قازاقستان بەنزين مەن ديزەل وتىنى ەكسپورتىنا تىيىمدى ۇزارتپاق
استانا. KAZINFORM - قازاقستاندا مۇناي ونىمدەرىن شىعارۋعا سالىنعان تىيىمدى التى ايعا ۇزارتۋ ۇسىنىلدى.
ەنەرگەتيكا، قارجى، ىشكى ىستەر مينيسترلىكتەرى جانە ۇ ق ك ازىرلەگەن بۇيرىق جوباسى «اشىق ن ق ا» پورتالىندا جاريالاندى. قۇجات 14-ناۋرىزعا دەيىن قوعامدىق تالقىدا بولادى.
بۇل ءىس-شارا مۇناي ونىمدەرىنىڭ ەكسپورتىن باقىلاۋدى كۇشەيتۋگە جانە رەسەي الدىندا وتىننىڭ رەكسپورتىنا تىيىم سالۋ جونىندەگى مىندەتتەردى ورىنداۋعا باعىتتالعان.
قۇجاتتا ەلدە اي-92 ماركالى بەنزين مەن ديزەل وتىنىن تۇتىنۋ كولەمى شامادان تىس ارتقانى ايتىلادى.
«قۇقىق قورعاۋ ورگاندارى مالىمەتىنشە، اي سايىن «كولەڭكەلى» ەكسپورت پەن مۇناي ونىمدەرىن شىعارۋ كولەمى 10-45 مىڭ تونناعا جەتەدى. بۇل قازاقستانداعى مۇناي ونىمدەرى باعاسى كورشى ەلدەرمەن سالىستىرعاندا 17-166 پايىزعا تومەن بولۋىنا بايلانىستى. بۇدان بولەك مۇناي جانە مۇناي ونىمدەرىن جەتكىزۋ جونىندەگى كەلىسىم اياسىندا قازاقستان رەسپۋبليكاسى باجسىز جەتكىزۋ شارتتارىمەن مۇناي ونىمدەرىن يمپورتتاۋعا ءماجبۇر. سوندىقتان رەسەي تاراپىنىڭ ە ا ە و اۋماعىنان تىس جەرلەرگە مۇناي ونىمدەرىن رەەكسپورتتاۋعا تىيىم سالۋ تالابىن ەسكەرۋ قاجەت. وسىلايشا مۇناي ونىمدەرىن ەاەو شەگىنەن تىس جەرلەرگە شىعارۋدى باقىلاۋدى كۇشەيتۋ قاجەت»، - دەپ جازىلعان بۇيرىق جوباسىندا.
ايتا كەتەيىك، بۇعان دەيىن مۇناي ونىمدەرىن ەلدەن شىعارۋعا 2024-جىلعى 29-قىركۇيەكتەن 2025-جىلعى 29-ناۋرىزعا دەيىن تىيىم سالىنعان ەدى.
