قازاقستاندا قىس مەزگىلى قانداي بولادى؟ قازگيدرومەت بولجام جاسادى

قازگيدرومەتتىڭ ماۋسىمدىق كونسۋلتاتيۆتىك بولجامىنا سايكەس، جەلتوقسان ايىندا ەلدىڭ بارلىق وڭىرىندە ورتاشا تەمپەراتۋرا كليماتتىق نورمادان 2 گرادۋس جوعارى بولۋى ىقتيمال.

قاراشادا قار جاۋىپ، تۇندە اياز كۇشەيەدى

قاراشادا قازاقستاننىڭ باسىم بولىگىندە اۋا تەمپەراتۋراسى ادەتتەگىدەن 1-2 گرادۋس جوعارى بولادى دەپ كۇتىلەدى. ال ەلدىڭ سولتۇستىك-باتىسىندا تەمپەراتۋرا كليماتتىق نورماعا ساي بولادى.

اي بويى جاڭبىر مەن قار جاۋىپ، كەي جەرلەردە جاۋىن-شاشىن مول ءتۇسۋى مۇمكىن. سونىمەن قاتار جەل كۇشەيىپ، بۇرقاسىن سوعىپ، تۇمان تۇسەدى. جولداردا كوكتايعاق بولۋى دا ىقتيمال.

سينوپتيكتەردىڭ ماۋسىمدىق بولجامىندا ەلدىڭ سولتۇستىگىندە، شىعىسىندا جانە ورتالىعىندا كەي تۇندەرى اۋا تەمپەراتۋراسى 18- گرادۋسقا دەيىن تومەندەۋى مۇمكىن ەكەنى ايتىلعان. سولتۇستىك پەن شىعىستا نەگىزىنەن قار جاۋسا، باسقا وڭىرلەردە جاڭبىر مەن جىلبىسقى قار كۇتىلەدى.

جەلتوقساندا سولتۇستىك وڭىرلەردە جاۋىن-شاشىن مول تۇسەدى

جەلتوقسان ايىندا قازاقستاننىڭ باسىم بولىگىندە جاۋىن-شاشىن مولشەرى كليماتتىق نورماعا ساي بولادى دەپ بولجانىپ وتىر. الايدا سولتۇستىك قازاقستان وبلىسىندا، پاۆلودار وبلىسىنىڭ باسىم بولىگىندە، قوستاناي مەن اقمولا وبلىستارىنىڭ سولتۇستىك جارتىسىندا جاۋىن-شاشىن ادەتتەگىدەن كوپ ءتۇسۋى مۇمكىن.

سونداي-اق باتىس قازاقستان، اقتوبە جانە شىعىس قازاقستان وبلىستارىنىڭ سولتۇستىگىندە، اباي وبلىسىندا دا جاۋىن-شاشىن مولشەرى نورمادان جوعارى بولادى دەپ كۇتىلەدى. ال قىزىلوردا وبلىسىنىڭ وڭتۇستىگىندە جاۋىن-شاشىن ادەتتەگىدەن از بولۋى ىقتيمال.

قاڭتاردا اۋا رايى نەگىزىنەن جىلى بولادى

قاڭتاردا قازاقستاننىڭ باسىم بولىگىندە ورتاشا اۋا تەمپەراتۋراسى كليماتتىق نورمادان 1-2 گرادۋس جوعارى بولۋى مۇمكىن.

ال باتىس قازاقستان وبلىسىندا، اتىراۋ، اقتوبە، قوستاناي جانە سولتۇستىك قازاقستان وبلىستارىنىڭ باسىم بولىگىندە، سونداي-اق اقمولا وبلىسىنىڭ سولتۇستىك-باتىسىندا تەمپەراتۋرا ادەتتەگى دەڭگەيدە ساقتالادى دەپ بولجانىپ وتىر.

ەل اۋماعىنىڭ باسىم بولىگىندە جاۋىن-شاشىن مولشەرى كليماتتىق نورماعا ساي بولادى. ال باتىس قازاقستان وبلىسىنىڭ وڭتۇستىك-باتىسىندا، اتىراۋ وبلىسىنىڭ باتىسىندا جانە ماڭعىستاۋ وبلىسىندا جاۋىن-شاشىن كوبىرەك ءتۇسۋى مۇمكىن.

كەرىسىنشە، قىزىلوردا وبلىسىنىڭ وڭتۇستىك-شىعىسىندا، ۇلىتاۋ وبلىسىنىڭ قيىر وڭتۇستىك-شىعىسىندا، قاراعاندى وبلىسى مەن اباي وبلىسىنىڭ وڭتۇستىگىندە جاۋىن-شاشىن از بولادى دەپ كۇتىلەدى. سونداي-اق تۇركىستان، جامبىل جانە الماتى وبلىستارىنىڭ سولتۇستىك بولىگىندە، جەتىسۋ وبلىسىندا دا جاۋىن-شاشىن مولشەرى نورمادان تومەن بولۋى ىقتيمال.

اقپاندا جاۋىن-شاشىن كوبەيەدى

اقپان ايىندا قازاقستاننىڭ باسىم بولىگىندە اۋا تەمپەراتۋراسى كليماتتىق نورمادان 1-3 گرادۋس جوعارى بولادى دەپ بولجانىپ وتىر.

ال سولتۇستىك قازاقستان جانە شىعىس قازاقستان وبلىستارىندا، پاۆلودار وبلىسىنىڭ باسىم بولىگىندە، اباي وبلىسىنىڭ سولتۇستىك-شىعىسىندا، سونداي-اق قوستاناي مەن اقمولا وبلىستارىنىڭ سولتۇستىگىندە تەمپەراتۋرا كليماتتىق نورما شاماسىندا ساقتالۋى مۇمكىن.

ەلدىڭ باسىم بولىگىندە جاۋىن-شاشىن ادەتتەگىدەن كوپ تۇسەدى دەپ كۇتىلەدى. ال ماڭعىستاۋ وبلىسىنىڭ وڭتۇستىك-شىعىسىندا، اقتوبە وبلىسىنىڭ وڭتۇستىگىندە جانە قىزىلوردا وبلىسىنىڭ وڭتۇستىك-باتىسىندا جاۋىن-شاشىن مولشەرى نورمادان از بولۋى ىقتيمال.

جالپى، قىس بويى بوران سوعىپ، جەل كۇشەيىپ، تۇمان مەن كوكتايعاق بولۋى مۇمكىن. اۋا تەمپەراتۋراسىنىڭ جيى قۇبىلۋىنا بايلانىستى قاردىڭ بەتىندە مۇز قاباتى ءتۇزىلۋى دە ىقتيمال.