قازاقستان ارالدى قۇتقارۋ قورىنا ءۇش جىل ءتوراعالىق ەتەدى
2024-جىلدان باستاپ حالىقارالىق ارالدى قۇتقارۋ قورىنا ءتوراعالىق ەتۋ كەزەگى قازاقستان رەسپۋبليكاسىنا ءوتتى.
مەملەكەت باسشىسى قاسىم-جومارت توقايەۆ 2026 -جىلدىڭ سوڭىنا دەيىن قور پرەزيدەنتى بولىپ سايلاندى، دەپ حابارلايدى Kazinform سۋ رەسۋرستارى جانە يرريگاتسيا مينيسترلىگىنە سىلتەمە جاساپ.
حالىقارالىق ارالدى قۇتقارۋ قورى قۇرامىنا قازاقستان، تاجىكستان، تۇرىكمەنستان جانە وزبەكستان كىرەدى.
«ءبىز ورتالىق ازيا مەملەكەتتەرىمەن، سونداي- اق باسقا دا حالىقارالىق ۇيىمدارمەن جانە قارجى ينستيتۋتتارىمەن ىنتىماقتاستىقتى ارتتىرۋدى جوسپارلاپ وتىرمىز. بيىل ءبىز دۇنيەجۇزىلىك بانكپەن بىرگە جۇزەگە اسىرىلىپ جاتقان سولتۇستىك ارالدى ساقتاۋ جوباسىنىڭ ەكىنشى كەزەڭىن باستاۋدى جوسپارلاپ وتىرمىز. ارال تەڭىزىن قۇتقارۋ - قورعا قاتىسۋشى بارلىق ەلدىڭ بىرلەسكەن كۇش- جىگەرىنىڭ ارقاسىندا عانا ورىندالاتىن مىندەت. الداعى 3 -جىلدا ءبىز وسى باعىتتا ماڭىزدى ناتيجەلەرگە قول جەتكىزۋگە نيەتتىمىز»، - دەيدى ق ر سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ.
اتالعان ۇيىم ارال تەڭىزىن قۇتقارۋعا جانە ءوڭىردىڭ ەكولوگيالىق جاعدايىن جاقسارتۋعا، سونداي-اق جالپى الەۋمەتتىك-ەكولوگيالىق پروبلەمالاردى شەشۋگە باعىتتالعان بىرلەسكەن مەملەكەتارالىق ەكولوگيالىق جانە عىلىمي-پراكتيكالىق باعدارلامالار مەن جوبالاردى ىسكە اسىرۋمەن اينالىسادى.
