قازاقستان اۋعانستانعا ەكسپورتتايتىن بيداي مەن ۇننىڭ، استىق ونىمدەرىنىڭ كولەمىن ۇلعايتپاق

استانا. KAZINFORM - پرەمەر- ءمينيستردىڭ ورىنباسارى سەرىك جۇمانعارين رەسەيگە سالىنعان سوڭعى سانكتسيالار قازاقستاننىڭ استىق ەكسپورتىنا كەرى اسەر ەتە مە دەپ الاڭدايتىندارىن ايتتى.

Ғалла
Фото: Мухтор Холдорбеков/Kazinform

«ءبىز اۋعانستانعا ەكسپورتتايتىن بيداي مەن ۇننىڭ، استىق ونىمدەرىنىڭ كولەمىن ۇلعايتپاقشىمىز. ول ءۇشىن بالاما مارشرۋتتى پىسىقتاپ جاتىرمىز. ويتكەنى سارىاعاش، كەلەس ارقىلى مازاري- شاريفكە وتەتىن سولتۇستىك مارشرۋت شەكتەن تىس جۇكتەلگەن. ويتكەنى تاسىمال تىعىزدىعى جوعارى، ءبىز جاقتا دا، وزبەكستان جاعىندا دا ينفراقۇرىلىم ايتارلىقتاي ەسكى. ونىڭ ۇستىنە تاشكەنت اگلومەراتسياسى بويىندا جاتىر. سوندىقتان قازىر 2025 -جىلى ىسكە قوسىلاتىن داربازا- ماقتاارال باعىتىنداعى جاڭا جولعا ءمان بەرىپ وتىرمىز. ءبىز سول جەردە ونەركاسىپ كووپەراتسياسىنىڭ ۇلكەن حالىقارالىق ورتالىعىن سالىپ جاتىرمىز. بۇل ستانسا وزبەكتىڭ سىرداريا ستانساسى ارقىلى وتەتىن جاڭا ستانسا بولادى. ول بىردەن جىزاق، بۇقارا ارقىلى تۇرىكمەنستان مەن اۋعانستاننىڭ باتىسىنا وتەدى. اڭگىمە كەزىندە اۋعانستاندىق ارىپتەستەردىڭ ءوزى بىزگە ەلدىڭ باتىس ايماعىنا كوڭىل ءبولۋدى سۇرادى. بۇل - گەرات قالاسى. ونىڭ جانىندا حوراسان دەيتىن ورتاق اتاۋى بار يراننىڭ بىرنەشە پروۆينتسياسى ورنالاسقان. ول اۋماقتا بىرنەشە ميلليون ادام تۇرادى. ياعني، ايتارلىقتاي نارىق»، - دەدى سەرىك جۇمانعارين.

ونىڭ سوزىنشە، قازىر قازاقستان اۋعانستانعا جىل سايىن 500-600 مىڭ توننا استىق ەكسپورتتاپ وتىر.

سوڭعى جاڭالىقتار