قازاقستاندا سۋ تاسقىنىن بولجايتىن اقپاراتتىق ورتالىق جۇمىسىن باستادى
استانا. KAZINFORM - ەلىمىزدە سۋ تاسقىنىن الدىن الا بولجاۋعا، سۋ قويمالارىنىڭ جۇمىسىن مودەلدەۋگە جانە سۋ رەسۋرستارىنىڭ كەلۋ كولەمىن باعالاۋعا مۇمكىندىك بەرەتىن سۋ رەسۋرستارىنىڭ اقپاراتتىق ورتالىعى ىسكە قوسىلدى.
بۇل تۋرالى سۋ رەسۋرستارى جانە يرريگاتسيا ۆيتسە-ءمينيسترى جاندوس ءسالىموۆ مالىمدەدى.
ۆيتسە-ءمينيستردىڭ ايتۋىنشا، ورتالىقتى قۇرۋ جانە ونىڭ جۇمىسىن ۇيىمداستىرۋ ماسەلەسى مەملەكەت باسشىسىنىڭ 28-قازانداعى جولداۋىندا دا ايتىلعان.
- قازىرگى ۋاقىتتا ورتالىق اشىلدى، قاجەتتى جۇمىستاردىڭ ءبارى جۇرگىزىلدى. ەندى ول سۋ تاسقىنىن بولجاۋمەن اينالىسادى. سونداي-اق «قازگيدرومەتپەن» بىرلەسىپ، سۋ كولەمىنىڭ بولجامىن جاسايدى، - دەدى جاندوس ءسالىموۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
جاڭا ورتالىق سۋ شارۋاشىلىعى نىساندارىنىڭ، سونىڭ ىشىندە سۋ قويمالارىنىڭ جۇمىسىن مودەلدەيدى. ماماندار ولاردىڭ جاي-كۇيىن، سۋ قوزعالىسىن، سۋ قويمالارىنا كەلەتىن سۋ كولەمىن باقىلاپ، الداعى كەزەڭدەگى سۋ رەسۋرستارىنىڭ بولجامدى مولشەرىن باعالايدى.
ايتا كەتەيىك، اقمولا وبلىسىندا سۋ تاسقىنىنىڭ الدىن الۋ جوبالارىنا 5,5 ميلليارد تەڭگە ءبولىندى.
قازاقستاننىڭ بەس وبلىسىندا كوكتەمگى تاسقىن سۋدى جەر استىنا جيناپ، سۋ قورىن تولىقتىرۋ مۇمكىندىگى زەرتتەلگەن.
