قازاقستاندا سوعىم باعاسى قانشا

سوعىم باعاسى مالدى قايدا باققانىنا، جاسىنا جانە قالاي ساتىپ الاتىنىنا قاراي وزگەرەدى. كەيبىر قالادا باعا جۇزدەگەن مىڭ تەڭگە بولسا، كەيبىر وڭىردە ميلليون تەڭگەگە دەيىن جەتتى. كەلىلەپ ساتىپ السا، باعا مۇلدە باسقا بولادى. Kazinform ءتىلشىسى 20 قالاداعى سوعىم باعاسىن ءبىلىپ، سالىستىردى.

سوعىم باعاسى قايدا جوعارى، قاي قالادا تومەن

قازاقستان قالالارىنداعى بازار باعاسىن سالىستىرا كەلە، سوعىم باعاسى ميلليون تەڭگەگە دەيىن جەتكەنىن بىلدىك. الماتى، شىمكەنت، پاۆلودار، كوكشەتاۋ مەن وسكەمەندە وسىنداي باعا كەزىكتى. استانا قالاسىندا باعا 230000 تەڭگەدەن باستالىپ، 800000 تەڭگەگە دەيىن جەتتى. تالدىقورعاندا 400000-850000 تەڭگە ارالىعىندا.

قاراعاندى مەن جەزقازعان قالالارىندا سوعىم باعاسى 350000 تەڭگەدەن باستالىپ، 750000 تەڭگەگە دەيىن بارادى. ال قوستانايدا باعا 500000-850000 تەڭگە ارالىعىندا. تاراز قالاسىندا 500000 تەڭگەدەن باستالىپ، 850000 تەڭگەگە جەتتى. تۇركىستان قالاسىندا سوعىم باعسى 500000-700000 تەڭگە ارالىعىندا.

اتىراۋ قالاسىندا سوعىمعا جىلقى سويسا، 500000-600000 تەڭگە بولادى. سەمەي قالاسىندا سوعىمعا جاس مال سويسا، 270000-300000 تەڭگەگە ەسەپتەلەدى. ال ەكى جاسار قاشار باعاسى - 350000-400000 تەڭگە. جاباعى 370000 تەڭگە بولسا، بايتال مەن بيە باعاسى 500000 تەڭگەدەن باستالادى.

ورال قالاسىندا جاباعىنىڭ باعاسى 225000 تەڭگە، ال بيە باعاسى 450000 تەڭگە جانە ودان جوعارى. اقتوبە قالاسىندا جاباعى باعاسى 250000-300000 تەڭگە، بيە 500000-600000 تەڭگە. سيىر باعاسى 500000-800000 تەڭگە، وگىز قۇنى 600000-700000 تەڭگە ارالىعىندا.

شىمكەنت قالاسىندا بيە باعاسى 500000 تەڭگەدەن باستالىپ ميلليونعا جەتەدى. سيىر باعاسى دا 420000 تەڭگە جانە ميلليونعا دەيىن كوتەرىلەدى. وگىزدى 600000-700000 تەڭگەگە ساتىپ الۋعا بولادى. اقتاۋ قالاسىندا سيىر باعاسى 350000 تەڭگەدەن باستالسا، جىلقىنى 750000 تەڭگەگە باعالايدى.

قونايەۆ قالاسىنداعى حابارلاندىرۋلارعا سۇيەنسەك، سوعىمدى 550000-800000 تەڭگەگە ساتىپ الۋعا بولادى. قىزىلوردادا ءمۇيىزدى ءىرى قارا باعاسى 350000-850000 تەڭگە ارالىعىندا.

سيىر مەن جىلقى باعاسى جاسىنا قاراي وزگەرىپ وتىرادى. جاس مال باعاسى ادەتتە تومەن بولادى. جاباعى باعاسى ارزان. كەيدە ونى جىلىكتەپ، اياقتاپ ساتىپ الۋعا مۇمكىندىك بار. ادامدار ساۋداسالىپ تا ءتيىمدى ۇسىنىستى تابادى. دەمەك قالالار اراسىنداعى رەيتينگ ناقتى ەمەس.

جىلقى مەن سيىر ەتىنىڭ باعاسى قانشا

سوعىمدى بۇتىندەي دە، ەكى ءبولىپ تە ساتىپ الۋعا بولادى. ادامدار قالتاسىنا قاراي اياقتاپ، جىتىكتەپ تە الادى. مۇندايدا باعا ەتتىڭ كەلىسىنە تىكەلەي بايلانىستى.

تۇركىستان قالاسىندا جىلقى ەتىنىڭ كەلىسى 2800-3000 تەڭگە، سيىر ەتى 3000-3200 تەڭگە، ال وگىز ەتى - 4000-4200 تەڭگە ارالىعىندا. جىلقى ەتىنىڭ ءبىر جىلىگى شامامەن 23-27 كەلى بولسا، باعاسى 70-75 مىڭ تەڭگەگە شىعادى. ال سيىر ەتى 75-80 مىڭ تەڭگە بولادى.

اقتاۋ قالاسىندا جىلقى ەتىنىڭ كەلىسى 2700-3200 تەڭگە، سيىر ەتىنىڭ كەلىسى 3800-4000 تەڭگە. اتىراۋ قالاسىندا جاباعى ەتىنىڭ كەلىسى 2900-3200 تەڭگە بولسا، سيىر ەتىنىڭ باعاسى شامامەن 4000 تەڭگە.

پەتروپاۆل قالاسىندا سيىر ەتىنىڭ كەلىسى - 3800-4000 تەڭگە. ورال قالاسىندا سيىر ەتىنىڭ كەلىسى شامامەن 3000 تەڭگە بولىپ تۇر. تاراز قالاسىندا جىلقى ەتىنىڭ باعاسى 3100 تەڭگە، سيىر ەتى 3700-3800 تەڭگە.

سەمەي قالاسىندا جاباعى ەتىنىڭ كەلىسىن 3200 تەڭگەگە ەسەپتەپ بەرەدى. سالماعى 125-155 تەڭگە بولاتىن باسپاق ەتىنىڭ كەلىسى 3400 تەڭگە.

استانا قالاسىندا سيىر ەتىنىڭ كەلىسى 3950 تەڭگەدەن باستالادى. جاباعى ەتىنىڭ كەلىسى 3450 تەڭگە بولسا، بيە ەتىنىڭ قازىسى مايلى بولسا كەلىسى 4000 تەڭگەدەن باستالادى.

تىرىدەي العان ءتيىمدى مەالدەكەلىلەپالساۇتاما؟

سوعىم تاڭداعان كەزدە ونىڭ قوسىمشا شىعىنىن دا ەسەپتەگەن دۇرىس. ەگەر تىرىدەي ساتىپ السا، ونى سويۋ جانە ىشەك-قارنىن تازارتۋ كەرەك. جەتكىزۋ دە قوسىمشا قارجىنى تالاپ ەتەدى. مال تاڭداي بىلەتىن ادام سوعىمدى تىرىدەي السا قانشا ەت شىعاتىنىن، سەمىز نەمەسە ارىق ەكەنىن بىردەن بىلەدى.

ەگەر اياقتاپ نەمەسە جىلىكتەپ ساتىپ السا، ەتتىڭ سالماعى قانشا بولاتىنىن بىردەن بىلۋگە بولادى. سوعىم ەتى قىسقا جەتە مە دەگەن سۇراقتىڭ دا جاۋابى تابىلادى. ءبىر وتباسى سيىر نەمەسە جىلقىنى بۇتىندەي ساتىپ السا، ءوزى جىلىكتەپ، ساقتايدى. سوندىقتان تىرىدەي جانە كەلىلەپ ساتىپ الۋدىڭ تيىمدىلىگى ەكى باسقا.

سونىمەن بىرگە سوعىم ەتىن قالاي ساتاتىنىنا ءدا مان بەرۋ كەرەك. ءبىرى باسىن، سيراعىن جانە ىشەك-قارنى مەن وكپە-باۋىرىن دا ولشەيدى. ال كەيبىر ساتۋشىلار تەك تازا ەتتى ەسەپتەيدى. سوندىقتان ساتىپ الار كەزدە سوعىم ەتىن جەتكىزۋ قىزمەتىنە نە كىرەتىنىن سۇراپ العان دۇرىس.

سوعىم باعاسى نەنى كورسەتتى؟

قازاقستاندا سوعىم باعاسىندا ايتارلىقتاي ايىرماشىلىق بار. كەيبىر وڭىردە جاس مالدى 225000-350000 تەڭگەگە ساتىپ الۋعا بولادى. ال سيىر مەن بيە ەتىنىڭ باعاسى 500000-800000 تەڭگە جانە ودان جوعارى. باعا مالدىڭ جاسى، قايدا جايىلعانى، قوڭدىلىعى مەن قانداي جىلىك ەكەنىنە قاراي وزگەرەدى.

Kazinform بۇعان دەيىن ەلىمىزدەگى شۇجىق باعاسىن سالىستىرعان ەدى.