قازاقستان استىعى قايدا ەكسپورتتالادى؟

استانا. KAZINFORM - قازاقستاننىڭ استىق ەكسپورتىنداعى پوزيتسياسى ىلگەرىلەپ كەلەدى. سالا وتكەن جىلى رەكوردتىق دەڭگەيگە جەتتى. جەلتوقسان ايىندا ميلليون تونناعا جۋىق استىق شەتەل اسسا، جىل بويى 7,9 ميلليون توننا ءونىم ەكسپورتتالعان.

ق ر اۋىل شارۋاشىلىعى مينيسترلىگىنىڭ مالىمەتىنشە، 2024-جىلدىڭ قىركۇيەك ايى مەن 2025-جىلدىڭ ناۋرىز ايى ارالىعىندا ەكسپورتقا 6,4 ميلليون توننا استىق جونەلتىلگەن. باسىم دەنى وزبەكستان مەن تاجىكستانعا تاسىمالدانىپتى.

- جاڭا ەگىننىڭ استىق ەكسپورتىنىڭ ءوسۋى بايقالادى. وزبەكستانعا - %31,7 (1,8 ميلليون توننادان 2,4 ميلليون تونناعا دەيىن)، تاجىكستانعا - %50 (633 مىڭ توننادان 954 مىڭ تونناعا دەيىن)، اۋعانستانعا - %40 (192 مىڭ توننادان 261 مىڭ تونناعا دەيىن)، قىرعىزستانعا - %88 عا (78 مىڭ توننادان 147 مىڭ تونناعا دەيىن) دەيىن ارتتى، - دەلىنگەن مينيسترلىك مالىمەتىندە.

ايتا كەتۋ كەرەك، يران مەن ازەربايجانعا دا قازاقستاندىق استىق جەتكىزىلىمى ۇلعايدى. كەيىنگى جىلى يرانعا - 17,6 ەسە، ازىربايجانعا - 84 ەسە ارتىق ەكسپورت جاسالعان.

بۇعان دەيىن الەمدىك استىق ەكسپورتىنىڭ وتاندىق نارىققا قالاي اسەر ەتەتىنىن تالداعان ەدىك.