قازاقستاندا قانداي ازىق-تۇلىك ارزانداپ، قايسىسى قىمباتتادى

فوتو: استانا اكىمدىگى

ۇكىمەتتە پرەمەر- ءمينيستردىڭ ورىنباسارى - ۇلتتىق ەكونوميكا ءمينيسترى سەرىك ءجۇمانعاريننىڭ توراعالىعىمەن وتكەن كەڭەستە ينفلياتسيانىڭ وزگەرۋ ديناميكاسى مەن باعانى تۇراقتاندىرۋ شارالارى قارالدى.

ساۋدا جانە ينتەگراتسيا مينيسترلىگىنىڭ مالىمەتىنشە، ازىق تۇلىك ينفلياتسياسى ەكىنشى اي قاتارىنان تومەندەگەن، باعانىڭ 0,1 پايىز دەڭگەيىندەگى دەفلياتسيالىق ءۇردىس ساقتالىپ وتىر. باعا ءوسىمىنىڭ باياۋلاۋىنا الەۋمەتتىك ماڭىزى بار ازىق تۇلىك تاۋارلارى ايتارلىقتاي اسەر ەتۋدە. جىل باسىنان بەرى بۇل تاۋارلاردىڭ باعاسى 1,8 پايىزعا ءوستى. ال وتكەن جىلدىڭ سايكەس كەزەڭىندە ءوسىم 8,3 پايىزدى قۇراعان. ياعني، بيىل باعا ءوسىمى 4,6 ەسە تومەن.

وتكەن اپتادا قانت 2,4 پايىزعا، پياز 1,7 پايىزعا، الما مەن ءسابىز 0,9 پايىزعا، كۇرىش 0,5 پايىزعا، قوي ەتى 0,4 پايىزعا ارزاندادى. ال نان، ماكارون ونىمدەرى، سارى ماي، تۇز جانە شاي باعاسى وزگەرگەن جوق.

سونىمەن قاتار كۇننىڭ سۋىتۋىنا بايلانىستى قيار باعاسى 4,6 پايىزعا، قىرىققابات پەن قىزاناق 3,7 پايىزعا، كارتوپ 2,4 پايىزعا قىمباتتادى. الداعى قىس جانە كوكتەم ايلارىندا جىلىجايدا وسىرىلەتىن كوكونىستەردىڭ باعاسىن تۇراقتاندىرۋ ماقساتىندا وندىرۋشىلەرمەن ءتيىستى مەموراندۋمعا قول قويىلادى.

باعانى تۇراقتاندىرۋدىڭ ءتيىمدى جولدارىنىڭ ءبىرى - اۋىل شارۋاشىلىعى جارمەڭكەلەرى. مۇندا وندىرۋشىلەر ءوز ونىمدەرىن تۇتىنۋشىلارعا تىكەلەي ۇسىنادى. بۇدان بولەك، 17-27-قازان ارالىعىندا ەلىمىزدىڭ بارلىق وڭىرىندە «Bereke Fest» جانە «Republic Day» اكتسيالارى وتۋدە. ولارعا 649 ساۋدا نىسانى قاتىسۋدا. اكتسيالار اياسىندا ساتىپ الۋشىلارعا كۇندەلىكتى تۇتىناتىن تاۋارلار مەن سۇرانىسقا يە ازىق-تۇلىك ونىمدەرى 50 پايىزعا دەيىنگى جەڭىلدىكپەن ۇسىنىلادى.

كەڭەس بارىسىندا سەرىك جۇمانعارين ازىق-تۇلىك ينفلياتسياسى وسكەن وبلىستاردىڭ اكىمدىكتەرىن تىڭدادى. سونداي-اق بارلىق وڭىرگە اۋىل شارۋاشىلىعى جارمەڭكەلەرىنىڭ سانىن ارتتىرىپ، حالىق كوپ تۇتىناتىن ازىق-تۇلىك ونىمدەرىن قولجەتىمدى باعامەن جەتكىلىكتى كولەمدە قامتاماسىز ەتۋدى تاپسىردى.