قازاقستاندا ۋنيۆەرسيتەتتى ءۇش جىلدا بىتىرۋگە بولادى: وقۋ اقىسى ارزانداي ما؟
استانا. قازاقپارات - قازاقستاندا ستۋدەنتتەرگە باكالاۆريات باعدارلاماسىن ءتورت جىلدىڭ ورنىنا ءۇش جىلدا اياقتاۋعا مۇمكىندىك بار. الايدا وقۋ مەرزىمىنىڭ قىسقارۋى ءبىلىم الۋ قۇنى مىندەتتى تۇردە تومەندەيدى دەگەندى بىلدىرمەيدى. بۇل تۋرالى پرەمەر-مينيستر ولجاس بەكتەنوۆتىڭ دەپۋتاتتىق ساۋالعا بەرگەن جاۋابىندا ايتىلعان.
ءۇش جىلدا ج و و-نى قالاي بىتىرۋگە بولادى؟
قازاقستاندا باكالاۆرياتتا وقۋ مەرزىمى ادەتتە ءتورت جىلدى قۇرايدى. دەگەنمەن زاڭناما جوعارى وقۋ ورىندارىنا وقۋ پروتسەسىن ستۋدەنتتەر ءبىلىم بەرۋ باعدارلاماسىن ءۇش جىلدا مەڭگەرە الاتىنداي ەتىپ ۇيىمداستىرۋعا مۇمكىندىك بەرەدى.
ول ءۇشىن ۋنيۆەرسيتەت وقۋ كەستەسىن وزگەرتىپ، ءبىلىم الۋ پروتسەسىن قارقىندى جۇرگىزە الادى. مىسالى، وقۋ جىلىن ەكى سەمەستردىڭ ورنىنا ءۇش تريمەسترگە بولۋگە بولادى.
الايدا وقۋ مەرزىمى قىسقارعانىمەن، باعدارلامانىڭ مازمۇنى مەن اكادەميالىق جۇكتەمەسى ازايمايدى. ستۋدەنت ءتورت جىلدىق وقۋ كەزىندەگىدەي 240 اكادەميالىق كرەديتتى تولىق مەڭگەرۋى كەرەك. ال كەيبىر ماماندىقتار بويىنشا كەمىندە 300 كرەديت تالاپ ەتىلەدى. ياعني ستۋدەنت از ۋاقىت ىشىندە ءدال سول كولەمدەگى ءبىلىم الىپ، قاجەتتى كرەديتتەردى تولىق جيناۋى ءتيىس.
پرەمەر-ءمينيستردىڭ جاۋابىندا بۇل ءتاسىل ءبىلىم بەرۋ باعدارلاماسىن جاي عانا قىسقارتۋ ەمەس، مامانداردى دايارلاۋ ساپاسىن ساقتاي وتىرىپ، وقۋ پروتسەسىن يكەمدى ۇيىمداستىرۋ مۇمكىندىگى رەتىندە قاراستىرىلاتىنى ايتىلعان.
قازىر قاي ۋنيۆەرسيتەتتەردە قولدانىلادى؟
ۇكىمەت مالىمەتىنشە، بۇگىندە قازاقستاندا 16 مىڭنان استام ستۋدەنت تريمەسترلىك جۇيە بويىنشا ءبىلىم الىپ جاتىر.
مۇنداي وقۋ فورماتى Astana IT University، ءال-فارابي اتىنداعى قازاق ۇلتتىق ۋنيۆەرسيتەتى، ل. ن. گۋميلەۆ اتىنداعى ەۋرازيا ۇلتتىق ۋنيۆەرسيتەتى جانە باسقا دا جوعارى وقۋ ورىندارىندا قولدانىلادى.
بۇل جۇيە نەگىزىنەن سۇرانىسقا يە ماماندىقتاردى قامتيدى. ولاردىڭ قاتارىندا باعدارلامالاۋ، كيبەرقاۋىپسىزدىك، جاساندى ينتەللەكت، دەرەكتەردى تالداۋ، بيزنەس- اناليتيكا جانە ماركەتينگ بار.
دەگەنمەن تريمەسترلىك جۇيەمەن وقۋ ستۋدەنتتەردىڭ بارلىعى ۋنيۆەرسيتەتتى مىندەتتى تۇردە ءۇش جىلدا بىتىرەدى دەگەندى بىلدىرمەيدى. وقۋ مەرزىمى ناقتى ءبىلىم بەرۋ باعدارلاماسىنا جانە ونىڭ تالاپتارىنا بايلانىستى.
قانداي ماماندىقتاردا وقۋ مەرزىمىن قىسقارتۋ قيىن؟
ءۇش جىلدىق وقۋ فورماتى بارلىق ماماندىققا بىردەي قولايلى ەمەس. ۇكىمەت مەديتسينا، ۆەتەريناريا، ونەر سالالارىن، سونداي- اق پەداگوگيكالىق، ينجەنەرلىك، جاراتىلىستانۋ جانە گۋمانيتارلىق باعىتتاردىڭ كەيبىرىن بولەك قاراستىرۋ قاجەت ەكەنىن اتاپ وتكەن.
بۇل سالالاردا مامانداردى دايارلاۋ ءۇشىن اۋقىمدى تەوريالىق بىلىممەن قاتار، ۇزاق مەرزىمدى تاجىريبەلىك دايىندىق تا قاجەت. سوندىقتان وقۋ مەرزىمىن قىسقارتۋ مۇمكىندىگى ءار ماماندىق بويىنشا جەكە باعالانۋى ءتيىس.
ءۇش جىلدىق وقۋ ارزانىراق بولا ما؟
وقۋ مەرزىمىنىڭ قىسقارۋى ۋنيۆەرسيتەتتەگى ءبىلىم قۇنىنىڭ دا تومەندەيتىنىن بىلدىرمەيدى.
ۇكىمەت تۇسىندىرگەندەي، وقۋ اقىسى اكادەميالىق كرەديتتەردىڭ سانىنا قاراي ەسەپتەلەدى. ال ءۇش جىلدىق فورماتقا كوشكەن كەزدە كرەديتتەر كولەمى ازايمايدى. دەمەك ستۋدەنت بۇرىنعىداي سول وقۋ باعدارلاماسىن تولىق مەڭگەرۋى كەرەك.
بۇعان قوسا، وقىتۋشىلار مەن ۋنيۆەرسيتەتكە تۇسەتىن جۇكتەمە دە ازايمايدى. كەرىسىنشە، سول كولەمدەگى وقۋ ماتەريالىن قىسقا مەرزىمدە يگەرۋ قاجەت بولادى.
سوندىقتان باكالاۆرياتتى ءۇش جىلدا اياقتاۋ وقۋ ۋاقىتىن ۇنەمدەۋگە مۇمكىندىك بەرگەنىمەن، ونىڭ قۇنىن ارزانداتپايدى.
كوللەدجدەن كەيىن ۋنيۆەرسيتەتتى 1,5-2 جىلدا بىتىرۋگە بولا ما؟
بۇل - ءۇش جىلدىق باكالاۆرياتتان بولەك مۇمكىندىك. ول بۇرىننان بەلگىلى ءبىر ءبىلىم العان ستۋدەنتتەرگە قاتىستى قولدانىلادى.
مىسالى، كوللەدج تۇلەگى ۋنيۆەرسيتەتكە ءوزى وقىعان ماماندىعىنا جاقىن باعىت بويىنشا تۇسسە، جوعارى وقۋ ورنى بۇرىن مەڭگەرگەن پاندەرى مەن كرەديتتەرىنىڭ ءبىر بولىگىن ەسەپكە الۋى مۇمكىن.
قانشا كرەديتتىڭ تانىلاتىنىنا قاراي، ۋنيۆەرسيتەتتەگى وقۋ مەرزىمى ءبىر جارىم، ەكى نەمەسە ءۇش جىل بولۋى ىقتيمال.
ءۇش جىلدىق وقۋ جۇيەسى قاشان باعالانادى؟
2027 -جىلى عىلىم جانە جوعارى ءبىلىم مينيسترلىگى ەڭبەك جانە حالىقتى الەۋمەتتىك قورعاۋ مينيسترلىگىمەن، «اتامەكەن» ۇلتتىق كاسىپكەرلەر پالاتاسىمەن جانە بيزنەس وكىلدەرىمەن بىرلەسىپ، ءۇش جىلدىق وقۋ فورماتىنا تالداۋ جۇرگىزۋدى جوسپارلاپ وتىر.
زەرتتەۋ بارىسىندا مامانداردى دايارلاۋعا جۇمسالاتىن شىعىن، تۇلەكتەردىڭ جۇمىسقا ورنالاسۋى، تابىسى جانە جۇمىس بەرۋشىلەردىڭ ولاردىڭ دايىندىعىنا كوڭىلى تولۋ دەڭگەيى باعالانادى. وسى تالداۋ قورىتىندىسى بويىنشا ۇكىمەت ءۇش جىلدىق وقۋ جۇيەسىن ودان ءارى دامىتۋ جونىندەگى شارالاردى ايقىندايدى.
el.kz
