قازاقستان حالقىنا قورىنان اۋىل بالالارىنا جازعى لاگەرگە جولدامالار تاراتىلدى
استانا. KAZINFORM - «قازاقستان حالقىنا» قوعامدىق قورىنىڭ «QH جازدىق جولداما-2024» قايىرىمدىلىق جوباسى بويىنشا بۇگىن قازاقستاننىڭ بارلىق وڭىرىندە اۋىل مەكتەپتەرىنىڭ ديرەكتورلارىنا 5-8- سىنىپ وقۋشىلارعا ارنالعان جازعى دەمالىسقا سەرتيفيكاتتار تابىستالدى. اتالعان شارا 14-23- ناۋرىز ارالىعىندا ءوتىپ جاتقان «ناۋرىزناما» مەرەكەلىك ونكۇندىگى اياسىندا ۇيىمداستىرىلدى.
جازعى دەمالىسقا جولداما 10-14 جاس ارالىعىنداعى اۋىل مەكتەپتەرىندە وقۋدا، سپورتتا، شىعارماشىلىقتا جوعارى كورسەتكىشتەرگە قول جەتكىزگەن، مەكتەپ ومىرىنە بەلسەنە اتسالىسىپ جۇرگەن، از قامتىلعان، كوپ بالالى، الەۋمەتتىك وسال جانە باسقا دا ساناتتاعى وتباسىلاردان شىققان 20000 بالاعا بەرىلەدى.
سەرتيفيكاتتاردى سالتاناتتى تاپسىرۋ ءراسىمى كوركەمونەرپازداردىڭ قاتىسۋىمەن 2860 اۋىلدىق مەكتەپتە، سونداي-اق 1046 اۋىلدىق وكرۋگتەر مەن اۋدان اكىمدىكتەرىندە ءوتتى. جاقسىلىق مارافونىمەن جالپى سانى 3876 اۋىلدىق مەكتەپ قامتىلدى. قايىرىمدىلىق ءىس-شاراسى بالالار مەن اتا-انالار ءۇشىن جانە جەرگىلىكتى اتقارۋشى ورگانداردىڭ وكىلدەرى، جالپى جۇرتشىلىق ءۇشىن ناعىز مەرەكەگە اينالدى.
«بالالارعا بەرىلگەن جولدامانى كوكتەم مەيرامى قارساڭىندا جانە «ناۋرىزناما» باعدارلاماسى اياسىندا ءار اۋدان مەن مەكتەپتەردە تابىستاۋدى ۇيعاردىق. مۇنداي ءىس- شارالار ناۋرىز مەيرامىنىڭ وسكەلەڭ ۇرپاق ءۇشىن قۇندىلىقتارىن نىعايتۋعا، سونداي-اق قايىرىمدىلىق يدەيالارىن ناسيحاتتاۋعا ىقپال ەتەدى دەپ سانايمىز»، - دەدى «قازاقستان حالقىنا» قورى باسقارما ءتوراعاسىنىڭ ورىنباسارى ءلاززات شىڭعىسبايەۆا.
«جوبانىڭ سەرىكتەسى - وقۋ-اعارتۋ مينيسترلىگى. ۆەدومستۆو بالالاردىڭ جازعى دەمالىسىنىڭ باعدارلاماسىن، كريتەرييلەرىن، قىزمەت كورسەتۋشىلەردى ىرىكتەۋ مەن باقىلاۋ تەتىكتەرىن انىقتايدى. اۋىلدىق مەكتەپتەر وڭىردەگى ءبىلىم باسقارمالارىمەن بىرلەسىپ وقۋشىلار اراسىندا جازعى دەمالىسقا جولدامالاردى ىرىكتەۋ مەن ءبولۋدى قامتاماسىز ەتەدى.
اقپاراتتا ايتىلعانداي، «QH جازدىق جولداما-2024» قايىرىمدىلىق جوباسىنىڭ بيۋجەتى - 2,1 ميلليارد تەڭگە جوبا تەك اۋىلدىق جەرلەردەگى بالالار مەن جاس وسپىرىمدەرگە باعىتتالعان. وسكەلەڭ ۇرپاقتىڭ بويىندا شابىت پەن پاتريوتيزمدى ارتتىرىپ قانا قويماي، كوپمادەنيەتتى ورتادا قارىم-قاتىناس پەن ومىرلىك قاجەتتى داعدىلاردى نىعايتادى، سونداي-اق كاسىپتىك باعدارلاۋ مەن ولاردىڭ باسەكەگە قابىلەتتىلىگىن كۇشەيتۋ ەلەمەنتىنە اينالادى.
