قازاقستاندا قانشا سوعىس ارداگەرى قالدى جانە ولار قانداي قولداۋ الادى

مۇنداي دەرەكتەردى ەڭبەك جانە حالىقتى الەۋمەتتىك قورعاۋ مينيسترلىگى ۇسىندى.

بۇگىندە ارداگەرلەردىڭ ورتاشا جاسى - 101 جاس، ەڭ ۇلكەنى - 105 جاستا. ولاردىڭ قاتارىندا 43 ءى - سوعىسقا قاتىسۋشىلار، ال 14 ادام - سوعىس جىلدارىندا مۇگەدەكتىك العاندار.

ارداگەرلەر قاي وڭىرلەردە تۇرادى

ۆەدومستۆو مالىمەتىنشە، وڭىرلەر بويىنشا ءبولىنىس كەلەسىدەي:

- الماتى قالاسى - 14 ارداگەر؛

- شىعىس قازاقستان، باتىس قازاقستان جانە قاراعاندى وبلىستارى - ءارقايسىسىندا 6 دان؛

- الماتى، قوستاناي جانە پاۆلودار وبلىستارى - ءارقايسىسىندا 4 تەن؛

- جامبىل جانە تۇركىستان وبلىستارى – 3 تەن؛

- اباي، جەتىسۋ، اقمولا، اقتوبە، قىزىلوردا، ماڭعىستاۋ وبلىستارى جانە استانا قالاسى – 1 دەن.

سونىمەن قاتار سوعىس جىلدارىمەن تاعدىرى بايلانىستى ادامدار سانى الدەقايدا كوپ. رەسمي دەرەك بويىنشا، قازاقستاندا جەڭىسكە ۇلەس قوسقان 32852 ادام تۇرادى:

- تىل ەڭبەككەرلەرى - 31349 ادام؛

- سوعىس مۇگەدەكتەرىنىڭ قايتىس بولعان جۇبايلارى - 1335؛

- كامەلەتكە تولماعان كونتسلاگەر تۇتقىندارى - 110؛

- قورشاۋدا بولعان لەنينگراد تۇرعىندارى - 57؛

- قازا تاپقان مايدانگەرلەردىڭ جەسىرلەرى - 1 ادام.

9-مامىرعا قانشا تولەنەدى

2026-جىلى ءبىرجولعى الەۋمەتتىك كومەككە 3,4 ميلليارد تەڭگە ءبولىندى. جالپى شامامەن 32,9 مىڭ ادامعا قولداۋ كورسەتىلەدى.

- سوعىس ارداگەرلەرىنە - ءارقايسىسىنا 5 ميلليون تەڭگەدەن (ەل بويىنشا ءبىرىڭعاي مولشەر، تولەمدەر تولىق جۇرگىزىلگەن)؛

- قالعان ساناتتارعا - تولەم كولەمىن وڭىرلەر جەرگىلىكتى بيۋدجەتكە قاراي وزدەرى بەلگىلەيدى (تولەمدەر 9-مامىرعا دەيىن اياقتالادى).

اي سايىنعى تولەمدەر

مەملەكەتتىك قولداۋ تۇراقتى تۇردە كورسەتىلەدى جانە وعان زەينەتاقى، جاردەماقىلار مەن 16 ا ە ك- كە دەيىنگى (2026-جىلى 69200 تەڭگە) ارنايى قوسىمشا تولەم كىرەدى.

2026-جىلعى ساۋىردەگى ورتاشا جيىنتىق تابىس:

- سوعىس قاتىسۋشىلارى - 293606 تەڭگە؛

- سوعىس مۇگەدەكتەرى - 298050 تەڭگە؛

- قاتىسۋشىلارعا تەڭەستىرىلگەندەر - 228509 تەڭگە؛

- مۇگەدەكتەرگە تەڭەستىرىلگەندەر - 213105 تەڭگە؛

- تىل ەڭبەككەرلەرى - 203207 تەڭگە.

قانداي جەڭىلدىكتەر ساقتالعان

قارجىلاي كومەكتەن بولەك، مەملەكەت ارداگەرلەرگە مەديتسينالىق جانە الەۋمەتتىك ينفراقۇرىلىمعا قولجەتىمدىلىكتى قامتاماسىز ەتەدى. ولار استانا مەن الماتىداعى ارنايى گوسپيتالداردا ەمدەلەدى، تەگىن ساناتوري-كۋرورتتىق ەم الۋعا قۇقىلى، بۇرىنعى جۇمىس ورنى بويىنشا ەمحانالاردا قىزمەت الۋدى جالعاستىرادى جانە الەۋمەتتىك قىزمەتتەردى باسىم تارتىپپەن الادى. سونىمەن قاتار تۇرعىن ءۇي جانە سالىقتىق جەڭىلدىكتەر قاراستىرىلعان.

وڭىرلىك دەڭگەيدە دە قوسىمشا قولداۋ كورسەتىلەدى: تەگىن جول ءجۇرۋ، تۇرعىن ءۇيدى جوندەۋگە كومەك، وتىنمەن، ءدارى-دارمەكپەن جانە ازىق-تۇلىكپەن قامتاماسىز ەتۋ. وسىلايشا، قولداۋ جۇيەسى جىل وتكەن سايىن ناقتى ءارى اتاۋلى سيپات الىپ كەلەدى - سەبەبى ونى الاتىن جاندار سانى دا ازايىپ بارادى.

بۇعان دەيىن قىزىلوردا وبلىسىندا جەڭىس كۇنىنە وراي ەكىنشى دۇنيەجۇزىلىك سوعىسقا قاتىسۋشىلارعا بەرىلەتىن بىررەتتىك تولەم ارتقانى بەلگىلى بولدى. سوڭعى ءتورت جىلدا ونىڭ كولەمى 1,5 ميلليون تەڭگەدەن 5 ميلليون تەڭگەگە، ال بيىل 5,5 ميلليون تەڭگەگە وسكەنىن جازعانبىز.