قازاقستانداعى جەرگىلىكتى جولداردىڭ قانشا پايىزى جاڭارتىلدى

ۆەدومستۆونىڭ مالىمەتىنشە، قازىرگى تاڭدا ۇزىندىعى 70 مىڭ شاقىرىم بولاتىن جەرگىلىكتى جولداردىڭ 63,7 مىڭ شاقىرىمى نەمەسە 91 پايىزى نورماتيۆتىك جاعدايعا كەلتىرىلگەن. سالىستىرمالى تۇردە، 2023 -جىلدىڭ باسىندا بۇل كورسەتكىش 85 پايىز بولعان.

2023- 2025 -جىلدارى جەرگىلىكتى جولداردىڭ 13,3 مىڭ شاقىرىمى جوندەۋ جانە جول- قۇرىلىس جۇمىستارىمەن قامتىلدى. ونىڭ 10,6 مىڭ شاقىرىمى پايدالانۋعا بەرىلدى. اتاپ ايتقاندا، 2023 -جىلى 4,9 مىڭ شاقىرىمدا، 2024 -جىلى 4,3 مىڭ شاقىرىمدا، 2025 -جىلى 4,1 مىڭ شاقىرىمدا ءتيىستى جۇمىستار جۇرگىزىلدى.

جۇمىستار بيىل دا جالعاسىپ وتىر. 2026 -جىلى جەرگىلىكتى ماڭىزى بار تاعى 2,4 مىڭ شاقىرىم جول جوندەۋ جانە جول-قۇرىلىس جۇمىستارىمەن قامتىلدى.

بۇل رەتتە ماقسات جەكەلەگەن پروبلەمالى ۋچاسكەلەردى جوندەۋمەن عانا شەكتەلمەيدى. نەگىزگى مىندەت - الداعى جىلدارعا تۇراقتى ءارى ساپالى جول جەلىسىن قالىپتاستىرۋ. وسىعان بايلانىستى جولداردىڭ تەحنيكالىق جاعدايىن كەزەڭ-كەزەڭىمەن جاقسارتۋ، ونىڭ ىشىندە قيىرشىقتاس جانە تاس ماتەريالداردان جول جامىلعىسىن توسەۋ كوزدەلگەن.

- جالپى، تالاپتارعا سايكەس كەلتىرۋ ءۇشىن شامامەن 14 مىڭ شاقىرىم جەرگىلىكتى جولدى قامتۋ جوسپارلانىپ وتىر. بۇل جۇمىستاردى ىسكە اسىرۋ 2029 -جىلعا قاراي نورماتيۆتىك جاعدايداعى جەرگىلىكتى جولداردىڭ ۇلەسىن 95 پايىزعا دەيىن جەتكىزۋگە مۇمكىندىك بەرەدى، - دەلىنگەن حابارلامادا.

وسىلايشا، جەرگىلىكتى جولداردى دامىتۋ ءبىر رەتتىك جوندەۋ جۇمىستارى ەمەس، جۇيەلى تۇردە جۇزەگە اسىرىلاتىن ۇزاق مەرزىمدى ۇدەرىسكە اينالۋدا. نەگىزگى باعىت - ەڭ پروبلەمالى ۋچاسكەلەردى قالپىنا كەلتىرۋدەن باستاپ، جول جەلىسىن كەشەندى جاقسارتۋعا جانە ەلدى مەكەندەر اراسىنداعى تۇراقتى كولىك قاتىناسىن قامتاماسىز ەتۋگە دەيىنگى جۇمىستاردى كەزەڭ-كەزەڭىمەن جۇرگىزۋ.