قازاقستان عالىمدارى 3 جىلدا 81 حالىقارالىق پاتەنت العان
استانا. KAZINFORM - قازاقستاندىقتاردىڭ ونەرتابىستاعى بەلسەندىلىك كوەففيتسەنتى 45,77-گە جەتكەن. بۇل تۋرالى عىلىم جانە جوعارى ءبىلىم مينيسترلىگى Kazinform ساۋالىنا جولداعان جاۋابىندا ايتىلعان.
«ستاتيستيكادا ەلدىڭ ونەرتاپقىشتىق بەلسەندىلىك كوەففيتسيەنتى پاتەنتتەۋ ۆەدومستۆوسىنا بەرىلگەن وتىنىمدەردىڭ 1 ميلليون ادامعا شاققانداعى سانى ارقىلى ايقىندالادى»، - دەپ جازىلعان مينيسترلىكتىڭ تۇسىندىرمەسىندە.
ۇلتتىق زياتكەرلىك مەنشىك ينستيتۋتىنىڭ مالىمەتى بويىنشا، بۇل كوەففيتسيەنت 2021 -جىلى - 41,28، 2022 -جىلى - 42,39، 2023 -جىلى - 45,77 بولعان.
«ۇلتتىق زياتكەرلىك مەنشىك ينستيتۋتىنىڭ جىلدىق ەسەبىنە سايكەس، Patent Cooperation Treaty ءتارتىبى بويىنشا حالىقارالىق پاتەنتكە 2021 -جىلى 31 ءوتىنىم، 2022 -جىلى - 24 ءوتىنىم، 2023 -جىلى - 26 ءوتىنىم بەرىلدى. ەۋرازيالىق پاتەنتتىك كونۆەنتسيا ءتارتىبى بويىنشا 2021 -جىلى - 81 ءوتىنىم، 2022 -جىلى - 78 ءوتىنىم، 2023 -جىلى - 103 ءوتىنىم بەرىلدى»، - دەلىنگەن جاۋاپتا.
ايتا كەتۋ كەرەك، Patent Cooperation Treaty ءراسىمى بويىنشا ءبىر حالىقارالىق ءوتىنىم بەرۋ ارقىلى ءوتىنىم بەرۋشى دۇنيە ءجۇزىنىڭ كوپتەگەن ەلدەرىندە ءوز ونەرتابىستارىن قورعاۋدى قامتاماسىز ەتە الادى.
ال ەۋرازيالىق پاتەنتتىك كونۆەنتسيا جەكە جانە زاڭدى تۇلعالارعا وزدەرىنىڭ ونەرتابىستارى مەن ونەركاسىپتىك ۇلگىلەرىنە يەلىك ەتۋ قۇقىعىن ءبىرتۇتاس ەۋرازيالىق پاتەنت نەگىزىندە قورعاۋعا مۇمكىندىك بەرەدى.
جالپى قازاقستاننىڭ ونەركاسىپتىك مەنشىك وبەكتىلەرىنە 2021 -جىلى 12761 قورعاۋ قۇجاتى، 2022 -جىلى 12099 قۇجات، 2023 -جىلى 13270 قۇجات بەرىلگەن.
اۆتور
ەسىمجان ناقتىباي
