قازاقستان حالقىنىڭ بىرلىگى كۇنى تۋرالى نە بىلەمىز

1-مامىر مەرەكەسىنىڭ شىعۋ تاريحىنا ۇڭىلسەك، ول اسا قاتتى قۋانىشتى جايتپەن باستالماعان.

وتكەن عاسىردىڭ ورتاسىندا چيكاگودا جۇمىسشىلار ەڭبەك شارتىن جاقسارتىپ، جۇمىس كۇنىن 8 ساعاتقا دەيىن قىسقارتۋدى تالاپ ەتىپ كوشەگە شىقتى. ءبىراق ءتارتىپ ساقشىلارى تاراپىنان قاتتى قىسىم كورىپ، ونداعان ادام قاتتى جاراقات السا، بىرنەشە بەيبىت تۇرعىن قازا تاپتى. بۇل تۋرالى قازاقستان حالقى اسسامبلەياسىنىڭ وكىلدەرى وڭىرلىك كوممۋنيكاتسيا قىزمەتىندە وتكەن باسپا ءسوز ءماسليحاتىندا ايتتى.

قازاقستان جازۋشىلار وداعىنىڭ مۇشەسى سۆەتلانا انانيەۆانىڭ ايتۋىنشا، وسى جاعدايدى ەسكە الۋ جانە بۇكىل الەمدەگى جۇمىسشىلارمەن ىنتىماقتاستىق بەلگىسى رەتىندە 1-مامىر جۇمىسشىلاردىڭ ىنتىماقتاستىق كۇنى رەتىندە اتالا باستاعان.

«ەرتەڭ اتاپ وتىلەتىن مەرەكەنىڭ ۇزاق دامۋ تاريحى بار. اۆستراليادا العاش رەت 1856 -جىلى جۇمىسشىلار ەرەۋىلى بولدى. قازىر بۇل مەرەكەنىڭ ءار ەلدە ءارتۇرلى اتاۋى بار: «كوكتەم مەرەكەسى» نەمەسە بەلارۋسسياداعىداي «كوكتەم مەن ەڭبەك مەرەكەسى». «ەڭبەك مەرەكەسى» الەمنىڭ كوپتەگەن ەلدەرىندە اتاپ وتىلەدى. اۆستراليادان كەيىن بۇل وقيعا ا ق ش- تىڭ چيكاگو قالاسىندا ءوتتى، وندا ءوز قۇقىقتارىن قورعاعان جۇمىسشىلاردىڭ ەرەۋىلى بولدى. كەڭەس وداعى كەزىندە 1-مامىر مەرەكەسىنىڭ ۇرانى «بەيبىتشىلىك، ەڭبەك، مامىر» دەگەن سوزدەر بولۋى كەزدەيسوق ەمەس. ءبىز وسىنداي الاساپىران ۋاقىتتا ءومىر ءسۇرىپ جاتىرمىز، بەيبىتشىلىك تۋرالى ارماندار ءارقايسىمىزدىڭ جۇرەگىمىزدە دەپ ويلايمىن»، - دەدى ول.

الماتى قالاسى ق ح ا جانىنداعى انالار كەڭەسى ءتوراعاسىنىڭ ورىنباسارى زۋلفيا حۋسەينوۆا 1-مامىر – جالپى حالىقتىق بىرلىك كۇنى، قازاقستاننىڭ بارلىق ەتنوستارىنىڭ دوستىق جانە كەلىسىم مەرەكەسى ەكەنىن اتاپ ءوتتى.

«وسى مەرەكە پايدا بولعان جىلدار ىشىندە ءبىرقاتار ۇسىنىس جاسالدى. ول ءارتۇرلى ەتنوستاردىڭ وكىلدەرى اراسىندا مەرەكەنىڭ ءمانى مەن قۇندىلىعى تۋرالى ءبىرتۇتاس تۇسىنىك قالىپتاستىرۋ قاجەتتىلىگىنەن تۋىندادى. ۇلتشىلدىق پەن كسەنوفوبيانىڭ كورىنىسىنە قارسى كۇرەس. جاھاندانۋ جاعدايىندا بارلىق ەتنوستاردىڭ ءتىلى مەن مادەنيەتىن ساقتاۋ جانە ناسيحاتتاۋ. سونىمەن بىرگە ماڭىزدى جەتىستىكتەرگە قول جەتكىزىلدى. مەرەكە ءتۇرلى ۇلت وكىلدەرىن بىرىكتىرە وتىرىپ، قازاقستاندىق بىرەگەيلىكتىڭ نىشاندارىنىڭ بىرىنە اينالدى. ۇلتتىق تىلدەردى، مادەنيەتتى دامىتۋدى قولدايتىن ەتنومادەني ورتالىقتار قۇرىلدى- بۇل ءبىزدىڭ قازاقستان حالىقتارىنىڭ اسسامبلەياسى»، - دەپ تولىقتىردى زۋلفيا حۋسەينوۆا.