قازاقستان بىرنەشە ەلمەن ۆيزاسىز رەجيمدى تالقىلاپ جاتىر
استانا. KAZINFORM – ق ر سىرتقى ىستەر مينيسترلىگى ۆيزاسىز رەجيمدى ەنگىزۋگە قاتىستى بىرنەشە ەلمەن كەلىسسوزدى جالعاستىرىپ جاتقانىن مالىمدەدى.
قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆتىڭ ايتۋىنشا، قازىر ەلىمىز ۆيزاسىز رەجيم بويىنشا بىرنەشە ەلمەن كەلىسسوز جۇرگىزىپ جاتىر.
مينيسترلىكتەگى اپتالىق باسپا ءسوز ءماسليحاتىندا تىلشىلەر نەشە ەلمەن بۇل تاقىرىپ تالقىلانىپ جاتقانىن سۇرادى. بۇل تۇرعىدا ول كەلىسسوز 5 تەن استام مەملەكەتپەن ءجۇرىپ جاتقانىن ايتتى.
«مەنىڭ ويىمشا، الداعى ۋاقىتتا بۇل باعىتتاعى جۇمىستاردا ىلگەرىلەۋ بولادى. كەيىنگى 2-3 جىلدا بىرنەشە ەلمەن ۆيزاسىز تارتىپكە قول قويدىق»، - دەدى ا. سمادياروۆ.
ەسكە سالساق، بيىل ناۋرىز ايىندا قازاقستان مەن كيپر سىرتقى ىستەر مينيسترلەرى ۆيزاسىز رەجيمدى ەنگىزۋدى، سونداي- اق ەكى ەل اراسىنداعى تىكەلەي اۋە قاتىناسىنىڭ پەرسپەكتيۆالارىن تالقىلادى.
