قازاقستان استىق ەكسپورتتايتىن نارىقتارىن ساقتاپ قالا الا ما

ىشكى نارىقتا استىق تاپشىلىعى بولمايدى. بۇل تۋرالى اۋىل شارۋاشىلىعى ۆيتسە-ءمينيسترى ءابىلحايىر تامابەك ءمالىم ەتتى، دەپ حابارلايدى قازاقپارات ءتىلشىسى.

«بيىل استىق تاپشىلىعى بولمايدى. بىلتىر 1- قىركۇيەكتەگى جاعداي بويىنشا 2,5 ميلليون توننا استىق باستىرىلسا، بيىل 1- قىركۇيەكتە 5 ميلليون توننادان استام جينالدى. ەلىمىزدىڭ ىشكى نارىعىنا 6-7 ميلليون توننا استىق كەرەك. وسىدان ارتىلعانى ەكسپورتقا وتكىزىلەدى»، - دەدى ءا. تامابەك پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.

ۆيتسە-ءمينيستردىڭ ايتۋىنشا، بىلتىر ۇن مەن استىقتى قوسا ەسەپتەگەندە شامامەن 13 ميلليون توننا ەكسپورتتالعان.

«بيىل ونىمدىلىك تومەندەۋى مۇمكىن. الايدا استىق جيناۋ ناۋقانى اياقتالعاننان كەيىن عانا ناقتى كولەم بەلگىلى بولادى. بىلتىر تۋرا وسى كەزەڭدە 11,6 ميلليون توننا استىق جينالسا، بيىل 6,6 ملن توننا عانا باستىرىلدى، ياعني جاۋىن- شاشىنعا بايلانىستى 40 پايىزى باستىرىلدى. 2022 -جىلى وسى ۋاقىتتا 73 پايىزى ورىلعان ەدى. ءتيىستى كوميسسيا جۇمىسىن اياقتاعاننان كەيىن ناقتى كورسەتكىشتەر جاريالانادى. سەبەبى قايتا كوكتەپ كەتكەن استىق القاپتارى بۇدان دا كوپ بولۋى ىقتيمال»، - دەدى سپيكەر.

ا ش م وكىلىنىڭ پايىمىنشا، ەكسپورت كولەمى ازايسا، استىق وتكىزۋ نارىعىن جوعالتىپ الۋ قاۋپى بار.

«سەبەبى ءبىزدىڭ ءونىمدى تۇراقتى تۇردە الاتىن وزبەكستان، اۋعانستان، تۇرىكمەنستان، تاجىكستان سياقتى مەملەكەتتەر بار. يران مەن قىتاي دا بىزدەن استىق الىپ جاتىر. وسى نارىقتاردى جوعالتىپ الۋىمىز مۇمكىن. ويتكەنى بيىل رەسەيدە مول استىق جينالدى»، - دەدى ءابىلحايىر تامابەك.

بۇدان بۇرىن حابارلانعانداي، اۋىل شارۋاشىلىعى ءمينيسترى ايداربەك ساپاروۆ كۇز باسىنداعى تولاسسىز جاۋىننان ديقاندارعا كەلگەن زارداپتىڭ كولەمىن اتادى. 2,7 ميلليون گەكتار القاپتاعى استىق قايتا كوكتەپ كەتكەن.