قازاقستان پالەستينانىڭ 1967 -جىلعى شەكاراسىنىڭ قايتارىلۋىن قولدايدى - مۇرات نۇرتىلەۋ
استانا. KAZINFORM - قازاقستان پالەستينا تاۋەلسىزدىگىن، قاۋىپسىزدىگىن جانە 1967 -جىلعى شەكاراسىنىڭ قايتارىلۋىن قولدايدى.
بۇل تۋرالى بۇگىن تۇرىكمەنستان سىرتقى ىستەر ءمينيسترى راشيد مەرەدوۆپەن كەلىسسوزدەردەن كەيىن بىرلەسكەن مالىمدەمە جاساعان پرەمەر-ءمينيستردىڭ ورىنباسارى - سىرتقى ىستەر ءمينيسترى مۇرات نۇرتىلەۋ ايتتى.
«جاڭا عانا قۇرمەتتى ارىپتەسىممەن شاعىن جانە كەڭەيتىلگەن قۇرامدا ءداستۇرلى دوستىق، ءوزارا قولداۋ مەن سەنىم رۋحىنداعى كەلىسسوزدەر ءوتتى. ءبىز ىقپالداستىعىمىزدىڭ تىڭ باعىتتارىن ايقىنداپ، ىرگەلى مىندەتتەردى قاراستىردىق. ورتالىق ازيا مەملەكەتتەرىنىڭ جان- جاقتى جاقىنداسۋى ۋاقىت تالابىنان تۋىنداپ وتىر. قازاقتا «تاتۋلىق - تاۋسىلماس باقىت» دەگەن دانا ءسوز بار. وسى تۇستا، ورتالىق ازيا مەملەكەتتەرى باسشىلارىنىڭ كونسۋلتاتيۆتىك كەڭەستەرى اياسىنداعى ارىپتەستىگىمىزدىڭ ءرولى ەرەكشە. سايكەسىنشە، ءبىز بيىلعى تامىز ايىندا استانادا وتەتىن كونسۋلتاتيۆتىك كەڭەستىڭ 6- سامميتىنە دايىندىق ماسەلەلەرىن ورتاعا سالدىق. ناقتى ايتقاندا، «ورتالىق ازيا - 2040» وڭىرلىك كووپەراتسيا دامۋ ستراتەگياسىنا قول قويۋدى ماڭىزدى دەپ سانايمىز. سونىمەن قاتار ورتالىق ازيادا حⅺ عاسىردا دوستىق، تاتۋ كورشىلىك جانە ىنتىماقتاستىق تۋرالى شارتقا بارلىق تاراپتار قول قويادى دەگەن ءۇمىتىمىز زور»، - دەدى مۇرات نۇرتىلەۋ.
ونىڭ اتاپ وتۋىنشە، قازاق-تۇرىكمەن سەرىكتەستىگى كوپجاقتى قۇرىلىمدار اياسىندا ويداعىداي دامۋدا. كوپتەگەن جاھاندىق ماسەلەلەرگە قاتىستى ەكى ەلدىڭ ۇستانىمدارى ۇقساس.
«ارىپتەسىم ەكەۋمىز باسقا دا وڭىرلىك جانە حالىقارالىق ۇردىستەر بويىنشا پىكىر الماسىپ، ديالوگىمىزدى ودان ءارى جالعاستىرۋعا كەلىستىك. اتاپ ايتقاندا، حالىقارالىق ارالدى قۇتقارۋ قورىنىڭ الەۋەتىن بارىنشا پايدالانۋ ماڭىزدىلىعىنا نازار اۋدارىلدى. قازاقستان ءوزىنىڭ ءتوراعالىعى اياسىندا بارلىق تاراپتىڭ مۇددەلەرىن ەسكەرىپ، بەلسەندى جۇمىس جۇرگىزۋدى جوسپارلاپ وتىر. بۇل رەتتە، سۋ-ەنەرگەتيكالىق ىنتىماقتاستىقتىڭ مەحانيزمىن دامىتۋداعى تۇرىكمەنستاننىڭ قولداۋىن جانە ارەكەتتەسۋگە دايىندىعىن جوعارى باعالايمىز. سونىمەن بىرگە، تاياۋ شىعىس وڭىرىندەگى كۇردەلى پروتسەستەرگە دە جەكە توقتالىپ، وي- پىكىر بولىستىك. پالەستينا ماسەلەسى بۇگىنگى تاڭدا ۋشىعىپ جاتقانى بەلگىلى»، - دەدى ول.
ۆيتسە- پرەمەر جاقىندا نورۆەگيا، يسپانيا جانە يرلانديا پالەستينانىڭ مەملەكەتتىگىن مويىنداعان اتاپ ءوتتى.
«قازاقستان مۇنداي قادامدى تولىق قۇپتايدى. ءبىز پالەستينانى ەگەمەن مەملەكەت رەتىندە 1992 -جىلى مويىندادىق. وسى ماڭىزدى حالىقارالىق پروبلەمانى بىرىككەن ۇلتتار ۇيىمىنىڭ ءتيىستى رەزوليۋتسيالارىنا سايكەس، ساياسي- ديپلوماتيالىق جولمەن شەشۋ قاجەت دەگەن ۇستانىم ءبىز ءۇشىن ەشقاشان وزەكتىلىگىن جوعالتقان ەمەس. سول جىلدان بەرى استانا مەن راماللا ديپلوماتيالىق قارىم-قاتىناس ورناتىپ، ەلشىلەرىن تاعايىندادى. قازاقستان وسى ۇستانىمنان تانباي، پالەستينا تاۋەلسىزدىگىن، قاۋىپسىزدىگىن جانە 1967 -جىلعى شەكاراسىنىڭ قايتارىلۋىن قولدايدى»، - دەدى مۇرات نۇرتىلەۋ.
