قازاقستان فۋتزال قاۋىمداستىعىنىڭ باس حاتشىسى تاعايىندالدى
استانا. KAZINFORM - قازاقستان فۋتزال قاۋىمداستىعى باس حاتشىسى تاعايىندالدى. بۇل قىزمەتكە ماقسات البەك ۇلى تيۋماليەۆ كەلدى.
م. تيۋماليەۆتىڭ فۋتزال مەن ۇلكەن فۋتبولدا تاجىريبەسى مول.
اتالعان قىزمەتتى بۇرىن اتقارعان داۋرەن نۇرعوجين فۋتزالدان قازاقستان ۇلتتىق قۇراماسىندا باس باپكەر پاۋلو ريكاردو فيگەيرانىڭ كومەكشىسى رەتىندە جۇمىسىن جالعاستىرادى.
ايتا كەتسەك، بۇگىن فۋتزالدان قازاقستان ۇلتتىق قۇراماسى 2026-جىلعى ەۋروپا چەمپيوناتىنىڭ ىرىكتەۋ كەزەڭىندەگى بەسىنشى ويىنىن البانياعا قارسى وتكىزەدى.
بۇل كەزدەسۋگە جاراقاتىنا بايلانىستى لەو يگيتا مەن دۋگلاس جۋنيور شاقىرىلعان جوق. تىزىمگە 16 ويىنشى ەنگىزىلگەن.
قازىرگە دەيىن ەل قۇراماسى ىرىكتەۋ كەزەڭىندە ءتورت ويىن وتكىزدى. الدىمەن البانيانى 2:0 ەسەبىمەن جەڭسە، ودان كەيىن ارمەنيامەن 4:4 ەسەبىمەن تەڭ وينادى. ءۇشىنشى كەزدەسۋىندە دانيادان 2:3 ەسەبىمەن جەڭىلىپ قالسا، ءوز الاڭىندا اتالعان قارسىلاسىن 7:3 ەسەبىمەن تىزە بۇكتىرگەن ەدى.
