قازاقستان انا مەن بالا ءولىمىن ازايتۋدا جاھاندىق ماقساتقا قول جەتكىزدى – د د ۇ
سەنات سپيكەرى ماۋلەن اشىمبايەۆتىڭ توراعالىعىمەن قازاقستان رەسپۋبليكاسىنىڭ ورنىقتى دامۋ سالاسىنداعى ۇلتتىق ماقساتتارى مەن مىندەتتەرىنىڭ ىسكە اسىرىلۋىنا مونيتورينگ جۇرگىزۋ جونىندەگى پارلامەنتتىك كوميسسيانىڭ ەكىنشى وتىرىسى ءوتتى.
كەزدەسۋدە حالىقتى ساپالى مەديتسينامەن جانە بىلىممەن قامتاماسىز ەتۋ ماسەلەلەرى تالقىلاندى، دەپ حابارلايدى قازاقپارات.
وتىرىستى اشقان پالاتا ءتوراعاسى بىرىككەن ۇلتتار ۇيىمى باس اسسامبلەياسىنىڭ 78-سەسسياسىندا مەملەكەت باسشىسى ورنىقتى دامۋ ماقساتتارىنا قول جەتكىزۋدىڭ ءبىرقاتار نەگىزگى مىندەتتەرىن بەلگىلەپ بەرگەنىن ايتتى.
بۇل رەتتە ۇلتتىق دەنساۋلىق ساقتاۋ جانە ءبىلىم بەرۋ سالالارىنداعى پروبلەمالارعا باسا ءمان بەرىلدى.
«پرەزيدەنتىمىز قاسىم- جومارت كەمەل ۇلى توقايەۆ ورنىقتى دامۋ ماقساتتارىنا قول جەتكىزۋ ۇلتتىق باسىمدىققا يە ەكەنىن ايتتى. وسى باعىتتاعى جۇمىستارعا دەپۋتاتتىق كورپۋستى جۇمىلدىرۋ ءۇشىن پارلامەنتتىك كوميسسيا قۇرىلدى»، - دەدى ماۋلەن اشىمبايەۆ.
سونداي- اق سەنات ءتوراعاسى بۇل جولدا بارلىق مۇددەلى تاراپتىڭ ءوزارا ءىس- قيمىلى ماڭىزدى ەكەنىن اتاپ ءوتتى جانە كەزدەسۋگە قاتىسۋشىلاردى ورتاق ماقساتتارعا قول جەتكىزۋ ءۇشىن بىرلەسىپ جۇمىس ىستەۋگە شاقىردى.
«بىزگە ورنىقتى دامۋ ماقساتتارىن ىسكە اسىرۋدىڭ جۇيەلى تاسىلدەرىن قالىپتاستىرۋ قاجەت. سونداي- اق ينديكاتورلاردىڭ ۇلتتىق جۇيەسىن جانداندىرۋ كەرەك. وڭىرلەر بويىنشا ورنىقتى دامۋ ينديكاتورلارىنىڭ ساپالى دەكومپوزيتسياسىن جۇرگىزۋدىڭ دە ماڭىزى زور. بۇل جۇمىسقا وڭىرلەردى بەلسەندى جۇمىلدىرعان ءجون»، - دەدى پالاتا سپيكەرى.
كوميسسيانىڭ وتىرىسىنا پارلامەنت دەپۋتاتتارى، پرەمەر- ءمينيستردىڭ ورىنباسارى، دەنساۋلىق ساقتاۋ، وقۋ- اعارتۋ، عىلىم جانە جوعارى ءبىلىم مينيسترلەرى، دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى وكىلى، ەلىمىزدەگى ب ۇ ۇ د ب تۇراقتى وكىلى، وبلىستار مەن رەسپۋبليكالىق ماڭىزى بار قالالار اكىمدىكتەرىنىڭ باسشىلىعى جانە ءماسليحات دەپۋتاتتارى، سەنات جانىنداعى جاس ساراپشىلار كلۋبىنىڭ مۇشەلەرى، سونداي- اق، قوعامدىق جانە حالىقارالىق ۇيىمداردىڭ وكىلدەرى قاتىستى.
وقۋ- اعارتۋ ءمينيسترى عاني بەيسەمبايەۆ ءبىلىم بەرۋ سالاسى بويىنشا ودم مىندەتتەرىنىڭ ىسكە اسىرىلۋ بارىسىنا توقتالدى.
ول اتالعان باعىتتىڭ كۇن ءتارتىبى قازاقستاننىڭ ءبىلىم بەرۋ جۇيەسىندەگى ماقساتتار مەن مىندەتتەرگە كوپ جاعىنان سايكەس كەلەتىنىن ايتتى.
«بۇگىندە ەلىمىزدە ورنىقتى دامۋدىڭ «بارلىعى قامتىلعان، ءادىل ساپالى ءبىلىم بەرۋدى قامتاماسىز ەتۋ جانە بارشانىڭ ءومىر بويى وقۋ مۇمكىندىگىن ىنتالاندىرۋ» ماقساتى اياسىندا ءبىلىم بەرۋ ساپاسىن ارتتىرۋ جانە ءبىلىم الۋعا تەڭ قولجەتىمدىلىكتى كەڭەيتۋ باعىتىندا جۇيەلى شارالار كەشەنى ىسكە اسىرىلىپ كەلەدى. بارلىق ينديكاتور ءبىلىم بەرۋ سالاسىنىڭ نەگىزگى ستراتەگيالىق جانە باعدارلامالىق قۇجاتتارىنا، اتاپ ايتقاندا، مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋدى دامىتۋدىڭ 2023-2029 -جىلدارعا ارنالعان تۇجىرىمداماسىنا، «جايلى مەكتەپ» ۇلتتىق جوباسىنا جانە ءبىلىم مينيسترلىگىنىڭ دامۋ جوسپارىنا بىرىكتىرىلگەن. قازىرگى تاڭدا مۇعالىمدەردى دايارلاۋ باعدارلامالارى ينكليۋزيۆتى ءبىلىم بەرۋ پاندەرىن قامتيتىنىن دا اتاپ وتكەن ءجون»، - دەدى وقۋ- اعارتۋ ءمينيسترى.
د د ۇ- نىڭ قازاقستانداعى وكىلى سكەندەر سىلانىڭ ايتۋىنشا، «ەشكىمدى ارتتا قالدىرماۋ» قاعيداتى كوزدەلگەن ماقساتتار مەن مىندەتتەرگە قول جەتكىزۋدىڭ نەگىزى ەكەنىن ايتتى.
مۇنداي قاعيدات حالىقتىڭ الەۋمەتتىك از قامتىلعان توپتارىنىڭ دەنساۋلىق جاعدايىن جاقسارتۋعا جانە تەڭسىزدىكتى ازايتۋعا جول اشادى.
«قازاقستان حالىقتىڭ دەنساۋلىعىن جاقسارتۋ جانە دەنساۋلىق ساقتاۋ جۇيەسىن نىعايتۋ سالاسىندا ايتارلىقداي دەڭگەيدە العا جىلجىپ وتىر. مەملەكەت انا ءولىمىن، بەس جاسقا دەيىنگى بالالار ءولىمىن جانە جاڭا تۋعان نارەستەلەر ءولىمىن ازايتۋ باعىتىندا جاھاندىق ماقساتتارعا قول جەتكىزدى. قازاقستاننىڭ تەمەكى مەن نيكوتين تۇتىنۋعا قارسى كۇرەستە قابىلداپ جاتقان شارالارى د د ۇ- نىڭ ەۋروپا بولىگى ءۇشىن ۇلگى ەكەنىن دە ايتا كەتكەن ابزال. تەمەكى مەن نيكوتينسىز ورتا قالىپتاستىرۋ جولىندا شەشۋشى قادامدار جاساۋ جانە دەنساۋلىققا بايلانىستى سالىق ەنگىزۋ قوعام دەنساۋلىعىن قورعاۋ ءۇشىن وتە ماڭىزدى ەكەنى ءسوزسىز. دەگەنمەن، 3 ورنىقتى دامۋ ماقساتى اياسىندا «بارلىق ساياساتتاعى دەنساۋلىق» ءتاسىلى نەگىزىندە ءار سەكتور تاراپىنان كەشەندى شارالاردى تالاپ ەتەتىن بىرنەشە مىندەت بار»، - دەدى ددۇ- نىڭ قازاقستانداعى وكىلى.
وتىرىستىڭ قورىتىندىسى بويىنشا كەزدەسۋگە قاتىسۋشىلار الداعى بىرلەسكەن جۇمىسقا قاتىستى ءوز ۇسىنىستارىن ايتىپ، ودم- عا قول جەتكىزۋگە ىقپال ەتەتىن ماڭىزدى باستامالارعا توقتالىپ ءوتتى.
