قازاقستان ءبىرقاتار ەلمەن اۆتوكولىكپەن جۇك تاسىمالداۋ سالاسىندا كەلىسىم جاسايدى
ەلىمىزگە حالىقارالىق جۇك تاسىمالىندا جۇمىس ىستەيتىن ءىرى وپەراتورلاردىڭ وكىلدىكتەرى تارتىلادى. بۇل تۋرالى ۇكىمەت وتىرىسىندا كولىك ۆيتسە-ءمينيسترى ءساتجان ابلاليەۆ ايتتى، دەپ حابارلايدى Kazinform.
«وتاندىق تاسىمالداۋشىلاردىڭ باسەكەلەستىككە قابلەتتىگىن ارتتىرۋدىڭ بىردەن-ءبىر تەتىگى ول - اۆتوكولىك قۇرالدارىنىڭ جەتكىلىكتى دەڭگەيدە بولۋى. الداعى جىلدارى كولىك پاركىن 2 ەسەگە ۇلعايتۋ ءۇشىن تومەندەگىدەي شارالاردى قابىلداۋ جوسپارلانىپ وتىر. ولار: ەلىمىزگە حالىقارالىق تاسىمالدا جۇمىس ىستەيتىن ءىرى وپەراتورلار وكىلدىكتەرىن تارتۋ، حالىقارالىق تاسىمالداۋ ءۇشىن اۆتوكولىك ساتىپ الۋعا جەڭىلدەتىلگەن جاعدايلار جاساۋ، تارتقىش كولىكتەردىڭ وتاندىق ءوندىرىسىن دامىتۋ، اراب امىرلىكتەرىمەن، دانيامەن، ماكەدونيامەن جانە پورتۋگاليامەن اۆتوتاسىمالداۋ سالاسىندا ۇكىمەتارالىق كەلىسىمدەر جاساسۋ»، - دەدى ءساتجان ابلاليەۆ.
ونىڭ اتاپ وتۋىنشە، اراب امىرلىكتەرمەن كەلىسىمگە وتىرۋ وتاندىق تاسىمالداۋشىلار ءۇشىن پارسى شىعاناعى پورتتارىنا، ءۇندىستان، پاكىستان جانە باسقا دا ەلدەردىڭ جۇك نارىعىنا شىعۋدى قامتاماسىز ەتەدى.
«سونداي-اق، شەتەلدىك رۇقسات بلانكىلەرىن تاراتۋدىڭ اۆتوماتتاندىرىلعان جۇيەسىن ەنگىزۋ ارقىلى ادال باسەكەلەستىككە جاعداي جاسالادى»، - دەدى ول.
