قازاقستان حالقى وزگەلەردىڭ تەرىس ىقپالىنا تۇسپەيتىن ءوز يدەولوگيامىزعا سۇيەنۋى كەرەك - پرەزيدەنت

استانا. KAZINFORM - قازاقستان حالقى وزگەلەردىڭ تەرىس ىقپالىنا تۇسپەيتىن ءوز يدەولوگيامىزعا سۇيەنۋىكەرەك. بۇل تۋرالى مەملەكەت باسشىسى قاسىم-جومارت توقايەۆ «بىرلىك. جاسامپازدىق. ورلەۋ» تاقىرىبىمەن ءوتىپ جاتقان قازاقستان حالقى اسسامبلەياسىنىڭ كەزەكتى 33-سەسسياسىندا ايتتى.

«ازاماتتاردى الەۋمەتتىك ورتاعا كىرىكتىرۋ جۇيەسى وتانعا دەگەن سۇيىسپەنشىلىك يدەالدارىن ناسيحاتتاۋعا جانە حالقىمىزدىڭ مادەنيەتىن، ادەت- عۇرپى مەن سالت-ءداستۇرىن قۇرمەتتەۋگە نەگىزدەلۋى كەرەك دەپ سانايمىن. ەلگە قاجەتتى قۇندىلىقتار، كوزقاراستار مەن تۇسىنىكتەر قالىپتاستىرۋ جانە قوعامداعى تاتۋلىق پەن كەلىسىمدى نىعايتا ءتۇسۋ - اسا ماڭىزدى مىندەت. بۇل ماسەلەنى باقىلاۋسىز قالدىرۋعا بولمايدى. ونىڭ ءبارىن اسسامبلەيا دا، ورتالىق جانە جەرگىلىكتى مەملەكەتتىك ورگاندار دا ۇنەمى باقىلاۋدا ۇستاۋعا ءتيىس»، - دەدى قاسىم-جومارت توقايەۆ.

پرەزيدەنت بالالاردى ىرگەلى قۇندىلىقتارعا سۇيەنە وتىرىپ تاربيەلەۋگە باسا ءمان بەرۋ كەرەكتىگىن باسا ايتتى.

«وسكەلەڭ ۇرپاقتىڭ دۇنيەتانىمى تاريحقا قاتىستى وكپە-رەنىشتەن، دوگماتيزمنەن جانە مادەني ستەرەوتيپتەردەن ادا بولۋعا ءتيىس. جاستاردىڭ دۇنيەتانىمى وتكەندى، بۇگىندى جانە بولاشاقتى ءبىرتۇتاس ۇلتىمىزدىڭ ەش بولىنبەيتىن ورتاق مۇراسى رەتىندە ەموتسياسىز، ساياسي استارسىز شىنايى قابىلداۋعا نەگىزدەلۋى وتە ماڭىزدى. ءبىز، قازاقستان حالقى وزگەلەردىڭ تەرىس ىقپالىنا تۇسپەيتىن ءوز يدەولوگيامىزعا سۇيەنۋىمىز كەرەك. ءبىزدىڭ يدەولوگيامىزدىڭ تىرەگى - مەملەكەتىمىزدىڭ تاۋەلسىزدىگى. ەڭ باستىسى - دۇرىس سويلەپ، جاقسى نيەت ءبىلدىرۋ عانا ەمەس، ناقتى جۇمىس ىستەپ، يگىلىكتى ىسكە كۇن سايىن كۇش جۇمساۋ. وقىتۋ- تاربيەلەۋ ۇدەرىسىندە «ءبىز ءارتۇرلىمىز، ءبىراق ءبارىمىز تەڭبىز»، «قازاقستاننىڭ حالقى ءبىرتۇتاس» دەگەن قاعيداتتار كورىنىس تابۋعا ءتيىس»، - دەدى مەملەكەت باسشىسى.

اۆتور
مارلان جيەمباي