قازاقستانداعى جەتى پارتيا كوشباسشىسى 24KZ ەفيرىندە دەبات وتكىزەدى
استانا. قازاقپارات – 19-تامىز كۇنى ساعات 20:00 دە «حابار» اگەنتتىگىنە قاراستى 24KZ تەلەارناسىنىڭ تىكەلەي ەفيرىندە «باستى دەبات - 2026» ساياسي جوباسى كورسەتىلەدى، دەپ حابارلايدى 24.kz.
بۇل - ەل تاريحىندا تۇڭعىش رەت وتەتىن قۇرىلتاي سايلاۋىنىڭ الدىنداعى قورىتىندى پىكىرتالاس. باستى دەباتتىڭ نەگىزگى تاقىرىبى - «دامىعان ەكونوميكا - قۋاتتى قوعام».
تىكەلەي ەفيردە ۇمىتكەرلەر وزدەرىنىڭ سايلاۋالدى باعدارلامالارىن جاريالاپ، ەلدىڭ الەۋمەتتىك-ەكونوميكالىق دامۋىنا سەرپىن بەرەتىن نەگىزگى شەشىمدەرىن ورتاعا سالادى.
ساياسي دودانى 24KZ تەلەارناسىنىڭ YouTube، سونداي-اق Telegram ،Instagram جانە TikTok جەلىلەرىندەگى رەسمي اككاۋنتتارىنان ونلاين رەجيمدە كورۋگە بولادى.
بۇل جولى پىكىرسايىس الاڭىندا ساياسي ۇيىمداردىڭ وكىلدەرى ەمەس، ەلىمىزدەگى بارلىق جەتى پارتيانىڭ كوشباسشىلارىنىڭ قاتىساتىنىن اتاپ وتكەن ءجون:
«ادىلەت» پارتياسىنىڭ ءتوراعاسى ايبەك دادەباي،
قازاقستاننىڭ جالپىۇلتتىق سوتسيال-دەموكراتيالىق پارتياسىنىڭ ءتوراعاسى اسحات راحىمجانوۆ،
Baytaq پارتياسىنىڭ ءتوراعاسى ازاماتحان امىرتايەۆ،
قازاقستان حالىق پارتياسىنىڭ ءتوراعاسى نۇرسۇلتان شوقانوۆ،
«اۋىل» پارتياسىنىڭ ءتوراعاسى قايرات ايتۋعانوۆ،
«اق جول» دەموكراتيالىق پارتياسىنىڭ ءتورايىمى دانيا ەسپايەۆا،
جانە Respublica پارتياسىنىڭ ءتوراعاسى ايداربەك حودجانازاروۆ.
ءتورت كەزەڭنەن تۇراتىن دەبات فورماتى قاتىسۋشىلارعا پارتيا باعدارلاماسىن جۇيەلى تۇردە تانىستىرۋ، وپپونەنتتەرىنە سۇراق قويۋ، سونداي-اق بايلانىس ورتالىعىنا كەلىپ تۇسكەن بەينەحابارلامالار مەن ساۋالدارعا جاۋاپ بەرۋ مۇمكىندىگىن قاراستىرادى.
قورىتىندى بولىمدە پارتيا جەتەكشىلەرى وزدەرىنىڭ سايلاۋالدى مالىمدەمەلەرىن جولدايدى.
دەباتقا قاتىسۋشىلاردىڭ ءسوز سويلەۋ كەزەگى جەرەبە تارتۋ ارقىلى ايقىندالادى. جەرەبە تارتۋ باستى دەباتقا ءبىر كۇن قالعاندا، ياعني 18-تامىز ساعات 10:00 دە 24KZ تەلەارناسىنىڭ تىكەلەي ەفيرىندە وتەدى. جەرەبە ناتيجەلەرى الەۋمەتتىك جەلىلەردە دە جاريالانادى. وسىلايشا، ءسوز سويلەۋ كەزەگىن انىقتاۋ ءراسىمى بارلىق ۇمىتكەرلەر مەن كورەرمەن ءۇشىن بارىنشا اشىق ءارى ءادىل وتەدى.
دەبات مودەراتورلارى بەلگىلى تەلەجۇرگىزۋشىلەر - نۇرسۇلتان قۇرمان مەن ءمولدىر دوسباي، ال ازاماتتاردان كەلىپ تۇسەتىن ساۋالداردى كولل-ورتالىق ارقىلى ساعىنىش ابىكەي قابىلدايدى.
بۇدان بۇرىن 12-تامىزدا Jibek Joly تەلەارناسىنىڭ تىكەلەي ەفيرىندە قۇرىلتاي دەپۋتاتتارىن سايلاۋعا قاتىساتىن جەتى ساياسي پارتيا وكىلدەرىنىڭ دەباتى وتكەنىن جازعان ەدىك. قاتىسۋشىلار «زاڭ مەن ءتارتىپ - ادىلەتتى قازاقستاننىڭ نەگىزى» تاقىرىبىندا ءسوز سويلەپ، سايلاۋالدى باعدارلاماسىن تانىستىردى.
