قازاقستاندا تەگىن وقىپ، گرانت الىپ، جاڭا كاسىپ باستاۋعا بولادى

ۆەدومستۆو جۇمىس ىزدەۋ، كاسىبي دامۋ، كاسىپكەرلىكتى قولداۋ جانە جۇمىسپەن قامتۋعا جاردەمدەسۋدىڭ باسقا دا تەتىكتەرىن بىرىكتىرەتىن Enbek سيفرلىق ەكوجۇيەسىن دامىتۋدا. قاجەتتى قىزمەتتەردى ونلاين الۋعا نەمەسە مانساپ ورتالىعىنا جۇگىنۋگە بولادى.

جۇمىس ىزدەۋدى نەدەن باستاعان ءجون؟

Enbek.kz ەلەكتروندىق ەڭبەك بيرجاسىندا جانە Enbek موبيلدى قوسىمشاسىندا ازاماتتار جەكە كابينەتىن اشىپ، تۇيىندەمەسىن ورنالاستىرا الادى، وزىنە قولايلى بوس جۇمىس ورىندارىن تاڭداپ، جۇمىس بەرۋشىلەرگە ءوتىنىم جىبەرەدى.

سونداي-اق بۇل پلاتفورمالار ارقىلى جۇمىس ىزدەۋشى رەتىندە تىركەلىپ، كەيىننەن جۇمىسسىز مارتەبەسىن پرواكتيۆتى تۇردە الۋعا بولادى.

زاڭنامادا كوزدەلگەن تالاپتارعا سايكەس كەلگەن جاعدايدا ازامات جۇمىسىنان ايىرىلۋىنا بايلانىستى الەۋمەتتىك تولەم الۋعا ءوتىنىم بەرە الادى.

جاساندى ينتەللەكت قانداي كومەك كورسەتەدى؟

قوسىمشا مۇمكىندىكتەردى Enbek.kz پلاتفورماسى نەگىزىندە ەڭبەك مينيسترلىگى ەنگىزىپ جاتقان سيفرلىق جۇمىسپەن قامتۋ قىزمەتى ۇسىنادى.

ازاماتتىڭ كەلىسىمىمەن مەملەكەتتىك اقپاراتتىق جۇيەلەردەگى مالىمەتتەر نەگىزىندە ونىڭ ءبىلىمى، ەڭبەك ءوتىلى مەن كاسىبي داعدىلارى قامتىلعان سيفرلىق تۇيىندەمەسى اۆتوماتتى تۇردە قالىپتاستىرىلادى.

جاساندى ينتەللەكت جۇمىس ىزدەۋشىنىڭ بىلىكتىلىگى مەن قالاۋىن ەسكەرە وتىرىپ، وعان سايكەس كەلەتىن بوس جۇمىس ورىندارىن ىرىكتەۋگە كومەكتەسەدى.

- جاساندى ينتەللەكت كومەكشىسى ديالوگ فورماتىندا جۇمىس ىستەيدى جانە ازاماتقا وزىنە قولايلى جۇمىس نۇسقالارىن ءوز بەتىنشە تاڭداۋعا مۇمكىندىك بەرەدى. مىسالى، ۇيىنە جاقىن جەردەگى جۇمىستى ىزدەۋگە، باسقا وڭىرلەردەگى ۇسىنىستاردى قاراۋعا، قالاعان جالاقى مولشەرىن كورسەتۋگە نەمەسە وقۋ مۇمكىندىكتەرى مەن مەملەكەتتىك قولداۋ شارالارى بويىنشا ۇسىنىستار الۋعا بولادى، - دەلىنگەن مينيسترلىك اقپاراتىندا.

قوسىمشا ءبىلىم الۋ قاجەت بولسا، قانداي مۇمكىندىكتەر بار؟

بىلىكتىلىگىن ارتتىرعىسى نەمەسە جاڭا داعدىلاردى مەڭگەرگىسى كەلەتىن ازاماتتار Skills Enbek پلاتفورماسىندا تەگىن ونلاين كۋرستاردان وتە الادى.

جۇمىسسىز رەتىندە تىركەلگەن ازاماتتارعا ءبىلىم بەرۋ ۇيىمدارىندا نەمەسە تىكەلەي جۇمىس بەرۋشىنىڭ جۇمىس ورنىندا قىسقا مەرزىمدى كاسىپتىك وقۋدان ءوتۋ مۇمكىندىگى دە قاراستىرىلعان.

ال وزىندە بار كاسىبي داعدىلاردى رەسمي تۇردە راستاعىسى كەلەتىن ازاماتتار بەلگىلەنگەن تالاپتارعا سايكەس Career Enbek پلاتفورماسى ارقىلى كاسىپتىك بىلىكتىلىكتى تانۋ راسىمىنەن تەگىن وتۋگە ارنالعان ۆاۋچەر الۋعا ءوتىنىم بەرە الادى.

ءوز كاسىبىڭىزدى اشقىڭىز كەلسە، نە ىستەۋ كەرەك؟

كاسىپكەرلىكپەن اينالىسۋدى جوسپارلاعان ازاماتتارعا Business Enbek پلاتفورماسى قولجەتىمدى.

بۇل پلاتفورما ارقىلى ازاماتتار «باستاۋ بيزنەس» جوباسى بويىنشا كاسىپكەرلىك نەگىزدەرىنە وقۋعا قويىلاتىن تالاپتارعا سايكەستىگىن تەكسەرە الادى.

سونىمەن قاتار بەلگىلەنگەن تالاپتارعا ساي كەلگەن جاعدايدا جانە ءوتىنىم قابىلداۋ كەزەڭىندە ءوز بيزنەس-جوباسىن جۇزەگە اسىرۋ ءۇشىن مەملەكەتتىك گرانت الۋعا ءوتىنىم بەرە الادى.

بۇدان بولەك، پلاتفورما ارقىلى اۋىلدىق ەلدى مەكەندەر مەن شاعىن قالالاردا كاسىپكەرلىكتى دامىتۋعا باعىتتالعان «اۋىل اماناتى» باعدارلاماسى شەڭبەرىندە ميكروكرەديت الۋ جانە ليزينگ راسىمدەۋگە ءوتىنىم بەرۋ مۇمكىندىگى قاراستىرىلعان.

قازىرگى ۋاقىتتا بۇل ءوتىنىم بەرۋ سەرۆيسى الماتى، قىزىلوردا، ماڭعىستاۋ جانە باتىس قازاقستان وبلىستارىندا پيلوتتىق رەجيمدە جۇزەگە اسىرىلىپ جاتىر.

ءوز وڭىرىڭىزدە لايىقتى جۇمىس تابىلماسا شە؟

ازاماتتار ەلىمىزدىڭ باسقا وڭىرلەرىندەگى بوس جۇمىس ورىندارىن دا قاراستىرا الادى.

ونىڭ ىشىندە ەڭبەك كۇشى تاپشى وڭىرلەرگە ەرىكتى تۇردە قونىس اۋدارىپ، مەملەكەت تاراپىنان كوزدەلگەن قولداۋ شارالارىن پايدالانۋ مۇمكىندىگى بار.

Migration Enbek پلاتفورماسى ارقىلى قونىس اۋدارۋ ماسەلەلەرى بويىنشا كەڭەس الۋ ءۇشىن مانساپ ورتالىعىنا ءوتىنىم جولداۋعا بولادى.

جەكە كومەك الۋ ءۇشىن قايدا جۇگىنۋگە بولادى؟

ەگەر ازامات ءوز بەتىنشە جۇمىس تابا الماسا، تۇرعىلىقتى جەرى بويىنشا مانساپ ورتالىعىنا جۇگىنە الادى.

ماماندار جۇمىس ىزدەۋشى رەتىندە تىركەلۋگە كومەكتەسىپ، جۇمىسسىز مارتەبەسىن الۋ ءتارتىبىن تۇسىندىرەدى، لايىقتى بوس جۇمىس ورىندارىن ۇسىنادى، جۇمىسپەن قامتۋعا جاردەمدەسۋدىڭ قولجەتىمدى شارالارى تۋرالى اقپارات بەرىپ، جۇمىس بەرۋشىمەن سۇحباتتاسۋعا دايىندالۋعا كومەكتەسەدى.

سيفرلىق جۇمىسپەن قامتۋ قىزمەتى اياسىندا ەنگىزىلگەن جاڭا ءتاسىل بويىنشا ازاماتتارعا كورسەتىلەتىن كومەك ءبىر رەتتىك كونسۋلتاتسيامەن شەكتەلمەيدى.

ءاربىر جۇمىس ىزدەۋشىگە جەكە مامان بەكىتىلىپ، ول جۇمىس ىزدەۋدىڭ ءار كەزەڭىندە ازاماتتى سۇيەمەلدەيدى، جۇمىس بەرۋشىلەرمەن بايلانىس ورناتادى جانە الداعى ءىس-قيمىلداردى ايقىنداۋعا كومەكتەسەدى.

جۇمىسقا ورنالاسۋعا جاردەم الۋدىڭ العاشقى قادامى - Enbek.kz پلاتفورماسىندا تىركەلۋ نەمەسە مانساپ ورتالىعىنا بارۋ.

ءار ازامات ءوزىنىڭ قاجەتتىلىگىنە قاراي جۇمىس ىزدەۋ، جاڭا ماماندىق مەڭگەرۋ، كاسىبي بىلىكتىلىگىن راستاۋ، باسقا وڭىرگە قونىس اۋدارۋ نەمەسە جەكە كاسىبىن باستاۋ مۇمكىندىكتەرىن پايدالانا الادى.

ايتا كەتەيىك، بۇعان دەيىن ەلىمىزدە جۇمىسقا ورنالاستىرۋدىڭ جاڭا ءتاسىلى ەنگىزىلىپ جاتقانى حابارلانعان بولاتىن. سيفرلىق جۇمىسپەن قامتۋ قىزمەتى 2026-جىلعى شىلدەدەن باستاپ پاۆلودار جانە ماڭعىستاۋ وبلىستارىندا ىسكە اسىرىلىپ، وسى ۋاقىت ىشىندە 59,2 مىڭ ازاماتقا قولداۋ كورسەتىلگەن. ونىڭ 7,5 مىڭى جۇمىسقا ورنالاسقان.