قازاقستان ازاماتتىعىن الاتىن شەتەلدىكتەر قازاق ءتىلىن بىلۋگە مىندەتتى بولادى

استانا. KAZINFORM - بۇگىن ءماجىلىستىڭ جالپى وتىرىسىندا كوشى-قونى سالاسىنداعى زاڭنامانى جەتىلدىرۋگە ارنالعان زاڭ قارالدى. ونىڭ اياسىندا ەندى قازاقستان رەسپۋبليكاسىنىڭ ازاماتتىعىن العىسى كەلەتىن شەتەلدىكتەر قازاق ءتىلىن بىلۋگە مىندەتتى بولادى.

بۇل تۋرالى Jibek Joly تەلەارناسىنىڭ ماجىلىستەگى موبيلدى ستۋدياسىندا دەپۋتات جارقىنبەك امانتاي ۇلى ايتتى.

«ەندى قازاقستان ازاماتتىعىن العىسى كەلەتىن ازاماتتار ءوتىنىش بەرۋ ءۇشىن ەڭ الدىمەن قازاق ءتىلىن ءبىلۋى شارت. كەمىندە اۋىزەكى دەڭگەيدە مەڭگەرۋى كەرەك. ەكىنشى ماسەلە - قازاقستان اتا زاڭىنىڭ نەگىزدەرىن ءبىلۋى ءتيىس. مۇنىمەن قوسا، قازاقستان تاريحىنىڭ وزەگىن، نەگىزىن ءبىلۋى كەرەك. قۇجات اياسىندا وسىنداي تالاپتار ەنىپ وتىر، ياعني الەمدە بار تاجىريبە. جالپى، وسى تالاپ كوپتىڭ كوكەيىندە كوپتەن ايتىلىپ جۇرگەن ماسەلە»، - دەدى جارقىنبەك امانتاي ۇلى.

ايتا كەتەيىك، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ كوشى-قونى سالاسىنداعى زاڭنامانى جەتىلدىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ ەكىنشى وقىلىمدا قارالىپ، قابىلداندى.

زاڭ حالىقتىڭ كوشى-قونى سالاسىنداعى قاتىناستاردى قۇقىقتىق رەتتەۋدى جەتىلدىرۋ ماقساتىندا ازىرلەندى جانە ءبىرقاتار نورمالاردى قازاقستان رەسپۋبليكاسىنىڭ قولدانىستاعى زاڭناماسىنا سايكەس كەلتىرۋگە باعىتتالعان.

ءماجىلىستىڭ زاڭناما جانە سوت-قۇقىقتىق رەفورما كوميتەتىنىڭ مالىمەتىنە قاراعاندا، ەكسترەميستىك نەمەسە تەرروريستىك ارەكەتكە قاتىسى بار شەتەلدىكتەردىڭ ەلگە كىرۋىنە تىيىم سالۋ، توتەنشە جاعدايلاردا قولدانىلۋ مەرزىمى وتكەن قۇجاتتاردى پايدالانۋ ماسەلەسىن رەتتەۋ ەسكەرىلگەن. تۇزەتۋلەردە توتەنشە جاعدايلار كەزىندە مەرزىمى ءوتىپ كەتكەن قۇجاتتاردى ۇزارتۋ نەمەسە اۋىستىرۋ مۇمكىندىگى بولماعان جاعدايدا پايدالانۋ ماسەلەسى ناقتىلاندى. مۇنداي قۇجاتتار قولدانۋ مەرزىمىنە قاراماستان جارامدى دەپ تانىلادى. سونىمەن قاتار اتالعان زاڭ اياسىندا پەدوفيلدەرگە قازاقستانعا كىرۋگە تىيىم سالىنادى.