قازاقستان انا ءولىمىن ايتارلىقتاي تەز تومەندەتكەن ون ەلدىڭ قاتارىنا كىردى
استانا. KAZINFORM - پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن ورنىقتى دامۋ جونىندەگى ۇيلەستىرۋ كەڭەسىنىڭ وتىرىسىندا ورنىقتى دامۋ ماقساتتارى جونىندەگى (و د م) ءۇشىنشى ەرىكتى ۇلتتىق شولۋدىڭ تۇساۋكەسەرى ءوتتى.
ب ۇ ۇ- نىڭ قازاقستانداعى تۇراقتى ۇيلەستىرۋشىسىنىڭ مىندەتىن اتقارۋشى ستيۆەن و' ماللي ۇسىنىلعان قۇجاتتىڭ جاي عانا ەسەپ ەمەستىگىن، قازاقستاننىڭ ب ۇ ۇ- نىڭ 2030 كۇن تارتىبىنە شىنايى بەرىلگەندىگىنىڭ كورىنىسى مەن بارلىق الەمگە ەلىمىزدىڭ ىلگەرىلەۋى، ساباقتارى مەن امبيتسيالارى تۋرالى ايتۋ مۇمكىندىگى ەكەنىن اتاپ ءوتتى.
- قازاقستان - شولۋدى ءۇش جىلدا ءبىر رەت وتكىزەتىن ساناۋلى ەلدەردىڭ ءبىرى. بۇل و د م بويىنشا پروگرەسس مونيتورينگىندەگى، اشىقتىقتى ىلگەرىلەتۋدەگى ناعىز كوشباسشىلىعىن ايقىن كورسەتەدى. جاقىندا الماتىدا اشىلعان ب ۇ ۇ- نىڭ ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى وڭىرلىك ورتالىعى قازاقستاننىڭ و د م- نى ەلدە دە، ايماقتا دا ىسكە اسىرۋعا بەيىلدىلىگىن كورسەتەدى. ب ۇ ۇ تۇرعىسىنان مۇنداي شولۋلاردى جۇرگىزۋ شىنايى ارىپتەستىك پەن ءىس-قيمىلعا شاقىرۋ رەتىندە باعالانادى. ب ۇ ۇ قازاقستان ۇكىمەتىن تولىعىمەن قولدايدى، - دەپ اتاپ ءوتتى ستيۆەن و' ماللي.
ۇلتتىق ەكونوميكا ۆيتسە-ءمينيسترى اسان داربايەۆ ءۇشىنشى قۇجاتتا و د م- نى جەرگىلىكتى جەرگە بەيىمدەۋگە، ياعني جاھاندىق ماقساتتاردى ايماقتار مەن جەرگىلىكتى قوعامداستىقتار دەڭگەيىنە كوشىرۋ ماسەلەلەرىنە ەرەكشە نازار اۋدارىلعانىن ايتتى. سونداي-اق شولۋ 2025- ءتىڭ باستى ەرەكشەلىگى - ازاماتتىق قوعامنىڭ، عىلىمي-ساراپتامالىق قوعامداستىقتىڭ جۇمىسىنا بەلسەندى قاتىسۋ.
- ەكىنشى ەرىكتى ۇلتتىق شولۋ ۇسىنىلعان ساتتەن باستاپ و د م- نى ىسكە اسىرۋدىڭ ينستيتۋتسيونالدىق نەگىزدەرىن جەتىلدىرۋدە ەلەۋلى ناتيجەلەرگە قول جەتكىزىلدى: 2023-جىلى قازاقستاننىڭ ورنىقتى دامۋى سالاسىنداعى ۇلتتىق ماقساتتارى مەن مىندەتتەرىن ىسكە اسىرۋ مونيتورينگى جونىندەگى پارلامەنتتىك كوميسسيا قۇرىلدى. 2060-جىلعا دەيىن ەلدىڭ كومىرتەگى بەيتاراپتىعىنا قول جەتكىزۋ ستراتەگياسى قابىلداندى. ورنىقتى دامۋ ماقساتتارىنىڭ ءتيىمدى مونيتورينگىن قامتاماسىز ەتۋ ءۇشىن ودم ۇلتتىق ينديكاتورلارى وزەكتەندىرىلىپ، جالپى سانى بۇگىندە 200 گە جەتكىزىلدى، - دەدى اسان داربايەۆ.
ەكونوميكالىق زەرتتەۋلەر ينستيتۋتىنىڭ باسقارما ءتوراعاسى اسەل سارسەنبايەۆانىڭ ايتۋىنشا، و د م «ەشكىمدى ارتتا قالدىرماۋ» قاعيداتىنا سايكەس دايىندالعان ۇكىمەت تاراپىنان دا، ازاماتتىق قوعام تاراپىنان دا ىسكە اسىرىلۋدى باعالاۋدى كورسەتەدى. ول جۇرتشىلىق پىكىرىن ەسكەرە وتىرىپ ايقىندالعان باسىم ماقساتتاردىڭ ورىندالۋى تۋرالى اقپارات ۇسىندى.
- ۇكىمەت ورنىقتى دامۋ ماقساتى بويىنشا جانە جاھاندىق سىن-تەگەۋرىندەرگە جاۋاپ رەتىندە ەڭبەك نارىعىنىڭ تالابىنا سايكەس بيزنەستى قولداۋ مەن كادر دايارلاۋ شاراسىن جۇيەلى تۇردە قابىلداۋدا، - دەپ اتاپ ءوتتى اسەل سارسەنبايەۆا.
ول، ازاماتتىق قوعام الەۋمەتتىك كودەكس الەۋمەتتىك ساياساتتىڭ نەگىزىن نىعايتتى دەپ سانايدى. قازاقستان انا ءولىمىن تەز تومەندەتكەن (د د ۇ باعالاۋى بويىنشا) ون ەلدىڭ قاتارىنا كىرەدى. گەندەرلىك تەڭدىك سالاسىندا مەملەكەت دەڭگەيىندە دە، جەكە سەكتوردا دا ىلگەرىلەۋ بايقالادى. وندا ءىرى كومپانيالار گەندەرلىك ستراتەگيالار مەن حاراسسمەنتكە قارسى ءىس-قيمىل ساياساتىن ەنگىزەدى. قۇقىقتىق مادەنيەتتىڭ ءوسۋى سوت جۇيەسىنە قويىلاتىن جاڭا تالاپتارعا اكەلۋدە. قوعام ونى ودان ءارى جاقسارتۋدى كۇتەتىنى ورىندى.
ۇيلەستىرۋ كەڭەسىن قورىتىندىلاي كەلە، سەرىك جۇمانعارين ورنىقتى دامۋ ماقساتتارىنىڭ قاعيداتتارىن ەنگىزۋ ءبىرىنشى كەزەكتە حالىقتىڭ ءومىر ءسۇرۋ ساپاسىن ارتتىرۋعا، ۇزدىك حالىقارالىق ستاندارتتاردى قابىلداۋعا باعىتتالعانىن، بۇل تۇتاستاي العاندا ەلدىڭ حالىقارالىق ارەناداعى بەدەلىن نىعايتۋعا ىقپال ەتەتىنىن اتاپ ءوتتى.
كەڭەس قاتىسۋشىلارى قازاقستاننىڭ ءۇشىنشى ەرىكتى ۇلتتىق شولۋىن ماقۇلدادى. ەندى قۇجات وسى شىلدەدە نيۋ-يوركتەگى جوعارى دەڭگەيدەگى ساياسي فورۋمدا ۇسىنىلادى.
ايتا كەتەلىك ەگەر بالا شەتەلدە تۋعان بولسا، ونىڭ قۇجاتتارىن قالاي راسىمدەۋ كەرەكتىگىن جازعان ەدىك.
