قازاقستان ءوزىنىڭ ەنەرگەتيكالىق رەسۋرستارىن ەكسپورتتاۋ باعىتتارىن ءارتاراپتاندىرۋدى كوزدەيدى - توقايەۆ

نيۋ-يورك. KAZINFORM - مەملەكەت باسشىسى قازاقستاننىڭ وڭىردەگى ەكونوميكاسى ەڭ قۋاتتى ەل رەتىندە ورتالىق ازياعا امەريكا بيزنەسىنىڭ ينۆەستيتسياسىن تارتۋ جانە ولاردىڭ كاسىپ اياسىن كەڭەيتۋ ىسىندە جەتەكشى ءرول اتقارۋعا دايىن ەكەنىن جەتكىزدى، دەپ حابارلايدى اقوردانىڭ باسپا ءسوز قىزمەتى.

بۇل باعىتتاعى كۇش- جىگەرگە س5+ جانە B5+ فورماتىنداعى تۇراقتى ىنتىماقتاستىق تىڭ سەرپىن بەرە الادى. پرەزيدەنت دوڭگەلەك ۇستەل قاتىسۋشىلارىنا ەلىمىزدە جۇزەگە اسىرىلىپ جاتقان ەكونوميكالىق جانە ساياسي رەفورمالار تۋرالى مالىمەت بەردى.

- قازاقستان ءبىلىم مەن يننوۆاتسياعا ارقا سۇيەگەن ەكونوميكا قۇرۋدى ماقسات ەتەدى. بۇل رەتتە سيفرلىق ترانسفورماتسياعا باسا ءمان بەرىلەدى. ەلىمىزدىڭ ەكونوميكاسى ءوڭىردىڭ وركەندەۋىندە نەگىزگى ءرول اتقارادى. قازاقستاننىڭ مۇنداي بيىكتى باعىندىرۋىنا امەريكا بيزنەسى ايتارلىقتاي ۇلەس قوستى. بيىلعى سەگىز ايدىڭ قورىتىندىسى بويىنشا ەلىمىزدىڭ ەكونوميكالىق ءوسىمى 6,5 پايىزدى قۇرادى. ءبىز دامۋدىڭ جوعارى قارقىنىن ساقتاي وتىرىپ، اۋقىمدى ساياسي-ەكونوميكالىق رەفورمالار جۇرگىزۋگە نيەتتىمىز، - دەدى قاسىم-جومارت توقايەۆ.

مەملەكەت باسشىسى جۇزەگە اسىرىلىپ جاتقان جۇمىستىڭ بارلىعى قازاقستاننىڭ تىكەلەي شەتەل ينۆەستيتسياسىنا تارتىمدىلىعىن ارتتىرۋدى كوزدەيتىنىن ايتتى. سونىمەن قاتار قازاقستان مەن ا ق ش اراسىنداعى ەكونوميكالىق جانە ينۆەستيتسيالىق ىقپالداستىقتىڭ نەگىزگى باعىتتارىنا توقتالدى. قاسىم-جومارت توقايەۆ بۇرىننان ەكىجاقتى ىنتىماقتاستىقتىڭ نەگىزى سانالاتىن ەنەرگەتيكا سەكتورىن العاشقى باسىمدىق رەتىندە اتادى.

- Chevron جانە ExxonMobil كومپانيالارىنىڭ سوڭعى 30 جىلدا ەلىمىزگە قوماقتى ءارى تابىستى ينۆەستيتسيا سالعانىن مويىندايمىز جانە جوعارى باعالايمىز. ايماقتاعى گەوساياسي دۇربەلەڭدەرگە قاراماستان، ولاردىڭ ەلىمىزدەگى قىزمەتىنە قاتىستى ەشقاشان كۇمان تۋعان ەمەس. ەلىمىزدىڭ ەكونوميكاسىن جاڭعىرتۋدا، وزىق تەحنولوگيالار ەنگىزۋدە، ەكونوميكالىق الەۋەتىمىزدىڭ ورنىقتىلىعى مەن قۋاتىن ارتتىرۋدا سىزدەردىڭ قازاقستانداعى قىزمەتتەرىڭىزدىڭ جاعىمدى اسەرى بولدى. ءبىز تەڭىز، قاشاعان جانە قاراشىعاناق مۇناي كەن ورىندارىنداعى امەريكالىق سەرىكتەستەرىمىزبەن كونسترۋكتيۆتى ىنتىماقتاستىقتى ودان ءارى جالعاستىرامىز. ءوزارا سەرىكتەستىگىمىز الداعى ۋاقىتتا ءدا ادىل ءارى ەكى تاراپقا ءتيىمدى ناتيجە اكەلگەنىن قالايمىز. قازاقستان ءوزىنىڭ ەنەرگەتيكالىق رەسۋرستارىن ەكسپورتتاۋ باعىتتارىن ءارتاراپتاندىرۋدى كوزدەيدى، -دەدى قاسىم-جومارت توقايەۆ.

ايتا كەتەيىك، بۇدان بۇرىن پرەزيدەنت امەريكانىڭ بيزنەس وكىلدەرىمەن وتكەن «دوڭگەلەك ۇستەل» وتىرىسىندا ءسوز سويلەگەنىن جازعان ەدىك.