قازاقستان 7 جىلدا 6 ميلليون توننا مۇناي ءونىمىن سىرتتان ساتىپ العان
استانا. KAZINFORM - ماجىلىستە مۇناي- گاز سالاسىن دامىتۋ ساياساتىنا ارنالعان ۇكىمەت ساعاتى ءوتىپ جاتىر. سالاداعى وزەكتى پروبلەمالاردى دەپۋتات ەدىل جاڭبىرشين باياندادى.
«مۇناي وڭدەۋ قۋاتىن ۇلعايتۋ جانە مۇناي ونىمدەرىنىڭ ساپاسىن ارتتىرۋ ماقساتىندا ءۇش مۇناي وڭدەۋ زاۋىتىن جوندەۋگە جانە جاڭعىرتۋعا 2 تريلليون تەڭگە جۇمسالدى. بۇل رەتتە مۇناي مەن گاز كوندەنساتىن وڭدەۋدىڭ جىل سايىنعى كولەمى 18 ميلليون توننادان اسپايدى. ەلىمىزدەگى ىشكى نارىققا قاجەتتى مۇناي ونىمدەرىن جەتكىزۋدى تەك وتاندىق مۇناي ءوندىرۋ كومپانيالارى قامتاماسىز ەتىپ وتىر. جوعارىدا ايتقانىمىزداي، ولاردىڭ مۇناي ءوندىرۋ كولەمى ازايۋدا. سونىمەن قاتار، بىزدە جىل سايىن مۇناي ونىمدەرىنىڭ تاپشىلىعى بايقالادى. ول يمپورت ەسەبىنەن جابىلادى. مۇنايدىڭ ۇستىندە وتىرعان مەملەكەت ءۇشىن بۇل نونسەنس»، - دەدى دەپۋتات.
ونىڭ سوزىنشە، قازاقستان بەنزين، اۆياتسيالىق وتىن، ديزەل وتىنى بويىنشا يمپورتقا تاۋەلدى. 7 جىل ىشىندە ەلىمىزگە 6 ميلليون توننادان استام مۇناي ونىمدەرى يمپورتتالعان.
«ياعني، ەلىمىزدەگى جانار-جاعارماي ونىمدەرىنىڭ دەفيتسيتىن نەگىزىنەن رەسەي مەملەكەتىنەن يمپورتتاپ وتىرمىز. بۇل ماسەلەنى شەشەتىن ۋاقىت كەلدى. وسى رەتتە، جاڭا عانا ءمينيستردىڭ بايانداماسىندا الداعى 8 جىلدا مۇناي ءوندىرۋدى 56 پروتسەنتكە كوتەرىپ، 28 ميلليون تونناعا جەتكىزۋ جوسپارى بار ەكەنىن ەستىدىك. ءبىراق، بۇل جوسپاردىڭ ۋاقىتىندا ورىندالاتىنىنا كۇمانىمىز بار»، - دەدى ەدىل جاڭبىرشين.
بۇعان دەيىن حابارلاعانىمىزداي، ەلىمىزدە مۇناي-گاز سالاسىندا 1,3 مىڭنان استام كاسىپورىن قىزمەت ەتىپ جاتىر.
