قازاقستان ETS كومپانياسىنىڭ ءبىلىمدى تەستىلەۋ تاجىريبەسىن زەردەلەۋگە مۇددەلى
استانا. KAZINFORM - قاسىم-جومارت توقايەۆ Educational Testing Service (ETS) كومپانياسىنىڭ پرەزيدەنتى جانە باس اتقارۋشى ديرەكتورى اميت سيەۆاكتى قابىلدادى، دەپ حابارلايدى اقوردانىڭ باسپا ءسوز قىزمەتى.
اڭگىمەلەسۋ بارىسىندا مەملەكەت باسشىسى ETS كومپانياسىنىڭ ءبىلىمدى تەستىلەۋ مەن باعالاۋ سالاسىندا كوش باستاپ كەلە جاتقانىنا ەرەكشە نازار اۋداردى.
پرەزيدەنتتىڭ ايتۋىنشا، قازاقستان ءبىلىم بەرۋ جۇيەسىندە كومپانيانىڭ تاجىريبەسىن زەردەلەۋ مەن پايدالانۋعا قىزىعۋشىلىق تانىتادى.
اميت سيەۆاك مەملەكەت باسشىسىنا كومپانيانىڭ حالىقارالىق جۇمىس جوسپارى تۋرالى مالىمەت بەردى.
ۇيىم جىلىنا الەمنىڭ 180 ەلىنە 50 ميلليوننان اسا تەست ازىرلەيدى ءارى اكىمشىلەندىرەدى، سونداي-اق ۇلتتىق ءبىلىم بەرۋ جۇيەسىنە ارنالعان بەيىندىك شەشىمدەردى ۇسىنادى.
وسىعان دەيىن مەملەكەت باسشىسى Goldman Sachs Global Institute كومپانياسىنىڭ جاھاندىق ماسەلەلەر بويىنشا پرەزيدەنتى دجارەد كوەنمەن كەزدەسۋ وتكىزگەنىن جازعان ەدىك.
