قازاقستاندا قاي ماماندىق يەلەرى جۇمىسسىز قالمايدى

قازاقستاندا بىلىكتى ماماندارعا دەگەن سۇرانىس جوعارى دەڭگەيدە ساقتالىپ وتىر. مينيسترلىكتىڭ اقپاراتتىق جۇيەلەرىندەگى دەرەكتەرگە سايكەس، كادر تاپشىلىعى اسىرەسە دەنساۋلىق ساقتاۋ سالاسىندا، سونداي-اق جەكەلەگەن جۇمىسشى، تەحنيكالىق جانە ينجەنەرلىك ماماندىقتار بويىنشا بايقالادى. سونىمەن قاتار ونەركاسىپتىڭ، تسيفرلىق تەحنولوگيالاردىڭ جانە ينفراقۇرىلىمنىڭ دامۋى ازاماتتاردى جۇمىسپەن قامتۋعا جانە كاسىبي تۇرعىدان وسۋىنە جاڭا مۇمكىندىكتەر اشىپ وتىر.

469 بوس ورىنعا 100 تۇيىندەمە: دارىگەرلەر قاي سالادا جەتىسپەيدى

بيىل مامان تاپشىلىعى ايقىن بايقالعان سالالاردىڭ ءبىرى - دەنساۋلىق ساقتاۋ.

ماسەلەن، اكۋشەر- گينەكولوگتەرگە ارنالعان 469 بوس جۇمىس ورنىنا نەبارى 100 تۇيىندەمە، پەدياترلاردىڭ 448 بوس ورنىنا 139 تۇيىندەمە، ال انەستەزيولوگ- رەانيماتولوگتەردىڭ 300 بوس ورنىنا 75 تۇيىندەمە عانا تىركەلگەن. ونكولوگ، نەوناتولوگ جانە ەندوكرينولوگ ماماندارىنا دا سۇرانىس جوعارى.

ەلەكتريكتەردەن IT ماماندارعا دەيىن: كىمدەرگە سۇرانىس جوعارى؟

سونىمەن قاتار جۇمىسشى ماماندىقتارىنىڭ وكىلدەرىنە دە سۇرانىس ساقتالىپ وتىر. جۇمىس بەرۋشىلەرگە بىلىكتى ەلەكتريكتەر، مەحانيكتەر، سلەسارلار، دانەكەرلەۋشىلەر، ماشينيستەر، جابدىق وپەراتورلارى، قۇرىلىسشىلار مەن جۇرگىزۋشىلەر قاجەت. وسى ورايدا ينجەنەرلەر مەن وندىرىستىك پروتسەستەردى اۆتوماتتاندىرۋ جونىندەگى ماماندارعا دا قاجەتتىلىك ارتۋدا.

بۇل ماماندارعا سۇرانىس ونەركاسىپتىڭ دامۋىنا، جاڭا نىسانداردىڭ سالىنۋىنا، كاسىپورىنداردىڭ جاڭعىرتىلۋىنا، كولىك جانە ەنەرگەتيكالىق ينفراقۇرىلىمنىڭ كەڭەيۋىنە بايلانىستى. قازىرگى جۇمىس بەرۋشىلەردەن كاسىبي بىلىكتىلىكپەن قاتار زاماناۋي تەحنولوگيالاردى مەڭگەرۋ دە تالاپ ەتىلەدى.

سۇرانىس جوعارى تاعى ءبىر باعىت - سيفرلىق تەحنولوگيالار سالاسى. ەڭبەك نارىعىندا باعدارلامالىق قامتاماسىز ەتۋدى ازىرلەۋشىلەر، قولدانبالى باعدارلامالاردى جاساۋشىلار جانە باسقا دا IT ماماندار قاجەت. اۆتوماتتاندىرۋ مەن جاساندى ينتەللەكتىنى ەنگىزۋ كاسىبي قىزمەتىندە سيفرلىق قۇرالداردى ءتيىمدى پايدالانا الاتىن ماماندارعا دەگەن سۇرانىستى ارتتىرىپ وتىر.

ۇزاق مەرزىمدى بولجامعا سايكەس، 2035-جىلعا دەيىن قازاقستان ەكونوميكاسىنا 2,9 ميلليون مامان قاجەت بولادى. ونىڭ جارتىسىنان استامىنا دەگەن سۇرانىس جۇمىسشى كاسىپتەرىنە تيەسىلى. بۇل ەكونوميكانى بىلىكتى كادرلارمەن قامتاماسىز ەتۋدە تەحنيكالىق جانە كاسىپتىك ءبىلىم بەرۋدىڭ ماڭىزى ارتىپ كەلە جاتقانىن كورسەتەدى.

ەڭبەك نارىعىنىڭ قاجەتتىلىكتەرىنە ساي كادرلاردى الدىن الا دايارلاۋ ماقساتىندا 2026 -جىلى ەڭ سۇرانىسقا يە ماماندىقتار ءتىزىمى 51 دەن 174 كە دەيىن كەڭەيتىلدى. تىزىمگە ينجەنەريا، قۇرىلىس، وڭدەۋ ونەركاسىبى، بيوتەحنولوگيا، جاسىل جانە اتوم ەنەرگەتيكاسى باعىتتارى ەنگىزىلدى.

كوللەدجدەر مەن كاسىپورىندار مامانداردى بىرلەسىپ دايارلايدى

سونىمەن قاتار مامانداردى جۇمىس بەرۋشىلەرمەن بىرلەسىپ دايارلاۋ جۇيەسى دامىپ كەلەدى. ق ر ۇكىمەتىنىڭ دەرەكتەرىنە سايكەس، بۇگىندە دۋالدى وقىتۋ جۇيەسىمەن 552 كوللەدجدىڭ 138 مىڭ ستۋدەنتى قامتىلعان. كادر دايارلاۋ پروتسەسىنە شامامەن 11 مىڭ كاسىپورىن قاتىسادى. بۇدان بولەك، 43 مىڭ ستۋدەنت جۇمىس بەرۋشىلەردىڭ نىسانالى تاپسىرىسى بويىنشا ءبىلىم الىپ جاتىر.

مۇنداي وقىتۋ فورماتى ستۋدەنتتەرگە كاسىپورىنداردا تىكەلەي تاجىريبە جيناقتاۋعا، بولاشاق ماماندىعىمەن تانىسۋعا جانە وقۋىن اياقتاعاننان كەيىن جۇمىسقا ورنالاسۋ مۇمكىندىگىن ارتتىرۋعا جول اشادى.

سونىمەن بىرگە جاڭا ماماندىق مەڭگەرگىسى نەمەسە بىلىكتىلىگىن ارتتىرعىسى كەلەتىن ازاماتتار قىسقا مەرزىمدى كاسىپتىك وقىتۋ جانە قايتا دايارلاۋ باعدارلامالارىن پايدالانا الادى. ولاردىڭ قاتارىندا جۇمىس بەرۋشىلەر سۇرانىسىنا يە باعىتتار بويىنشا ءبىلىم الۋ مۇمكىندىكتەرى دە بار.

كادر تاپشىلىعى بىلىكتىلىكتەردىڭ سايكەس كەلمەۋىنەن تۋىندايدى

جالپى، ەڭبەك نارىعىنداعى جاعداي كادر تاپشىلىعى ەڭبەك رەسۋرستارىنىڭ جالپى جەتىسپەۋشىلىگىنەن گورى، قولدا بار بىلىكتىلىكتەردىڭ ەكونوميكا قاجەتتىلىكتەرىنە سايكەس كەلمەۋىمەن بايلانىستى ەكەنىن كورسەتەدى. سوندىقتان سۇرانىسقا يە باعىتتار بويىنشا ماماندار دايارلاۋ، پراكتيكالىق داعدىلاردى دامىتۋ جانە ءبىلىم بەرۋ ۇيىمدارىنىڭ جۇمىس بەرۋشىلەرمەن ءوزارا بايلانىسىن نىعايتۋ ەرەكشە ماڭىزعا يە.

كادرلارعا دەگەن قاجەتتىلىكتى بولجاۋ بولاشاعى بار ماماندىقتاردى الدىن الا ايقىنداۋعا، ءبىلىم بەرۋ باعدارلامالارىن جەتىلدىرۋگە جانە ازاماتتارعا ماماندىق تاڭداۋ نەمەسە كاسىبي باعىتىن وزگەرتۋ كەزىندە سانالى شەشىم قابىلداۋعا كومەكتەسەدى.

وسىعان دەيىن 2026-جىلعى ساۋىردە ۇلتتىق ستاتيستيكا بيۋروسى قىزمەتكەرلەردىڭ ەسەپتەلگەن جالاقى مولشەرى بويىنشا بولىنىسىنە جىل سايىنعى زەرتتەۋ جۇرگىزگەنىن جازدىق.