قازاقستان ا ە س قۇرىلىسىنا قارجىنى قايدان الادى

استانا. قازاقپارات - ۇلتتىق ەكونوميكا ۆيتسە-ءمينيسترى ارمان قاسەنوۆ قازاقستاندا ا ە س قۇرىلىسىن قارجىلاندىرۋ تۋرالى ساۋالعا جاۋاپ بەردى.

ونىڭ سوزىنشە، قۇرىلىس ءبولىپ تولەۋ ارقىلى جۇزەگە اسۋى دا مۇمكىن.

ازىرگە كىمنىڭ، قاي ەلدىڭ سالاتىنى تۋرالى شەشىم قابىلدانعان جوق. تيىسىنشە قارجىلاندىرۋ قالاي جۇرەتىنى دە انىقتالمادى. ا ە س قۇرىلىسىن قارجىلاندىرۋدىڭ ءبىر جولى رەتىندە ءبولىپ تولەۋ قاراستىرىلىپ جاتقانىن بىلەمىن. ونى سالاتىن كومپانيا تولەمدى كەيىنگە قالدىرا الادى. تيىسىنشە قارجىلاندىرۋ ءۇشىن قاراجات قاجەت بولماۋى مۇمكىن. ءبىراق قازىر ءبىز ونى ءدال ايتا المايمىز، ويتكەنى كىمنىڭ سالاتىنى تۋرالى ناقتى تۇسىنىك جوق، - دەدى قاسەنوۆ سەناتتاعى بريفينگ كەزىندە.

ايتا كەتەيىك، 6-قازان كۇنى ەلىمىزدە اەس سالۋ تۋرالى رەفەرەندۋم ءوتىپ، داۋىس بەرۋگە 7 ميلليون 820 مىڭ 204 ادام قاتىسسا، سونىڭ ىشىندە 5 ميلليون 561 مىڭ 937 ادام قولداپ داۋىس بەرگەنى انىقتالدى.