قازاقستاندا قىزىل كىتاپقا ەنگەن جىرتقىش كادرعا ىلىكتى
استانا. KAZINFORM - «التىن-ەمەل» مەملەكەتتىك ۇلتتىق تابيعي پاركىندە ورناتىلعان فوتوتۇزاققا قىزىل كىتاپقا ەنگەن تۇركىستان سىلەۋسىنى ءوز كۇشىكتەرىمەن بىرگە ءتۇسىپ قالدى.
پارك اكىمشىلىگى Instagram-داعى پاراقشاسىندا جىرتقىشتىڭ فوتوتۇزاققا تۇسكەن كادرلارىن جاريالادى. سۋرەتتەردە انالىق سىلەۋسىن مەن ونىڭ كۇشىكتەرى تاستى القاپتى ارالاپ، اينالانى باقىلاپ، جارتاستارعا ءيىس قالدىرىپ ءجۇر. پارك قىزمەتكەرلەرى بۇل اڭداردىڭ ءوز يەلىگىن بەلگىلەۋ ءتاسىلى ەكەنىن تۇسىندىرگەن.
مامانداردىڭ پىكىرىنشە، سىلەۋسىن ادامعا سيرەك كورىنەتىن، وتە ساق ءارى جاسىرىن تىرشىلىك ەتەتىن جىرتقىش، سوندىقتان فوتوتۇزاققا تۇسكەن ءار كادر ايرىقشا قۇندى.
تۇركىستان سىلەۋسىنى قانداي جىرتقىش؟
بۇل ورتالىق ازيادا تارالعان، مىسىقتار تۇقىمداسىنا جاتاتىن جىرتقىش سۇتقورەكتى. ول ادامنان تاسالانىپ، ولجاسىن اڭدۋعا قولايلى تاستى القاپتاردى، ورمانداردى جانە جەتۋ قيىن تاۋلى وڭىرلەردى مەكەندەيدى. جانۋاردى قۇلاعىنىڭ ۇشىنداعى قارا شوقتان، ۇشى قارا قىسقا قۇيرىعىنان جانە جۇنىندەگى داقتاردان تانىپ بىلۋگە بولادى.
تۇركىستان سىلەۋسىنى قازاقستاننىڭ قىزىل كىتابىنا ەنگىزىلگەن جانە مەملەكەت قورعاۋىندا. ب ا ق مالىمەتىنشە، ونى اۋلاۋعا 1976-جىلدان باستاپ تىيىم سالىنعان. ءبىزدىڭ ەلدە ول الماتى قورىعىندا، جوڭعار الاتاۋى مەن ىلە الاتاۋى ۇلتتىق پاركتەرىندە، سونداي-اق التىن-ەمەل اۋماعىندا تىرشىلىك ەتەدى. سىلەۋسىندەردىڭ سانىن انىقتاپ، ولاردىڭ تىرشىلىگىن باقىلاۋ ءۇشىن ماماندار فوتوتۇزاقتاردى پايدالانادى.
