قازاقستاندا ەگىن جيناۋ ناۋقانى باستالدى: قاي وڭىردە ونىمدىلىك جوعارى

ق ر اۋىل شارۋاشىلىعى مينيسترلىگى باسپا ءسوز قىزمەتىنىڭ حابارلاۋىنشا، بيىل سولتۇستىك قازاقستان وبلىسىندا 54 شارۋاشىلىق، قوستاناي وبلىسىندا 73 شارۋاشىلىق، اقمولا وبلىسىندا 44 شارۋاشىلىق، پاۆلودار وبلىسىندا 6 شارۋاشىلىق جانە شىعىس قازاقستان وبلىسىندا 3 اگروقۇرىلىم زەرتتەلدى.

مونيتورينگ ناتيجەلەرى بويىنشا زەرتتەلگەن الاڭداردا ەگىستىڭ جاقسى جاعدايى بايقالادى. سونىمەن قاتار، وڭىرلەردەگى جاعداي ءار ءتۇرلى جانە اۋا-رايىنا، ىلعال مەن قورەكتىك زاتتارمەن قامتاماسىز ەتىلۋىنە بايلانىستى. استىق ەگەتىن بەلدەۋدىڭ كوپتەگەن شارۋاشىلىقتارى ەگىن جيناۋعا كىرىستى.

قوستاناي وبلىسىندا 17-تامىزداعى جاعداي بويىنشا ءداندى جانە بۇرشاقتى داقىلداردىڭ ونىمدىلىگى بويىنشا فەدوروۆ اۋدانىنىڭ - 28,0 ت س/گ ا، قارابالىق اۋدانىنىڭ - 22,8 ت س/گ ا جانە دەنيسوۆ اۋدانىنىڭ - 18,6 ت س/گ ا كورسەتكىشىمەن اگرارشىلارى كوش باستاپ تۇر.

اقمولا وبلىسىندا ەگىن جيناۋدىڭ باستاپقى كەزەڭىندە ونىمدىلىكتىڭ ەڭ جوعارى كورسەتكىشتەرى بۇلاندى جانە بۋراباي اۋداندارىندا بايقالادى - تيىسىنشە 20 جانە 20,1 ت س/گ ا. زەرەندى اۋدانىنىڭ شارۋاشىلىقتارىندا 15,7 ت س/گەكتار ەگىن جينالۋدا.

سولتۇستىك قازاقستان وبلىسىندا ايىرتاۋ جانە ەسىل اۋداندارىندا ءداندى جانە ءداندى-بۇرشاق داقىلداردىڭ ونىمدىلىگى 16,5 ت س/گ ا، ماعجان جۇمابايەۆ اۋدانىندا - 15 ت س/گ ا، قىزىلجار اۋدانىندا - 14,9 ت س/گ ا قۇرايدى.

كوپتەگەن شارۋاشىلىقتار ءۇشىن فورۆاردتىق قارجىلاندىرۋ كوكتەمگى ەگىسكە دايىندىقتا ماڭىزدى ءرول اتقاردى. فەرمەرلەر الىنعان قاراجاتتى تۇقىم، تىڭايتقىش، وسىمدىكتەردى قورعاۋ، وتىن جانە دالا جۇمىستارىن ساتىپ الۋعا جۇمسادى.

- شارۋاشىلىق ءۇشىن قارجىلىق قولداۋ اسىرەسە ماۋسىم باسىندا ماڭىزدى، ويتكەنى نەگىزگى شىعىندار قازىردىڭ وزىندە باستالىپ كەتكەن، ال الداعى ءونىمدى ساتۋدان تۇسەتىن كىرىس ءالى جوق. قارجىلاندىرۋدىڭ ارقاسىندا ءبىز جانار-جاعارماي ماتەريالدارى مەن تىڭايتقىشتاردى ۋاقىتىندا ساتىپ الىپ، بارلىق جۇمىستاردى وڭتايلى مەرزىمدە جۇرگىزە الدىق. بۇل تۇپكىلىكتى ناتيجەگە تىكەلەي اسەر ەتەدى، - دەپ ءبولىستى «يمران Agro» ج ش س ديرەكتورى ومىرسەرىك اقىشيەۆ.

مەملەكەت باسشىسى اگرارشىلارمەن كەزدەسۋلەردە بيدايعا تاۋەلدىلىكتى ازايتۋ جانە جوعارى ءتيىمدى داقىلداردى وسىرۋگە كوشۋ قاجەتتىگىنە بىرنەشە رەت نازار اۋداردى. اۋىل شارۋاشىلىعى مينيسترلىگىنىڭ ەگىس القاپتارىن ءارتاراپتاندىرۋ جونىندەگى دايەكتى ساياساتى ايتارلىقتاي ناتيجە بەرەدى - اگرارشىلار ەگىس قۇرىلىمىن بىرتىندەپ وزگەرتۋدە. 2026-جىلى مايلى داقىلدار القابى رەكوردتىق 5,1 ميلليون گەكتارعا دەيىن ۇلعايدى، ونىڭ 2,2 ميلليون گەكتارى كۇنباعىسقا تيەسىلى.

- ءبىز مايلى داقىلدار ەگىلەتىن القاپتاردىڭ كولەمىن بىرتىندەپ ۇلعايتىپ جاتىرمىز. قازىر ولارعا سۇرانىس جوعارى، سوندىقتان ەكونوميكالىق تيىمدىلىگى دە تارتىمدىراق. ياعني، ءبىز تەك بيدايعا عانا تاۋەلدى بولماي، تاۋەكەلدەردى ءار ءتۇرلى داقىلدار اراسىندا ءبولىپ وتىرمىز. مەملەكەت پەن ازىق-تۇلىك كورپوراتسياسىنىڭ قولداۋى وسىنداي جوسپارلاۋ ءۇشىن كوبىرەك مۇمكىندىك بەرەدى، - دەپ اتاپ ءوتتى سولتۇستىك قازاقستان وبلىسىنداعى «سماتايەۆ» شارۋا قوجالىعىنىڭ باسشىسى ساتتار سماتايەۆ.

فورۆاردتىق باعدارلامانىڭ تاعى ءبىر قاتىسۋشىسىنىڭ ايتۋىنشا، فەرمەرلەر ءۇشىن قارجىلاندىرۋدان باسقا، ەگىن العاننان كەيىن دايىن اگروونىمدەردى كەپىلدەندىرىلگەن وتكىزۋ وتە ماڭىزدى.

- ءبىز ءۇشىن قارجىلاندىرۋ الىپ، ەگىس ناۋقانىن ۋاقىتىندا وتكىزۋ عانا ماڭىزدى ەمەس. سونداي-اق ءوندىرىس كەزەڭىندە ءونىمنىڭ ءبىر بولىگىن كەپىلدەندىرىلگەن تۇردە ساتا الاتىنىمىزدى ءتۇسىنۋ دە ماڭىزدى. فورۆاردتىق ساتىپ الۋ - فەرمەرلەردى قولداۋدىڭ ناقتى ءارى ءتيىمدى جۇمىس ىستەيتىن قۇرالى، - دەدى «اگرو ەگىن» شارۋا قوجالىعىنىڭ باسشىسى.

ازىق-تۇلىك كەلىسىمشارت كورپوراتسياسى ەگىن جيناۋ ناۋقانىنىڭ بارىسىن باقىلاۋدى جانە اگرارشىلارمەن ءوزارا بايلانىستى قولداۋدى جالعاستىرىپ جاتىر.

وسىعان دەيىن اپتاپ ىستىق پەن قۋاڭشىلىقتىڭ استىققا قالاي اسەر ەتەتىنى تۋرالى جازدىق.