قازاقستان برازيلياعا بورتتىق وزدىگىنەن جازعىشتاردى جىبەرەدى
استانا. KAZINFORM - چيكاگو كونۆەنتسياسىنىڭ 13 قوسىمشاسىنا سايكەس تەرگەۋ جۇرگىزەتىن مەملەكەت بورتتىق وزدىگىنەن جازعىش دەرەكتەرىن وقۋدى قامتاماسىز ەتەدى جانە ولاردى قاي ەلدە تاراتىپ جازۋ تۋرالى شەشىم قابىلدايدى. بۇل تۋرالى ق ر كولىك مينيسترلىگى حابارلادى.
قازاقستان بۇل كونۆەنتسيانى 1992 -جىلى راتيفيكاتسيالادى جانە حالىقارالىق ازاماتتىق اۆياتسيا ۇيىمىنىڭ (ي ك ا و) مۇشەسى بولىپ تابىلادى.
جوعارىدا اتالعان قۇجاتتىڭ نەگىزىندە، سونداي-اق يكاو ۇسىنىمدارىن ەسكەرە جانە ازەربايجان مەن رەسەيدىڭ اۆياتسيالىق بيلىك وكىلدەرىمەن كەڭەسە وتىرىپ، ق ر كولىك ءمينيسترى مارات قارابايەۆ باسقاراتىن اۆياتسيالىق وقيعانى تەرگەۋ جونىندەگى كوميسسيا بورتتىق وزدىگىنەن جازعىشتاردى (قارا جاشىكتەردى) Embraer اۋە كەمەسىن شىعارۋشى برازيليانىڭ اۆياتسيالىق وقيعالاردى تەرگەۋ جانە الدىن الۋ ورتالىعىنا (CENIPA) جىبەرۋ تۋرالى شەشىم قابىلدادى.
CENIPA ورتالىعىندا قاجەتتى تەحنيكالىق مۇمكىندىكتەر قاراستىرىلعان، ءتيىستى قۇرالدارمەن جابدىقتالعان جانە ولاردى وقۋ ءۇشىن سەرتيفيكاتتالعان زەرتحانا بار.
بۇل ماسەلە مەملەكەت باسشىسىنىڭ جەكە باقىلاۋىندا.
ەسكە سالا كەتەيىك، 25 - جەلتوقساندا اقتاۋ ماڭىندا Azerbaijan Airlines ۇشاعى اپاتقا ۇشىرادى.
ۇشاق بورتىندا 67 ادام، ونىڭ ىشىندە بەس ەكيپاج مۇشەسى بولعان. وقيعا سالدارىنان 38 جولاۋشى قازا تاپتى. وكىنىشكە قاراي، مەرت بولعان جانداردىڭ اراسىندا 6 قازاقستان ازاماتى بار.
پرەزيدەنت ۇشاق اپاتىنان زارداپ شەككەندەرگە كومەك كورسەتۋدى ەرەكشە باقىلاۋدا ۇستاۋدى تاپسىردى.
