قازاقستان ايماقتارىندا التىن قۇنى قانشا تۇرادى
استانا. KAZINFORM - قازاقستاندىقتار اراسىندا، سونىڭ ىشىندە مەرەكەدە التىن بۇيىمدارعا سۇرانىس جوعارى بولادى. Kazinform اگەنتتىگىنىڭ ءتىلشىسى ءبىر گرام التىن قۇنى قازىر قانشا تۇراتىنىن انىقتاپ ءبىلدى.
جىل وتكەن سايىن باعالى مەتال قۇنى قىمباتتاپ كەلەدى. ۇلتتىق ستاتيستيكا بيۋروسىنىڭ دەرەكتەرىنە سۇيەنسەك، 2024 -جىلى التىن بۇيىمدار باعاسى %8,3 ءوستى. الەم نارىعىندا دا باعالى مەتال قۇنى كوتەرىلگەن.
قازىرگى كەزدە قازاقستان ايماقتارىندا باعا گرامىنا 20000 مەن 80000 تەڭگە ارالىعىندا. ءبىز بۇل جولى 585 جانە 583 سىناماسىنىڭ قۇنىن بىلدىك.
ەلىمىز بويىنشا ەڭ قىمباتى اتىراۋدا بولىپ شىقتى. مۇندا 585 سىناماسىنداعى التىننىڭ گرامى 80 مىڭ تەڭگەگە دەيىن جەتەدى. ال ەڭ ارزانى شىمكەنت قالاسىندا بولىپ شىقتى. التىن بۇيىمنىڭ گرامى مۇندا 20000 -25000 تەڭگە تۇرادى.
قاراعاندى، ورال، كوكشەتاۋ، قىزىلوردا مەن تارازدا 585 سىناماسىنداعى التىن گرامىنىڭ باعاسى 30000 تەڭگەدەن باستالىپ، 50000 تەڭگەگە دەيىن جەتەدى.
ال الماتى، جەزقازعان، اقتاۋ، اقتوبە، پاۆلودار، پەتروپاۆل، قوستاناي، وسكەمەن، تالدىقورعان، قونايەۆ جانە تۇركىستاندا باعا ءسال جوعارى. مۇندا ءبىر گرامم التىن 33000 تەڭگەدەن باستالىپ، 50000 تەڭگەگە دەيىن جەتەدى.
استانا، اتىراۋ جانە سەمەيدە باعا وزگەلەرگە قاراعاندا جوعارى. باعالى مەتالل گرامى بۇل قالالاردا 40000 تەڭگەدەن باستالىپ، 80000 تەڭگەگە دەيىن جەتەدى.
سونىمەن بىرگە ساۋدا ورىندارىنان ءالى دە 583 سىناماسىنداعى التىن بۇيىمداردى كەزدەستىرۋگە بولادى. بۇل اشەكەيلەردەگى التىن گرامىنىڭ باعاسى 17000 مىڭنان باستالىپ، 44000 تەڭگەگە دەيىن جەتەدى.
سىناماسى 583 بولاتىن التىننىڭ گرامى شىمكەنتتە 17000 تەڭگە تۇرادى. ال تارازدا 43000 تەڭگە دەپ كورسەتىلگەن. قازاقستاننىڭ وزگە قالالارىندا باعا 20000 - 35000 تەڭگە تەڭگە ارالىعىندا.
ايتا كەتەيىك 2024-جىلى التىن قۇيمالار كوپ ساتىلعان وڭىرلەر: الماتى (32735 دانا، %69)، شىمكەنت (5200 دانا، %11) جانە قاراعاندى (2209 دانا، %5).
