەدى. ايەلدەر مەن اۋقاتتى توپتار دا سەنىمدىلىكتىڭ جوعارى دەڭگەيىن كورسەتەدى. ازاماتتاردىڭ تۇراقتى سەنىمى ساياسي رەفورمالاردىڭ، الەۋمەتتىك قولداۋدىڭ جانە ەكونوميكالىق شارالاردىڭ ناتيجەسىمەن بايلانىستى بولۋى مۇمكىن، - دەدى ق س ز ي ساراپشىسى گۇلناز قاسىموۆا.
الەۋمەت تانۋلىق زەرتتەۋلەردىڭ ناتيجەلەرى كورسەتكەندەي، قازاقستاندىقتاردىڭ 66,2 پايىزى 2024-جىلدى جاقسى كوڭىل كۇيمەن جانە وپتيميستىك كوزقاراسپەن اياقتاۋدا. كورشى ەلدەر مەن تاياۋ شىعىستاعى اسكەري قاقتىعىستار سياقتى جاھاندىق سىن-قاتەرلەرگە قاراماستان، قازاقستان تۇرعىندارى وتكەن جىلعا وڭ باعا بەرگەن.
سونداي-اق، ساۋالناماعا قاتىسقان ەل ازاماتتارىنىڭ 77,7 پايىزى 2024-جىلعى قازاقستاننىڭ ساياسي دامۋ باعىتىن قولداعان. بۇل كورسەتكىش ەل باسشىلىعىنىڭ ىشكى جانە سىرتقى ساياسي شەشىمدەرى ەل تاراپىنان ماقۇلداۋعا يە بولعانىن كورسەتەدى.
الەۋمەت تانۋشى، ق س ز ي ساراپشىسى ايگۇل زابيروۆا بۇنداي ساۋالناما جۇرگىزىلەردە اۋەلى جالپى حالىقتىڭ قانشا پايىزى جاستار، قانشاسى ورتا جاس، قانشاسى كارى كىسىلەر ەكەنى ەسكەرىلىپ، ساۋالناما رەسپوندەنتتەرى دە ءدال سول پايىزدىق پروپورتسيامەن ىرىكتەلەتىنىن ايتادى. وسىلايشا ساۋالناما ناتيجەسىنىڭ بارىنشا شىنايىلىعى ايقىندالادى.
