قازاقستان استىق وتكىزەتىن ءداستۇرلى نارىقتاردى ساقتاپ قالۋى ءتيىس - سەنات ءتوراعاسى
استانا. KAZINFORM - ازىق-تۇلىك تاۋارلارىنىڭ يمپورتىنا تاۋەلدىلىك دەڭگەيىن دە كەزەڭ-كەزەڭمەن ازايتۋىمىز كەرەك.
بۇل تۋرالى ەلوردادا «ازىق-تۇلىك قاۋىپسىزدىگى - ۇلتتىق قاۋىپسىزدىكتىڭ نەگىزگى قۇرامداس بولىگى» تاقىرىبىندا ءوتىپ جاتقان پارلامەنتتىك تىڭداۋدا سەنات ءتوراعاسى ماۋلەن اشىمبايەۆ ءمالىم ەتتى.
- سونىمەن قاتار، ونىمدەردى وتكىزۋ نارىقتارىن قامتاماسىز ەتۋ دە وزەكتى سۇراقتاردىڭ ءبىرى. ءونىم شىعارۋ بولەك جۇمىس بولسا، ونى ساتۋ - باسقا ماسەلە. مىسالى، كەيىنگى 2 جىلدا ءبيدايدىڭ الەمدىك باعاسى تومەندەدى. بۇل ءبىزدىڭ وندىرۋشىلەرىمىز ءۇشىن قيىن جاعداي تۋعىزعانى جاسىرىن ەمەس. بۇدان باسقا، ءبىزدىڭ ءداستۇرلى نارىقتارىمىزعا باسەكەلەستىكتىڭ كۇشەيگەنىن دە كورىپ وتىرمىز. سوندىقتان ورتالىق ازيا، اۋعانستان، يران، كاۆكاز سياقتى ءداستۇرلى نارىقتارداعى پوزيتسيامىزدى ساقتاپ، ونى ودان ءارى نىعايتۋ ازا ماڭىزدى. بۇل ەلدەرگە وڭدەلگەن ونىمدەردىڭ دە ەكسپورتىن ارتتىرعان ابزال، - دەدى ماۋلەن اشىمبايەۆ.
سونىمەن قاتار ول ازىق-تۇلىك قاۋىپسىزدىگىن قامتامىز ەتۋ ءۇشىن اگروعىلىمدى دامىتۋ دا وزەكتى ماسەلە ەكەنىن اتاپ ءوتتى.
- مۇنىمەن قوسا، ەلىمىزدە ورگانيكالىق ونىمدەردى وندىرەتىن كولەمدى كوبەيتۋ دە نەگىزگى ماقساتتاردىڭ ءبىرى. الدىمىزدا اۋىل شارۋاشىلىعىن دامىتۋعا قاتىستى اۋقىمدى مىندەتتەر تۇر. ازىق-تۇلىك تاۋارلارىنىڭ يمپورتىنا تاۋەلدىلىك دەڭگەيىن دە كەزەڭ-كەزەڭمەن ازايتۋىمىز كەرەك، - دەدى سەنات ءتوراعاسى.
بۇدان بۇرىن حابارلانعانداي، م. اشىمبايەۆ اۋىل شارۋاشىلىعىندا ەسكى تاسىلدەرمەن ونىمدىلىكتى ارتتىرۋ مۇمكىن ەمەس ەكەنىن اتاپ ءوتتى.
