قازاقستاندا قانشا اۆتومەكتەپ جۇمىس ىستەپ تۇر
استانا. KAZINFORM - كەيبىر اۆتومەكتەپتەردەگى وقىتۋ ساپاسى تومەندەپ بارادى. بۇل تۋرالى ءماجىلىستىڭ جالپى وتىرىسىندا دەپۋتات نۇرتاي سابيليانوۆ ءمالىم ەتتى.
- زاڭ جوباسى جۇرگىزۋشىلەردى دايارلايتىن مەكتەپتەردىڭ قىزمەتىن رەتتەۋدى كوزدەيدى. قازىرگى ۋاقىتتا ەلىمىزدە 727 اۆتومەكتەپ بار. ولار «حابارلامالىق» ءتارتىپ بويىنشا جۇمىس ىستەيدى، ياعني اۆتومەكتەپكە رۇقسات الۋدىڭ قاجەتى جوق. Egov پورتالى ارقىلى قىزمەتتىڭ باستالعانى تۋرالى حابارلاما جىبەرۋ جەتكىلىكتى. مەملەكەت ولاردى الدىن الا تەكسەرمەيدى. باقىلاۋ جۇرگىزىلمەيدى. بۇل كەيبىر اۆتومەكتەپتەردەگى وقىتۋ ساپاسىنىڭ تومەندەۋىنە اكەلىپ سوعىپ وتىر. سوندىقتان اۆتومەكتەپتەردىڭ قىزمەتىنە رۇقسات بەرۋ ءتارتىبى ەنگىزىلەدى. مۇنداي رۇقساتتاردى الۋ ءۇشىن وقۋ ۇيىمدارىنىڭ جىلجىمايتىن مۇلكىن پايدالانۋ قۇقىعىن راستايتىن، وقۋ-ماتەريالدىق بازاسىن ايقىندايتىن قۇجاتتاردىڭ، دايارلىق باعدارلامالارىنىڭ بولۋى، سونداي-اق وقىتۋشىلار مەن وندىرىستىك وقىتۋ شەبەرلەرىنىڭ تىزىمدەرىن ۇسىنۋ تالاپ ەتىلەدى، - دەدى ن. سابيليانوۆ.
سونىمەن قاتار، اۆتومەكتەپتەردىڭ ءتىزىلىمى قۇرىلادى، ونى ىشكى ىستەر مينيسترلىگى جۇرگىزەدى. اۆتومەكتەپتەردىڭ قىزمەتى زاڭ تالاپتارىنا سايكەس كەلمەگەن جاعدايدا، ولار تىزىلىمگە ەنگىزىلمەيدى جانە جۇمىس ىستەۋگە رۇقسات ەتىلمەيدى. بۇل ءوز كەزەگىندە باقىلاۋدى كۇشەيتۋگە، اۆتومەكتەپتەردەگى وقۋ ساپاسىن ارتتىرۋعا وڭ اسەر ەتەدى جانە ادال باسەكەلەستىكتى قالىپتاستىرۋعا ىقپال ەتەدى.
بۇدان بۇرىن حابارلانعانداي، بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول قاۋىپسىزدىگىن سيفرلاندىرۋ جانە جۇرگىزۋشىلەردى دايارلاۋ سالاسىنداعى كاسىپكەرلىك قىزمەت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
