قازاقستان استىعىنىڭ نەگىزگى بولىگى قاي ەلدەرگە ەكسپورتتالىپ جاتىر
استانا. KAZINFORM - قازىر استىق ەكسپورتى قاي ەلدەرگە باعىتتالىپ جاتىر؟ 2024 -جىلعى استىقتىڭ قانشاسى ەكسپورتقا شىعارىلدى؟ بۇل سۇراقتارعا ق ر ا ش م جاۋاپ بەردى.

- ق ت ج دەرەكتەرىنە سايكەس، 2024 -جىلدىڭ قورىتىندىسى بويىنشا 10,6 ميلليون توننا استىق تاسىمالداندى (2023 -جىلى - 11,2 ميلليون توننا)، ونىڭ ىشىندە 2,5 ميلليون توننا رەسپۋبليكا ىشىندە (2023 -جىلى - 2,2 ميلليون توننا) جانە 8,1 ميلليون توننا ەكسپورتقا (2023 -جىلى - 9 ميلليون توننا) جونەلتىلدى، - دەلىنگەن مينيسترلىكتىڭ Kazinform اگەنتتىگىنە بەرگەن جاۋابىندا.
ەلدەر بويىنشا ەكسپورت كەلەسىدەي ءبولىندى:
- وزبەكستانعا - 3,3 ميلليون توننا، بۇل 2023 -جىلعى دەڭگەيدەن 5 پايىزعا تومەن (3,45 ميلليون توننا)؛
- تاجىكستانعا - 1,2 ميلليون توننا، 2023 -جىلدان 20 پايىزعا كوپ (1 ميلليون توننا)؛
- قىرعىزستانعا - 140 مىڭ توننا، 2023 -جىلدان 1,9 ەسە كوپ (73 مىڭ توننا)؛
- قىتايعا - 1,7 ميلليون توننا، 11 پايىزعا تومەن (1,9 ميلليون توننا)؛
- اۋعانستانعا - 289 مىڭ توننا، 2023 -جىلدان 36 پايىزعا تومەن (449 مىڭ توننا)؛
- يرانعا - 526 مىڭ توننا، بۇل 2023 -جىلدان 2 ەسە كوپ (245 مىڭ توننا).
- 2024 -جىلدىڭ قىركۇيەك- جەلتوقسان ايلارىندا جاڭا ءونىم استىعىنىڭ تاسىمالداۋ كولەمى 5 ميلليون توننانى قۇراپ، 2023 -جىلدىڭ سايكەس كەزەڭىمەن سالىستىرعاندا 50 پايىزعا ارتتى. اتاپ ايتقاندا، وسى كولەمنىڭ 1,1 ميلليون تونناسى رەسپۋبليكا ىشىندە تاسىمالدانىپ، بۇل كورسەتكىش 27 پايىزعا ءوستى. ال ەكسپورتقا 3,9 ميلليون توننا جونەلتىلىپ، 2023 -جىلمەن سالىستىرعاندا 57 پايىزعا ارتىق بولدى، - دەپ ناقتىلادى ۆەدومستۆو.
جاڭا ءونىمنىڭ استىعىن ەكسپورتتاۋدىڭ ءوسۋى بويىنشا كەلەسىدەي كورسەتكىشتەر تىركەلدى:
- وزبەكستانعا - 45 پايىز (1 ميلليون توننادان 1,5 ميلليون تونناعا دەيىن)؛
- تاجىكستانعا - 57 پايىز (404 مىڭ توننادان 633 مىڭ تونناعا دەيىن)؛
- اۋعانستانعا - 51 پايىز (126 مىڭ توننادان 190 مىڭ تونناعا دەيىن)؛
- قىرعىزستانعا - 19 پايىز (63 مىڭ توننادان 75 مىڭ تونناعا دەيىن)؛
- قىتايعا - 10 پايىز (578 مىڭ توننادان 637 مىڭ تونناعا دەيىن).
- ايتا كەتۋ كەرەك، بيىل قازاقستان استىعىن يران مەن ازەربايجانعا جەتكىزۋ قايتا جانداندى. يرانعا ەكسپورت كولەمى 30,3 ەسەگە ارتىپ، 15 مىڭ توننادان 455 مىڭ تونناعا جەتتى. ازەربايجانعا ەكسپورت كولەمى 188 مىڭ توننانى قۇرادى (2023 -جىلدىڭ قىركۇيەك- جەلتوقسان ايلارىندا جەتكىزىلىمدەر بولماعان)، - دەپ اتالىپ وتكەن مينيسترلىك اقپاراتىندا.
ەسكە سالساق، بىلتىر قازاقستاندا رەكوردتىق كولەمدە استىق جينالعانىن جازعان ەدىك.
سونىمەن قاتار، رەسەي ارقىلى ەۋروپاعا بيداي ەكسپورتتاۋ كولەمىن ۇلعايتۋ جوسپارلانعانى بەلگىلى بولدى.
اۆتور
رۋسلان عابباسوۆ