قازاقستان بيىلعى استىقتىڭ 6 ميلليون تونناسىن ەكسپورتتايدى

اۋىل شارۋاشىلىعى ۆيتسە-ءمينيسترى ازات سۇلتانوۆ استىق ەكسپورتىنا قاتىستى تۇسىنىك بەردى، دەپ حابارلايدى Kazinform.

بۇگىن سەنات كوميتەتىنىڭ كەڭەيتىلگەن وتىرىسىنان كەيىن تىلشىلەر ۆيتسە-مينيستردەن بيىل جينالعان استىقتىڭ قاي بولىگى ەكسپورتقا شىعارىلاتىنىن سۇرادى.

«بيىل 15,5 ميلليون توننا استىق جينالۋى مۇمكىن ەكەنىن ايتقان ەدىك. قازىر اكىمدىكتەردىڭ مالىمەتى بويىنشا 16,5 ميلليون توننا قامباعا ءتۇستى. سوندىقتان وسى استىق كولەمىن ەسكەرە وتىرىپ، ەكسپورتقا 6 ميلليون توننا شاماسىندا ءونىم شىعارۋعا مۇمكىندىك بولادى»، - دەدى ازات سۇلتانوۆ.

بۇدان بۇرىن حابارلانعانداي، بيىل قازان ايىنىڭ سوڭىنداعى مالىمەت بويىنشا قازاقستاندا 16 ميلليون تونناعا جۋىق استىق باستىرىلدى.

جۋىردا اۋىل شارۋاشىلىعى ءمينيسترى ايداربەك ساپاروۆ بيىل جينالعان استىق كولەمى ءبىرشاما از بولعاندىقتان، ەكسپورتقا شىعارىلاتىن استىق كولەمى ازاياتىنىن ايتقان ەدى. «ياعني 5 ميلليون توننادان ارتىق بولمايدى دەپ ويلايمىز»، - دەگەن ەدى ۆەدومستۆو باسشىسى.