قازاقستان فۋتبولدان تارتىستى ويىندا سلوۆەنياعا جول بەردى
فۋتبولدان 2024 - جىلعى ەۋروپا چەمپيوناتىنا ىرىكتەۋ ساتىسى سەگىزىنشى تۋرىنداعى سلوۆەنيا مەن قازاقستان كەزدەسۋىنىڭ ءبىرىنشى كەزەڭى اياقتالدى، دەپ حابارلايدى Kazinform.
قازاقستان قۇراماسىنان جاراقاتىنا بايلانىستى اسحات تاعىبەرگەن، باۋىرجان يسلامحان، ميحايل گابىشيەۆ، باحتيەر زاينۋتدينوۆ كەزدەسۋگە قاتىسا العان جوق.
باس باپكەر ماگومەد اديەۆ العاشقى مينۋتتان شاتسكي، ۆوروگوۆسكي، اليپ، ماروچكين، مالىي، بىستروۆ، ورازوۆ، قۋات، بەيسەبەكوۆ، چەسنوكوۆ، سامورودوۆقا سەنىم ارتتى.
العاشقى مينۋتتان سلوۆەنيالىق فۋتبولشىلاردىڭ باسىمدىعى بايقالىپ تۇردى. دەسە دە وعان قازاقستاندىق قۇراما لايىقتى قارسىلىق كورسەتە ءبىلدى.
ويىننىڭ 41-مينۋتىندا يگور شاتسكيدىڭ قاقپاسىنا بەلگىلەنگەن پەنالتيدەن سلوۆەنيالىق بەنيامين شەشكو ءمۇلت كەتكەن جوق.
ال 47-مينۋتتا رامازان ورازوۆ تارازى باسىن تەڭەستىردى. بۇدان كەيىن قازاقستاندىق فۋتبولشىلار بىرنەشە شابۋىل ۇيىمداستىردى.
ويىننىڭ 86-مينۋتىندا سلوۆەنيالىق بەنيامين ۆەربيچ قورىتىندى ەسەپتى بەلگىلەدى.
وسىلايشا قازاقستان قارسىلاسىنا 1:2 ەسەبىمەن ەسە جىبەردى. قۇرلىقتىق دودانىڭ فينالدىق ساتىسىنا سلوۆەنيا قۇراماسى جولداما الدى.
قۇرلىقتىق دودا ىرىكتەۋ ساتىسىندا قازاقستاندىق فۋتبولشىلار دانيا (3:2) مەن فينليانديا (1:0) قۇرامالارىن ءبىر مارتە تىزە بۇكتىرسە، سولتۇستىك يرلانديا (1:0، 1:0) مەن سان- مارينو (3:0، 3:1) قۇرامالارىن ەكى مارتە جەڭدى.
ال دانيا (1:3)، سلوۆەنيا (1:2)، فينلياندياعا (0:1) ەسە جىبەرىپ قويدى.
ەندى قازاقستان قۇراماسى ەۋروپا چەمپيوناتى فينالدىق ساتىسىنا ۇلتتار ليگاسى ارقىلى شىعۋىنا مۇمكىندىگى بار. بۇل جولى قازاقستاندىق فۋتبولشىلار 2024 -جىلدىڭ ناۋرىز ايىندا گرەكيامەن شەبەرلىك بايقاسادى.
قازاقستاندىق فۋتبولشىلار ەۋروپا چەمپيوناتى ىرىكتەۋ ساتىسىندا بەسىنشى مارتە باق سىناپ وتىر. 2008، 2012 -جىلداردا – 6، 2016، 2020 -جىلداردا - 5 - ورىن الدى.
قازىرگە دەيىن قۇرلىقتىق دودانىڭ فينالدىق ساتىسىنا فرانسيا، پورتۋگاليا، بەلگيا، يسپانيا، شوتلانديا، تۇركيا، انگليا، اۋستريا، ۆەنگريا، سلوۆاكيا، البانيا، دانيا، نيدەرلاند، شۆەيتساريا، رۋمىنيا، سەربيا قۇرامالارى شىقتى. ال گەرمانيا ۇيىمداستىرۋشى ەل رەتىندە ىرىكتەۋسىز قاتىسادى.
اۆتور
ءادىلجان ۇمبەت
