قازاقستان اكادەميالىق حاب قۇرىپ جاتىر - پرەزيدەنت
استانا. KAZINFORM - مەملەكەت باسشىسى قاسىم-جومارت توقايەۆ استانادا ءوتىپ جاتقان «Connected-2024» حالىقارالىق كونفەرەنسياسىنا قاتىسۋشىلارعا جولداعان قۇتتىقتاۋىندا ءبىلىم، يننوۆاتسيا سالاسىنداعى ىنتىماقتاستىقتىڭ ماڭىزىنا توقتالدى.
ءبىلىم-عىلىم مەن يننوۆاتسيا، سيفرلاندىرۋ جانە ەكولوگيا ماسەلەلەرىن تالقىلاۋعا ارنالعان ءىس-شارادا پرەمەر-ءمينيستردىڭ ورىنباسارى تامارا دۇيسەنوۆا پرەزيدەنتتىڭ كونفەرەنسيا قاتىسۋشىلارىنا جولداعان قۇتتىقتاۋىن وقىدى.
«قازىر الەمدە جاڭا تەحنولوگيالار مەن جاساندى ينتەلەكتىنىڭ قارقىندى دامۋىنا، اۋا رايىنىڭ جانە قۋات كوزدەرىنىڭ وزگەرۋىنە بايلانىستى اۋقىمدى سىن-قاتەرلەر پايدا بولۋدا. وسى رەتتە مەملەكەتتەردىڭ جان-جاقتى جانە تۇراقتى وركەندەۋى ءۇشىن ءبىلىم جانە عىلىم مەن يننوۆاتسيا سالالارىنداعى ىنتىماقتاستىقتى ۇلعايتۋدىڭ ماڭىزى زور. سول سەبەپتى قازاقستان شەتەلدىڭ بەدەلدى جوعارى وقۋ ورىندارىمەن بىرلەسە وتىرىپ اكادەميالىق حاب قۇرۋ جولىندا بەلسەندى جۇمىس جۇرگىزىپ كەلەدى»، - دەيدى پرەزيدەنت.
قاسىم-جومارت توقايەۆ اتالعان قادامدار قازاقستاننىڭ عىلىمي-يننوۆاتسيالىق الەۋەتىن ارتتىرۋدىڭ بەرىك نەگىزىن قالىپتاستىرىپ جاتقانىن اتاپ ءوتتى.
«Connected-2024 كونفەرەنسياسى وسى ماقساتقا جەتۋگە سەپتىگىن تيگىزەدى. بۇگىنگى باسقوسۋ عالىمدار مەن ساراپشىلاردىڭ حالىقارالىق بايلانىسىن بەكەمدەۋگە، ءبىلىم بەرۋ جانە ادام كاپيتالىن دامىتۋ سالاسىنا تىڭ تاسىلدەر اشۋعا جول اشادى دەپ سەنەمىن»، - دەلىنگەن قۇتتىقتاۋدا.
ايتا كەتۋ كەرەك، بيىل العاش رەت ۇيىمداستىرىلىپ وتىرعان حالىقارالىق ءىس-شاراعا الەمنىڭ 60 ەلىنەن 300 گە جۋىق حالىقارالىق دەڭگەيدەگى ساراپشىلار شاقىرىلعان.
اۆتور
ەربول جانات
