قازاقستاندا قۇرىلىس قارقىنى ارتتى: قاي وڭىرلەر كوش باستاپ تۇر؟

استانا. KAZINFORM - قازاقستاندا 2026-جىلعى قاڭتار-قازان ايلارىندا قۇرىلىس جۇمىستارىنىڭ كولەمى وتكەن جىلدىڭ سايكەس كەزەڭىمەن سالىستىرعاندا 13,1 پايىزعا ارتتى.

ا
Фото: Ұлттық статистика бюросы

رەسپۋبليكا بويىنشا ورىندالعان قۇرىلىس جۇمىستارىنىڭ 89,5 پايىزى جەكە قۇرىلىس ۇيىمدارىنا، 9,8 پايىزى شەتەلدىك كومپانيالارعا، ال 0,7 پايىزى مەملەكەتتىك ۇيىمدارعا تيەسىلى.

قۇرىلىس جۇمىستارى كولەمىنىڭ ارتۋىنا، نەگىزىنەن، يماراتتاردى سالۋ جانە جوندەۋ جۇمىستارىنىڭ 15,8 پايىزعا ءوسۋى اسەر ەتكەن.

ورىندالعان قۇرىلىس جۇمىستارىنىڭ قۇرىلىمىندا اۆتوموبيل جولدارى، تەمىرجولدار مەن مەترو قۇرىلىسى ەڭ ۇلكەن ۇلەستى - 25,4 پايىزدى قۇرادى. ودان كەيىن تۇرعىن ەمەس عيماراتتار قۇرىلىسى - 21,5 پايىز جانە تۇرعىن ۇيلەر قۇرىلىسى - 12,6 پايىز.

- اۋماقتىق بولىنىسىندە رەسپۋبليكانىڭ ون سەگىز وڭىرىندە قۇرىلىس جۇمىستارى كولەمىنىڭ ۇلعايۋى بايقالادى. ەداۋىر ءوسۋ ۇلىتاۋ (2,3 ەسە)، قىزىلوردا (30,5 پايىز)، اتىراۋ (25,7 پايىز) جانە پاۆلودار (23,8 پايىز) وبلىستارىندا، الماتى قالاسىندا (23,1 پايىز)، تۇركىستان (20,6 پايىز)، شىعىس قازاقستان (15,5 پايىز)، باتىس قازاقستان (15,4 پايىز)، اقتوبە (14,2 پايىز) جانە اباي (13,1 پايىز) وبلىستارىندا جانە استانا قالاسىندا (11,8 پايىز) بايقالادى، - دەلىنگەن ستاتيستيكالىق اقپاراتتا.

بيىلعى ون ايدا پايدالانۋعا بەرىلگەن جاڭا نىسانداردىڭ جالپى الاڭى 18 ميلليون 316,3 مىڭ شارشى مەترگە جەتتى.

ال پايدالانۋعا بەرىلگەن تۇرعىن ۇيلەردىڭ جالپى الاڭى وتكەن جىلدىڭ سايكەس كەزەڭىمەن سالىستىرعاندا 2,1 پايىزعا ۇلعايىپ، 14 ميلليون 919,8 مىڭ شارشى مەتردى قۇرادى.

ونىڭ ىشىندە 9 ميلليون 643,3 مىڭ شارشى مەترى كوپپاتەرلى تۇرعىن ۇيلەرگە، 5 ميلليون 212,3 مىڭ شارشى مەترى جەكە ۇيلەرگە تيەسىلى.

تۇرعىن ۇيلەردىڭ باسىم بولىگىن، ياعني 14 ميلليون 178,1 مىڭ شارشى مەترىن نەمەسە 95 پايىزىن جەكە قۇرىلىس سالۋشىلار پايدالانۋعا بەرگەن. سونىڭ ىشىندە حالىقتىڭ ءوز كۇشىمەن سالعان تۇرعىن ۇيلەرىنىڭ جالپى الاڭى 5 ميلليون 648,1 مىڭ شارشى مەتر بولدى.

وڭىرلەر اراسىندا تۇرعىن ءۇي قۇرىلىسىنىڭ ەداۋىر كولەمى الماتى وبلىسىندا تىركەلدى. مۇندا 1 ميلليون 107,5 مىڭ شارشى مەتر تۇرعىن ءۇي پايدالانۋعا بەرىلىپ، ءوسىم 16,9 پايىزدى قۇرادى.

تۇركىستان وبلىسىندا 988,5 مىڭ شارشى مەتر تۇرعىن ءۇي پايدالانۋعا بەرىلدى. بۇل وتكەن جىلدىڭ سايكەس كەزەڭىمەن سالىستىرعاندا 6,2 پايىزعا كوپ.

قىزىلوردا وبلىسىندا 804,1 مىڭ شارشى مەتر (4,9+ پايىز)، اقتوبە وبلىسىندا 760,8 مىڭ شارشى مەتر (2,2+ پايىز)، جامبىل وبلىسىندا 588,3 مىڭ شارشى مەتر (0,4+ پايىز) تۇرعىن ءۇي پايدالانۋعا بەرىلدى.

بۇدان بولەك، 2026-جىلعى قاڭتار-قازان ايلارىندا ەلىمىزدە ءبىلىم بەرۋ جانە دەنساۋلىق ساقتاۋ سالاسىندا ءبىرقاتار الەۋمەتتىك نىسان ىسكە قوسىلدى.

اتاپ ايتقاندا، 22610 وقۋشى ورنىنا ارنالعان 44 جالپى ءبىلىم بەرەتىن مەكتەپ، 5437 ورىندىق 37 مەكتەپكە دەيىنگى ۇيىم پايدالانۋعا بەرىلدى.

سونداي-اق ءبىر اۋىسىمدا 328 ادام قابىلداۋعا ارنالعان 9 امبۋلاتوريالىق-ەمحانالىق ۇيىم ىسكە قوسىلىپ، اۋرۋحانالاردا قوسىمشا 120 توسەك-ورىن پايدالانۋعا بەرىلدى.

ايتا كەتەيىك، بۇعان دەيىن قازاقستاندا 2026-جىلدىڭ العاشقى توعىز ايىندا قۇرىلىس جۇمىستارىنىڭ كولەمى 11,5 پايىزعا ءوسىپ، 7,8 تريلليون تەڭگەدەن اسقانى حابارلانعان ەدى. وسى كەزەڭدە 13,2 ميلليون شارشى مەتر تۇرعىن ءۇي پايدالانۋعا بەرىلگەن.