قازاقستان شەتەل ازاماتتارىنا ج س ن بەرۋدى قايتا باستايدى

استانا. KAZINFORM - ەلىمىز 18-ساۋىردەن باستاپ شەتەل ازاماتتارىنا جەكە سايكەستەندىرۋ ءنومىرىن (ج س ن) بەرۋدى قايتا باستايدى. پيلوتتىق جوباعا 100 ەلشىلىك پەن كونسۋلدىق قاتىسادى. بۇل تۋرالى ىشكى ىستەر مينيسترلىگى حابارلادى.

- زاڭناماعا سايكەس، شەتەلدىكتەر مەن ازاماتتىعى جوق ادامدارعا ج س ن رەسىمدەۋ قازاقستان اۋماعىندا ولار جەكە جۇگىنگەن كەزدە عانا جۇزەگە اسىرىلادى. ج س ن بەرۋ جۇمىستارىن بۇرىنعىداي ءى ءى م جۇرگىزەدى. ءبىراق بۇل قىزمەت شەتەل ازاماتتارى ءۇشىن س ءى م مەن ەلشىلىك عيماراتتارىندا دا قولجەتىمدى، - دەيدى ۆەدومستۆو وكىلدەرى.

ەلىمىزدە جەكە سايكەستەندىرۋ ءنومىرىن الا الاتىن شەتەلدىكتەردىڭ ءتىزىمى تومەندەگىدەي:

الەۋەتتى ينۆەستورلار؛

تاۋارلاردى تاڭبالاۋ جانە قاداعالاپ وتىرۋ جۇيەسىنە قاتىسۋشىلار؛

قازاقستان ازاماتتارىنىڭ جۇبايى بولاتىن شەتەل ازاماتتارى (ا ح ا ت اقپاراتتىق جۇيەسىندە ازاماتتىق حال اكتىلەرىن تىركەۋ تۋرالى بەلگى قويۋ ءۇشىن)؛

اتا-اناسىنىڭ ءبىرى قازاقستان ازاماتى بولعان جاعدايدا، 16 جاسقا تولماعان شەتەلدىك بالالار؛

قازاقستاندا مۇراگەرلىك قۇقىعىن يەلەنەتىن شەتەل ازاماتتارى؛

Digital Nomad Residence جانە Digital Nomad Visa باعدارلامالارىنىڭ الەۋەتتى قاتىسۋشىلارى؛

مۇمكىندىگى شەكتەۋلى شەتەل ازاماتتارى؛

65 جاستان اسقان شەتەلدىكتەر؛

وسىمدىكتەردى قورعاۋ قۇرالدارىن (پەستيتسيدتەردى) وندىرۋشىلەر مەن تىركەۋشىلەر؛

قازاقستاندا تىركەلگەن زاڭدى تۇلعالاردىڭ، فيليالداردىڭ جانە (نەمەسە) وكىلدىكتەردىڭ باسشىلارى.

ايتا كەتەيىك، ج س ن الۋ ءۇشىن ءوتىنىشىڭىزدى، جەكە باسىڭىزدى كۋالاندىراتىن قۇجاتتىڭ كوشىرمەسى مەن ءتۇپنۇسقاسىن جاۋاپتى مەكەمەگە الىپ بارۋىڭىز كەرەك.

بۇعان دەيىن رەسەي ازاماتتارىنا بەرىلگەن ج س ن- ءنىڭ ءبىر بولىگى ءراسىمدى بۇزا وتىرىپ راسىمدەلگەنى حابارلانعان ەدى. ودان بولەك، بورىشكەرلەر مەن لۋدومانداردى ج س ن ارقىلى انىقتاۋ تەتىگى ەنگىزىلۋى مۇمكىن.